പറവൂര്: വടക്കേക്കര ചെട്ടിക്കാട്-കുഞ്ഞിത്തൈ പാലം നിര്മിക്കണമെന്നാവശ്യപ്പെട്ട് ബിജെപി ചെട്ടിക്കാട്-കുഞ്ഞിത്തൈ വാര്ഡ് കമ്മറ്റികളുടെ നേതൃത്വത്തില് ജനങ്ങള് പുഴയില് ഇറങ്ങിനിന്ന് പ്രതീകാത്മകമായി പാലം നിര്മിച്ച് പ്രതിഷേധിച്ചു.
ചെട്ടിക്കാട്-കുഞ്ഞിത്തൈ പാലത്തിനായി ജനങ്ങള് മുറവിളി കൂട്ടാന് തുടങ്ങിയിട്ട് വര്ഷങ്ങളേറെയായി. ഇവിടെനിന്നും ജയിച്ചുപോയ ജനപ്രതിനിധികള് എംഎല്എയും മന്ത്രിയും ഒക്കെ ആയെങ്കിലും ഇവരാരും ജനങ്ങള്ക്ക് കൊടുത്ത ഉറപ്പുകള് ഒന്നും പാലിച്ചിട്ടില്ല.
ചെട്ടിക്കാട്-കുഞ്ഞിത്തൈ കടവ് വഴി എസ്എന്എം കോളേജ് മാല്ല്യങ്കര, കൊട്ടുവള്ളിക്കാട് എച്ച്എംവൈഎസ് എച്ച്എസ്എസ്, എസ്എന്എം എല്പിഎസ്, കുഞ്ഞിത്തൈ ആംഗ്ലോ ഇന്ത്യന് സ്കൂള് എന്നിവിടങ്ങളിലേക്ക് വിദ്യാര്ത്ഥികള് ആശ്രയിക്കുന്നത് ഈ കടവിനെയാണ്. കൂടാതെ ചെട്ടിക്കാട് വിശുദ്ധ അന്തോണീസിന്റെ ദേവാലയത്തിലേക്ക് പോകുന്നതിന് നിരവധി ഭക്തജനങ്ങള് ആശ്രയിക്കുന്നതും ഈ കടവിനെ തന്നെയാണ്.
ചെട്ടിക്കാട് നിവാസികള്ക്ക് പറവൂര് മറ്റ് ഭാഗങ്ങളിലേക്കും കുഞ്ഞിത്തൈ നിവാസികള്ക്ക് മൂത്തകുന്നം, കൊടുങ്ങല്ലൂര്, മുനമ്പം ഭാഗങ്ങളിലേക്കും എളുപ്പമാര്ഗത്തില് പാലം വന്നാല് എത്തിച്ചേരാന് സാധിക്കും.
കൊട്ടുവള്ളിക്കാട്ടില്നിന്നും പ്രകടനമായെത്തിയ ബിജെപി പ്രവര്ത്തകര്ക്കൊപ്പം നൂറ് കണക്കിന് പ്രദേശവാസികളും അണിനിരന്നു. സ്ത്രീകളടക്കം നിരവധി പേരാണ് കുഞ്ഞിത്തൈ-ചെട്ടിക്കാട് പുഴയ്ക്ക് കുറുകെ ഇറങ്ങിനിന്ന് മനുഷ്യപ്പാലം തീര്ത്തത്.
സമരം ബിജെപി ജില്ലാ പ്രസിഡന്റ് അഡ്വ.പി.ജെ.തോമസ് ഉദ്ഘാടനം ചെയ്തു. വടക്കേക്കര പഞ്ചായത്ത് കമ്മറ്റി പ്രസിഡന്റ് ഒ.പി.ബൈജു അദ്ധ്യക്ഷത വഹിച്ചു. ചെട്ടിക്കാട് എസ്എന്ഡിപി ശാഖാ സെക്രട്ടറി ഇ.വി.സാനു, ബിജെപി ജില്ലാ കമ്മറ്റിയംഗം കെ.കെ.വേലായുധന്, പറവൂര് മണ്ഡലം സെക്രട്ടറി എം.ബി.കണ്ണന്, ന്യൂനപക്ഷ മോര്ച്ച മണ്ഡലം കണ്വീനര് ഷെല്ലി ദേവസി, ബിഎംഎസ് മേഖല സെക്രട്ടറി കെ.എസ്.ശ്യാംജിത്ത് എന്നിവര് സംസാരിച്ചു. കെ.എസ്.ശ്രീജിത്ത്, എം.എസ്.ഷണ്മുഖന്, ലിബി, ബൈജു, സക്കീര്, കണ്ണന് എന്നിവര് നേതൃത്വം നല്കി.
പ്രതികരിക്കാൻ ഇവിടെ എഴുതുക: