പൂച്ചാക്കല്: ചേര്ത്തല താലൂക്കിന്റെ വടക്കു കിഴക്കന് മേഖലയില് അനധികൃത നിലംനികത്ത് വ്യാപകമായിട്ടും അധികൃതരുടെ ഭാഗത്തു നിന്നും നടപടികളില്ല. പള്ളിപ്പുറം, തൈക്കാട്ടുശേരി, പാണാവള്ളി, അരൂക്കുറ്റി പഞ്ചായത്തുകളിലെ പല പാടശേഖരങ്ങളും പൂഴി ഉപയോഗിച്ച് നികത്തിക്കഴിഞ്ഞിരിക്കുന്നു. റവന്യൂ വകുപ്പ് ഉദ്യോഗസ്ഥരുടെയും, പഞ്ചായത്ത് അധികൃതരുടെയും പോലീസിന്റെയും മൗനാനുവാദത്തോടെയാണ് നിലംനികത്തല് നടക്കുന്നത്. രാഷ്ട്രീയ പാര്ട്ടികളും ഇത് കണ്ടില്ലെന്ന മട്ടിലാണ്.
അരൂക്കുറ്റിയില് അനധികൃത നിലംനികത്തലിനായി കൊണ്ടുവന്ന ജെസിബി നാട്ടുകാര് രണ്ടു തവണ തടഞ്ഞിരുന്നു.പൂച്ചാക്കലില് സ്വകാര്യ ആശുപത്രിക്കു സമീപവും നിലംനികത്തല് തകൃതിയായി നടക്കുന്നു. നടപടിയെടുക്കാന് അധികൃതര് മടിക്കുന്ന സാഹചര്യത്തില് നാട്ടുകാര് തന്നെ ഇത് തടയാന് രംഗത്തിറങ്ങുകയാണ്. പ്രതിഷേധവുമായി മുന്നോട്ടു വരേണ്ട രാഷ്ട്രീയ പാര്ട്ടികള് നിലംനികത്തലിന് ഒത്താശ ചെയ്യുന്നതായി നാട്ടുകാര് ആരോപിക്കുന്നു. നിലംനികത്തല് വ്യാപകമായത് പ്രദേശത്തെ ജലസ്രോതസ്സുകളെ പ്രതികൂലമായി ബാധിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: