കുടുംബശ്രീയെ കുറിച്ച് പഠിക്കാന്‍ ജാര്‍ഖണ്ഡ് പഠനസംഘം കണ്ണൂരില്‍

Friday 18 September 2015 9:26 pm IST

കണ്ണൂര്‍: സ്ത്രീ ശാക്തീകരണത്തിന്റെ ഉദാത്ത മാതൃകയായ കുടുംബശ്രീയെയും പഞ്ചായത്ത് രാജിനെയും കുറിച്ച് പഠിക്കാന്‍ ജാര്‍ഖണ്ഡില്‍ നിന്നും 27 പേരടങ്ങുന്ന പ്രതിനിധി സംഘം കണ്ണൂര്‍ ജില്ലയിലെത്തി. സ്ത്രീ ശാക്തീകരണത്തിലൂടെ ദാരിദ്ര ലഘൂകരണത്തിന്റെയും സാമ്പത്തിക ശാക്തീകരണത്തിന്റെയും വിജയഗാഥ കുടുംബശ്രീ വനിതകളില്‍ നിന്നും നേരിട്ടറിഞ്ഞ് തങ്ങളുടെ സംസ്ഥാനത്ത് പ്രാവര്‍ത്തികമാക്കുന്നതിനുള്ള പരിശീലനം നേടുകയെന്നതാണ് ഈ സന്ദര്‍ശനത്തിന്റെ മുഖ്യ ലക്ഷ്യം. അതോടൊപ്പം പഞ്ചായത്തും കുടുംബശ്രീയും തമ്മിലുള്ള ബന്ധവും സംഘം നേരിട്ട് മനസ്സിലാക്കും. 17 ന് കണ്ണൂരില്‍ എത്തിയ ജാര്‍ഖണ്ഡ് സംഘത്തിന് കണ്ണൂര്‍ കുടുംബശ്രീ ജില്ലാമിഷന്‍ കോര്‍ഡിനേറ്റര്‍ എം.വി.പ്രേമരാജന്റെ നേതൃത്വത്തില്‍ ഊഷ്മളമായ വരവേല്‍പ്പ് നല്‍കി. പരിപാടിയില്‍ ജില്ലാമിഷന്‍ കോ-ഓഡിനേറ്റര്‍ എം വി പ്രേമരാജന്‍ പരിപാടിക്ക് സ്വാഗതം പറഞ്ഞു. കണ്ണൂര്‍ കുടുംബശ്രീയുടെ പ്രവര്‍ത്തനരീതികളെയും സംഘടനാ സംവിധാനത്തെയും കുറിച്ചുള്ള വിശദമായ ക്ലാസ്സ് ഡിഡിയുജികെവൈ ബ്ലോക്ക് കോ-ഓഡിനേറ്റര്‍ ജിബിന്‍സ്.എം.ജെ , സമഗ്ര ബ്ലോക്ക് കോ-ഓഡിനേറ്റര്‍ ഹരീഷ്.കെ, കുടുംബശ്രീ അസി. ജില്ലാമിഷന്‍ കോ-ഓഡിനേറ്റര്‍ രാജേഷ് എന്‍ എന്നിവര്‍ നല്‍കി. കുടുംബശ്രീ അസി. കോ-ഓഡിനേറ്റര്‍ ഉസ്മാന്‍.സി നന്ദി പറഞ്ഞു. തുടര്‍ന്ന് പഠന സംഘം രണ്ട് ഗ്രൂപ്പുകളായി തിരിഞ്ഞ് കൊളച്ചേരി, ചെമ്പിലോട് എന്നീ പഞ്ചായത്തുകളിലേക്ക് പഠനത്തിനായി പുറപ്പെട്ടു. തുടര്‍ന്നുള്ള അഞ്ച് ദിവസങ്ങളില്‍ കുടുംബശ്രീ ജില്ലാമിഷന്റെ അതിഥികളായി മേല്‍പറഞ്ഞ പഞ്ചായത്തുകളില്‍ കുടുംബശ്രീയുടെ പ്രവര്‍ത്തനങ്ങളെയും, പഞ്ചായത്തും കുടുംബശ്രീയും തമ്മിലുള്ള ബന്ധത്തെയും കുറിച്ച് നേരിട്ട് മനസ്സിലാക്കാനുള്ള ഒരവസരം അവര്‍ക്ക് ലഭിക്കും. പ്രതിനിധികളുടെ സാന്നിധ്യത്തില്‍ പഞ്ചായത്ത് ഭരണസമിതി, സ്ഥിരം സമിതി, കുടുംബശ്രീ സിഡിഎസ്സ്, എഡിഎസ്സ്, അയല്‍ക്കൂട്ടം എന്നിവയുടെ പ്രത്യേകം യോഗങ്ങള്‍ ചേരും. അതുവഴി കുടുംബശ്രീയുടെ പ്രാധാന്യവും സംഘടനാ സംവിധാനവും പ്രവര്‍ത്തന രീതിയും പഞ്ചായത്ത് രാജ് സംവിധാനവും കുടുംബശ്രീയും പഞ്ചയാത്തും തമ്മിലുള്ള ബന്ധവും പ്രായോഗിക തലത്തില്‍ അനുഭവിച്ചറിയാന്‍ കഴിയും. നാഷണല്‍ റിസോഴ്‌സ് ഓര്‍ഗനൈസേഷന്റെ നേതൃത്വത്തിലാണ് ജാര്‍ഖണ്ഡ് സംഘം കണ്ണൂരില്‍ എത്തിയത്.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.