പൊന്കുന്നം: ബിജെപി ശക്തമായ വേരൊട്ടമുള്ള പൊന്കുന്നം ഡിവിഷനിലെ മത്സരം ഇടതു-വലതു മുന്നണികളെ അമ്പരപ്പിക്കുന്നു. പരിചയ സമ്പന്നതയുമായി ബിജെപിയുടെ സ്ഥാനാര്ത്ഥി പി.സി. ശ്രീലത പ്രചാരണ രംഗത്ത് മുന്നേറുമ്പോള് ഇരു മുന്നണികളുടെയും വോട്ടുകളില് ഒരു പങ്ക് ഇക്കുറി ബിജെപിക്കാകുമെന്ന സാദ്ധ്യതയാണ് തെളിയുന്നത്. സ്ഥാനാര്ത്ഥി നിര്ണ്ണയത്തില് ഇരു മുന്നണികള്ക്കും അവസാന നിമിഷം വരെ അവ്യക്തതയായിരുന്നു. എല്ഡിഎഫില് ആദ്യം നിശ്ചയിച്ച സ്ഥാനാര്ത്ഥി പിന്മാറിയപ്പോള് കോണ്ഗ്രസുകാരിയെ സിപിഎം ചിഹ്നത്തില് മത്സരിപ്പിക്കേണ്ട ഗതികേടിലായി എല്ഡിഎഫ്. യുഡിഎഫിലും സ്ഥാനാര്ത്ഥിത്വത്തെ ചൊല്ലി ഒട്ടേറെ തര്ക്കങ്ങള്ക്കൊടുവിലാണ് മത്സരിക്കാന് ആളെ കണ്ടെത്തിയത്. സ്ഥാനാര്ത്ഥി നിര്ണ്ണയത്തില് എല്ഡിഎഫിലും യുഡിഎഫിലും അതൃപ്തര് ഏറെയാണ്. അര്ഹരായ പലരെയും തഴഞ്ഞ് സ്വാധീനങ്ങള്ക്ക് വഴങ്ങിയാണ് സ്ഥാനാര്ത്ഥികളെ നിയോഗിച്ചതെന്നാണ് ഇരു മുന്നണികളെയും സജീവ പ്രവര്ത്തകരില് ഏറെപ്പേരും വിശ്വസിക്കുന്നത്. അതിനാല് പ്രചാരണ രംഗത്ത് പല പ്രമുഖരും നിര്ജ്ജീവമാണ്. മുന്നണികളിലെ അതൃപ്തി ബിജെപി സ്ഥാനാര്ത്ഥിക്ക് ഗുണകരമാകുമെന്ന് അവര്തന്നെ സമ്മതിക്കുന്നുമുണ്ട്. പലരും പരസ്യമായിതന്നെ ബിജെപി സ്ഥാനാര്ത്ഥിക്ക് പിന്തുണ വാഗ്ദാനം ചെയ്തിട്ടുണ്ട്. ബിജെപി സ്ഥാനാര്ഥി പി.സി. ശ്രീലത 20 വര്ഷമായി അദ്ധ്യാപന രംഗത്തും പൊതുരംഗത്തും സജീവമാണ്. ശിഷ്യസമ്പത്തിന് ഉടമയായ ശ്രീലതയ്ക്ക് ഡിവിഷനില് പരിചയപ്പെടുത്തലിന്റെ ആവശ്യമില്ല. കങ്ങഴ ഗ്രാമപഞ്ചായത്ത് അംഗമെന്ന നിലയില് വാര്ഡിന്റെ വികസനകാര്യത്തില് ഏറെ പ്രവര്ത്തനങ്ങള് കാഴ്ചവച്ചു. എന്എസ്എസ് വനിതാസമാജം സെക്രട്ടറി, മഹിളാമോര്ച്ച ഭാരവാഹി എന്നീ നിലകളിലും പൊതുരംഗത്ത് സജീവമാണ്.
ഡിവിഷന്റെ ഘടനയില് വരുത്തിയ മാറ്റങ്ങള് ബിജെപിക്ക് മേല്ക്കൈയുള്ള ഡിവിഷനാക്കിയതായാണ് വിലയിരുത്തല്. ഇപ്പോഴത്തെ ഡിവിഷനില് വാഴൂര്, പള്ളിക്കത്തോട്, ചിറക്കടവ് പഞ്ചായത്തുകള് പൂര്ണമായും ഉള്ക്കൊള്ളുന്നു. എലിക്കുളം പഞ്ചായത്തിലെ 11,12,13 വാര്ഡുകളും കൂരോപ്പട പഞ്ചായത്തിലെ 6, 7, 8 വാര്ഡുകളുമാണ് ഈ ഡിവിഷനിലുള്ളത്. ഈ പഞ്ചായത്തുകളിലെല്ലാം ബിജെപിക്ക് കഴിഞ്ഞ ഭരണ സമിതിയില് അംഗബലവും ഉണ്ടായിരുന്നു. ബിജെപിക്ക് വ്യക്തമായ മുന്തൂക്കമുള്ള പഞ്ചായത്തുകളാണ്. എല്ഡിഎഫിന്റെയും യൂഡിഎഫിന്റെയും അഴിമതിയും ന്യൂനപക്ഷ പ്രീണനവും വോട്ടര്മാരെ മാറി ചിന്തിക്കാന് പ്രേരിപ്പിച്ചിട്ടുണ്ട്.
ഭാരതത്തില് ആകെയുണ്ടായ മാറ്റത്തിന്റെ ഫലമായി ശക്തമായ മത്സരത്തിലൂടെ വിജയം നേടാനാകുമെന്നാണ് ബിജെപിയുടെ പ്രതീക്ഷ. ഡിവിഷനിലെ വാഴൂര് പഞ്ചായത്തിലും ബ്ലോക്ക് ഡിവിഷനിലും പി.സി. തോമസ് വിഭാഗത്തിന് സീറ്റുകള് നല്കിയാണു ബിജെപി മത്സരിക്കുന്നത്.
പ്രതികരിക്കാൻ ഇവിടെ എഴുതുക: