ചങ്ങനാശേരി: നഗരസഭയിലെ 20, 21, 22, 23 വാര്ഡുകളില് ശക്തമായ പോരാട്ടം. 21-ാം വാര്ഡില് ബിജെപി ജില്ലാ സെക്രട്ടറി എന്.പി. കൃഷ്ണകുമാറാണ് മത്സരരംഗത്തുള്ളത്. എതിര് സ്ഥാനാര്ത്ഥി സൂര്യ നായരാണ്. മുന് കൗണ്സിലര് സ്മിതാ ജയന് കൗണ്സിലര് സ്ഥാനം രാജിവച്ചതിനെതുടര്ന്ന് ഇവിടെ ഉപതിരഞ്ഞെടുപ്പ് നടത്തിയിരുന്നു. ബിജെപിയുടെ ശക്തനായ സ്ഥാനാര്ത്ഥി മത്സരരംഗത്ത് വന്നതോടെ മത്സരം മുറുകി. എതിരാളികളെക്കാളും ബഹുദൂരം മുന്നിലാണ് ബിജെപി സ്ഥാനാര്ത്ഥിയായ എന്.പി.കൃഷ്ണകുമാര്. ബിജെപിയുടെ 22-ാം വാര്ഡിലെ സ്ഥാനാര്ത്ഥി ബിന്ദുഗോപകുമാര് ഹൈക്കോടതി വിധിയിലൂടെയാണ് മത്സരരംഗത്തുളളത്. വോട്ടേഴ്സ് ലിസ്റ്റില്നിന്നും എതിരാളികള് പേര് വെട്ടിനീക്കിയതായിരുന്നു. കോടതിയെ സമീപിച്ച് മത്സരിക്കുന്നതിനും വോട്ട് ചെയ്യുന്നതിനുമുള്ള വിധി ബിന്ദു ഗോപകുമാര് സമ്പാദിക്കുകയായിരുന്നു. എതിര് സ്ഥാനാര്ത്ഥി എല്ഡിഎഫിലെ കൃഷ്ണകുമാരി രാജശേഖരനാണ്. വളഞ്ഞവഴിയില് രാഷ്ട്രീയനേട്ടം ഉണ്ടാക്കുന്നതിനാണ് എല്ഡിഎഫ് ശ്രമിച്ചത്. ഈ വാര്ഡില് യുഡിഎഫ് സ്ഥാനാര്ത്ഥിയെ നിര്ത്തിയിരുന്നില്ല. ഇതിലൂടെ എല്ഡിഎഫ്-യുഡിഎഫ് ഒത്തുകളി പുറത്തുവന്നിരിക്കുകയാണ്. ബിജെപി നിര്ത്തിയ ഡമ്മി സ്ഥാനാര്ത്ഥി ലക്ഷ്മി യുഡിഎഫ് സ്ഥാനാര്ത്ഥിയാണെന്ന് പറയുന്നുണ്ടെങ്കിലും പ്രാദേശിക യുഡിഎഫ് നേതൃത്വത്തിന് ഇതിനെക്കുറിച്ച അറിവില്ല.
23-ാം വാര്ഡില് കെ.ആര്. പ്രേംകുമാര് ബി.ജെ.പി സ്ഥാനാര്ത്ഥിയായി മത്സരിക്കുന്നു. ചങ്ങനാശേരിയിലെ സീനിയര് അഭിഭാഷക ഗുമസ്തനായി പ്രവര്ത്തിക്കുന്നു. 25 വര്ഷത്തിലേറെയായി ഇദ്ദേഹം പ്രവര്ത്തനം തുടങ്ങിയിട്ട്. എതിര് സ്ഥാനാര്ത്ഥി സതീഷ് ഐക്കര യുഡിഎഫ് സ്വതന്ത്രനായാണ് 2010ലെ തെരഞ്ഞെടുപ്പില് മത്സരിച്ചത്. നാല് വര്ഷം കഴിഞ്ഞപ്പോള് യുഡിഎഫ് വിട്ട് എല്ഡിഎഫ് പാളയത്തിലെത്തുകയായിരുന്നു. ഇതേതുടര്ന്ന് യുഡിഎഫിന് ഭരണം നഷ്ടപ്പെട്ടു. സതീഷ് ഐക്കരക്കെതിരെ ഇലക്ഷന് കമ്മീഷനില് യുഡിഎഫ് കൂറുമാറ്റ നിരോധന നിയമപ്രകാരം പരാതി നല്കിയിട്ടുണ്ട്. അതിന്റെ വാദം അടുത്തമാസം നടക്കും. ഇതിനിടയിലാണ് സ്വതന്ത്രനായി രംഗത്തുളളത്. ഈ വാര്ഡില് എല്ഡിഎഫ് സ്ഥാനാര്ത്ഥിയെ നിര്ത്തിയിട്ടില്ല. ഇതും ഒത്തുകളിയായി വേണം കരുതാന്. ഇതിനിടയില് സ്ഥാനാര്ത്ഥി എന്എസ്എസ് നേതൃത്വത്തിന്റെ അറിവോടെയാണ് മത്സരരംഗത്തുള്ളതെന്നാണ് പ്രചാരണം. ഇക്കാര്യത്തെക്കുറിച്ച് എന്എസ്എസ് ജനറല് സെക്രട്ടറി സുകുമാരന് നായര് പറഞ്ഞത് പരസ്യമായോ രഹസ്യമായോ സ്ഥാനാര്ത്ഥികളെ നിര്ത്തിയിട്ടില്ല, അടിസ്ഥാനരഹിതമായ കിംവദന്തികളാണ് ഇതെന്ന് അദ്ദേഹം പറഞ്ഞു. 20-ാം വാര്ഡില് ബി.ജെ.പി നിയോജകമണ്ഡലം ജന.സെക്രട്ടറി പി.പി.ധീരസിംഹനാണ് മത്സരരംഗത്തുള്ളത്. ചിന്മയ മിഷന് ചങ്ങനാശേരി ബ്രാഞ്ച് ജന:സെക്രട്ടറിയായി പ്രവര്ത്തിക്കുന്നു. എതിര് സ്ഥാനാര്ത്ഥികള് എല്ഡിഎഫിലെ പി.എസ്. മനോജും യുഡിഎഫ് സ്ഥാനാര്ത്ഥി രാജീവുമാണ്.
പ്രതികരിക്കാൻ ഇവിടെ എഴുതുക: