ദേഹമൂലം പുത്രദാരാദിബന്ധവും
ദേഹിക്കു സംസാരവുമതുകാരണം
ശോകഭയക്രോധലോഭമോഹസ്പൃഹാ-
രാഗഹര്ഷാദി ജരാമൃത്യുജന്മങ്ങള്
ജ്ഞാനജങ്ങളഖില ജന്തുക്കള്ക്കും
അജ്ഞാനമെല്ലാ മകലെക്കളക നീ.
അജ്ഞാനംമൂലമാണ് നശ്വരമായ ശരീരാദികളില് നാം വിശ്വസിക്കുന്നത്. പുത്രദാരാദി സംബന്ധവും ശരീരം മൂലമാണ് ഉണ്ടാകുന്നത്. ആത്മാവിന് സംസാരബന്ധം സംഭവിക്കുന്നതും ദേഹംമൂലമാണ്. സര്വ ജന്തുക്കള്ക്കും അനുഭവപ്പെടുന്ന ശോകം, ഭയം, ക്രോധം മുതലായവയെല്ലാം ഉണ്ടാകുന്നത് അജ്ഞാനത്തില് നിന്നാണ്. ഈ സത്യം മനസ്സിലാക്കി നീ ശോകത്തെ വെടിയുക.
ജ്ഞാനസ്വരൂപനും പരനും അദ്വയനും ആനന്ദ പൂര്ണ്ണ സ്വരൂപനും അലേപകനുമാണ് ആത്മാവ്. ആത്മാവിന് ഒന്നിനോടും സംയോഗമോ വിയോഗമോ സംഭവിക്കുന്നില്ല. ഈ ആത്മസത്യം മനസ്സിലാക്കി നീ നിന്റെ ദുഃഖം വെടിയുക. ഒന്നുകില് രാമലക്ഷ്മണന്മാരേയും വാനരന്മാരേയും കൊന്ന് ജയം നേടി ഞാന് തിരികെവരും. അല്ലെങ്കില് രാമന്റെ അമ്പേറ്റ് മരിച്ച് ഞാന് മോക്ഷം പ്രാപിക്കും. അങ്ങിനെ ഞാന് മരിക്കുന്നപക്ഷം നീ സീതയെ കൊല്ലുകയും എന്റെ ചിതയില്ചാടി മോക്ഷം പ്രാപിക്കുകയും വേണം.
ദുഃഖത്തോടുകൂടി രാവണന്റെ വാക്കുകള് ശ്രവിച്ച മണ്ഡോദരി കാര്യങ്ങളുടെ യാഥാര്ത്ഥ്യം വ്യക്തമായി മനസ്സിലാക്കിയിട്ടുള്ളതിന്റെ വെളിച്ചത്തില് രാവണനോട് പറഞ്ഞു. പ്രഭോ അങ്ങ് ഒരു കാര്യം മനസ്സിലാക്കണം. മോക്ഷദായകനായ സാക്ഷാല് മഹാവിഷ്ണുവാണ് ശ്രീരാമന്. അദ്ദേഹത്തെ ജയിക്കുന്നതിന്ന് ത്രിഭുവനത്തില് ആര്ക്കുംതന്നെ സാധ്യമല്ല. വൈവസ്വത മനുവിന്റെ രക്ഷക്കായി മത്സ്യാവതാരമെടുത്തതും പാലാഴി മഥന സമയത്ത് കൂര്മ്മമായി അവതരിച്ചതും, ഹിരണ്യാക്ഷനെ വധിക്കാനായി വരാഹാവതാരമെടുത്തതും പ്രഹ്ലാദന്റെ രക്ഷക്കായി നരസിംഹാവതാരമെടുത്ത് ഹിരണ്യകശിപുവിനെ മാറ് കീറികൊന്നതും വാമനനായി വന്ന് മഹാബലിയോട് മൂന്നടി മണ്ണ് യാചിച്ച് മൂന്നുലോകങ്ങളും മൂന്നടിയായി അളന്നെടുത്തതും ക്ഷത്രിയന്മാരായി പിറന്ന അസുരന്മാരെ നിഗ്രഹിക്കാനായി ജമദഗ്നീപുത്രനായ രാമനായി അവതരിച്ചതും എല്ലാം ഈ രാമന്തന്നെയാണ്.
ഇപ്പോള് സൂര്യവംശത്തില് പിറന്നത് അങ്ങയെ വധിക്കാന് വേണ്ടിയാണ്. പുത്രനാശത്തിനും അങ്ങയുടെ മരണത്തിനും ഒരു കാരണം എന്ന നിലക്ക് അങ്ങ് വീണ്ടുവിചാരമില്ലാതെ നിര്ലജ്ജനായി സീതയെ അപഹരിക്കുകയും ചെയ്തു. അതുകൊണ്ട് മരണത്തില് നിന്ന് ഒരു മോചനം ലഭിക്കുന്നതിന്നായി അങ്ങ് സീതയെ രാമന് തിരികെ കൊടുത്ത് രാജ്യം വിഭീഷണനും നല്കുക. അതിനുശേഷം നമുക്ക് തപസ്സിനായി വനത്തിലേക്കുപോകാം.
പ്രതികരിക്കാൻ ഇവിടെ എഴുതുക: