കോഴിക്കോട്: ഇന്ത്യന് കളരിപ്പയറ്റ് ഫെഡറേഷനെ ദേശീയ തലത്തില് അംഗീകരിച്ചുകൊണ്ട് കേന്ദ്ര കായിക യുവജനക്ഷേമ മന്ത്രാലയം ഉത്തരവിറക്കിയതായി ഐ കെ എഫ് സെക്രട്ടറി ജനറല് അഡ്വ. പൂന്തുറ സോമന്, പ്രസിഡന്റ് എം എന് കൃഷ്ണമൂര്ത്തി എന്നിവര് വാര്ത്താസമ്മേളനത്തില് അറിയിച്ചു.
ഇന്ത്യന് കളരിപ്പയറ്റ് ഫെഡറേഷന് രാജ്യത്തെ എല്ലാ സംസ്ഥാനങ്ങളിലും കളരിപ്പയറ്റ് അസോസിയേഷനുകള്ക്ക് രൂപം നല്കാനും സംസ്ഥാനതല ചാംപ്യന്ഷിപ്പുകള് സംഘടിപ്പിക്കാനും നടപടികള് ആരംഭിച്ചു. കളരിപ്പയറ്റിന്റെ ദേശീയചാംപ്യന്ഷിപ്പും സെമിനാറും നവംബര് മാസത്തില് തിരുവനന്തപുരത്ത് വെച്ച് നടത്തും.
തുടര്ന്ന് പുരുഷ-വനിത സീനിയര്, ജുനിയര്, സബ്ജൂനിയര് വിഭാഗങ്ങളിലായി ദേശീയതല മത്സരങ്ങളും, സംസ്ഥാനതല മത്സരങ്ങളും, സോണല് മത്സരങ്ങളും സംഘടിപ്പിക്കും. അടുത്ത ദേശീയ ഗെയിംസില് മത്സരയിനമായി മാറുന്നുവെന്ന നേട്ടമാണ് ഈ അംഗീകാരത്തോടെ കൈവന്നിരിക്കുന്നതെന്ന് ഭാരവാഹികള് കൂട്ടിച്ചേര്ത്തു. വാര്ത്താസമ്മേളനത്തില് സ്പോര്ട്സ് കൗണ്സില് ജില്ലാ പ്രസിഡന്റ് കെ ജെ മത്തായി, എ മൂസഹാജി, എം കെ രാജഗോപാല് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: