754. വിശ്വരൂപാ- വിശ്വം രൂപമായവള്. വിശ്വം എന്ന പദം സാധാരണയായി പ്രപഞ്ചത്തിന്റെ സമഗ്രതയെ കുറിക്കുന്നു. ജീവിയും ജഡവും ചരവും അചരവും ആയുള്ളവയും അവയ്ക്കുകാരണമായ പഞ്ചഭൂതങ്ങളും ത്രിഗുണങ്ങളും ചേര്ന്ന പൂര്ണപ്രപഞ്ചമാണു വിശ്വം. ആ വിശ്വമാണ് മൂകാംബികാ വിഗ്രഹരൂപത്തില് കൊല്ലൂരിലെ ക്ഷേത്രത്തില് പ്രകാശിക്കുന്നത്.
വിശ്വം എന്ന പദം വിഷ്ണുവിനെ കുറിക്കാനും പ്രയോഗിക്കാറുണ്ട്. വിഷ്ണു സഹസ്രനാമത്തിലെ ആദ്യനാമം ”വിശ്വം” എന്നാണ്. മൂകാംബികാദേവി വിഷ്ണുരൂപമായവള് എന്നുപറയുമ്പോള് ത്രിമൂര്ത്തികളും ദേവസമൂഹവും ദാനവരും മനുഷ്യരും മറ്റു ജീവികളുമെല്ലാം ദേവിയുടെ രൂപങ്ങളാണെന്നു സിദ്ധിക്കുന്നു.
മേല്പറഞ്ഞതില് നിന്നു വ്യക്തമാകുന്നത് ദേവി സര്വാധാരമായ ബ്രഹ്മചൈതന്യത്തിന്റെ മാതൃഭാവമായ പരാശക്തിയാണെന്നാണ്.
ത്വക്ക്, മാംസം, രക്തം, കൊഴുപ്പ്, അസ്ഥി, മജ്ജ, ശുക്ലം എന്നിവ ചേര്ന്നുണ്ടാകുന്ന സ്ഥൂലശരീരത്തെ താനെന്നു ധരിക്കുന്ന ആത്മചൈതന്യത്തെ ”വിശ്വന്” എന്നുപറയും. വിശ്വന്റെ രൂപം സ്വീകരിച്ചതിനാല് ദേവിക്കു വിശ്വരൂപ എന്നു പേരുണ്ടായി എന്നും വ്യാഖ്യാനിക്കാം.
പ്രതികരിക്കാൻ ഇവിടെ എഴുതുക: