കോട്ടയം: എസ്എന്ഡിപി യോഗം മൈക്രോ ഫിനാന്സ് പദ്ധതിയെ അപകീര്ത്തിപ്പെടുത്തുന്ന സിപിഎം നേതൃത്വത്തിനെതിരെ കോട്ടയത്ത് സ്ത്രീകളുടെ വമ്പിച്ച പ്രതിഷേധം. പാവപ്പെട്ടവരുടെ പട്ടിണിമാറ്റാന് എസ്എന്ഡിപി യോഗം ആവിഷ്കരിച്ച് വിജയകരമായി നടപ്പിലാക്കിയ മൈക്രോഫിനാന്സ് പദ്ധതിയെ കഥയറിയാതെവിമര്ശിക്കുന്ന നടപടിക്ക് ഇനിയുള്ള പൊതുതിരഞ്ഞെടുപ്പുകളില് ബാലറ്റിലൂടെ മറുപടി പറയുമെന്ന് പ്രതിഷേധയോഗം ഉദ്ഘാടനം ചെയ്ത എസ്എന്ഡിപി യോഗം വനിതാസംഘം കേന്ദ്രസമിതി സെക്രട്ടറി അഡ്വ.സംഗീത വിശ്വനാഥന് പറഞ്ഞു. രക്തസാക്ഷികളാകാനും കൊലപാതകകേസുകളില് പ്രതിപ്പട്ടിക പൂര്ത്തിയാക്കാനും ഇനി ഈഴവ യുവാക്കളെ കിട്ടില്ലെന്ന് തിരിച്ചറിഞ്ഞതില് വെറളിപൂണ്ട സിപിഎം നേതൃത്വത്തിന് സമനിലതെറ്റിയിരിക്കുകയാണ്. എന്തൊക്കെ നുണപ്രചരണങ്ങളുണ്ടായാലും എസ്എന്ഡിപി യോഗത്തിന്റെ അമരക്കാരന് വെള്ളാപ്പള്ളി നടേശന്റെ പിന്നില് ജനലക്ഷങ്ങള് അണിനിരക്കുമെന്നും സംഗീതവിശ്വനാഥന് പറഞ്ഞു. എസ്എന്ഡിപി യോഗം കോട്ടയം യൂണിയന് ആസ്ഥാനമന്ദിരാങ്കണത്തില് നടന്ന പൊതുസമ്മേളനത്തില് പ്രസിഡന്റ് എ.ജി.തങ്കപ്പന് അദ്ധ്യക്ഷത വഹിച്ചു. യൂണിയന് കൗണ്സിലര് സജീഷ് കുമാര് മണലേല് മുഖ്യപ്രഭാഷണം നടത്തി. വനിതാസംഘം യൂണിയന് സെക്രട്ടറി ഇന്ദിര രാജപ്പന് സ്വാഗതം പറഞ്ഞു. സമ്മേളനത്തിനുശേഷം മൈക്രോഫിനാന്സ് അംഗങ്ങളായ ആയിരക്കണക്കിന് സ്ത്രീകളും പുരുഷന്മാരും അണിനിരന്ന പ്രതിഷേധ പ്രകടനവും നടത്തി. യൂണിയന് ആസ്ഥാന മന്ദിരത്തില് നിന്ന് ആരംഭിച്ച പ്രകടനം എം.സി റോഡിലൂടെ ശീമാട്ടി റൗണ്ടില് എത്തി തിരികെ യൂണിയന് ആസ്ഥാനത്ത് സമാപിച്ചു. വനിതാസംഘം കോട്ടയം യൂണിയന് നേതാക്കളായ ഇന്ദിര രാജപ്പന്, ഉഷഗോപിദാസ്, സുവര്ണ്ണ തമ്പി, ഷൈലജ രവീന്ദ്രന്, ഷൈലജ സാധുക്കുട്ടന് ചെല്ലമ്മ മോഹന്, ലത ഷൈജന്, ഷൈലജ ഷാബു, ഷേര്ളി വേണു, മിനി ഷാജി, അശ്വതി കുട്ടപ്പായി തുടങ്ങിയവര് നേതൃത്വം നല്കി. എസ്.എന്.ഡി.പി യോഗം കോട്ടയം യൂണിയന് നേതാക്കളായ എ.ജി.തങ്കപ്പന്, വി.എം.ശശി, യോഗം ഡയറക്ടര് ബോര്ഡ് മെമ്പര്മാര്, കൗണ്സിലര്മാര് എന്നിവര് മേല്നോട്ടം വഹിച്ചു.
പ്രതികരിക്കാൻ ഇവിടെ എഴുതുക: