പൊന്കുന്നം: വാഴൂര് ബ്ലോക്ക് പഞ്ചായത്തില് ഉള്പ്പെട്ട ചിറക്കടവ് പഞ്ചായത്ത് ഡിവിഷനുകളില് വിജയമുറപ്പിച്ച് ബിജെപി സ്ഥാനാര്ത്ഥികള്. പഞ്ചായത്തിലെ പൊന്കുന്നം, ചിറക്കടവ്, ചെറുവള്ളി ഡിവിഷനുകളില് ബിജെപിയുടെ കരുത്തരായ സ്ഥാനാര്ത്ഥികള് ഇരുമുന്നണികള്ക്കും ശക്തമായ വെല്ലുവിളിയാണ് ഉയര്ത്തുന്നത്. ബിജെപിയുടെ ശക്തമായ സംഘടനാ സംവിധാനം നിലനില്ക്കുന്ന ചിറക്കടവ് പഞ്ചായത്തില് വിജയത്തില് കുറഞ്ഞൊന്നുമല്ല പ്രവര്ത്തകര് കാണുന്നത്. ചിറക്കടവ്, ചെറുവള്ളി ഡിവിഷനുകള് വനിതാ സംവരണമാണ്.
ചിറക്കടവ് പഞ്ചായത്തിലെ 1, 2, 3, 4, 5, 19, 20 വാര്ഡുകള് ഉള്പ്പെട്ടതാണ് വാഴൂര് ബ്ലോക്ക് പൊന്കുന്നം ഡിവിഷന്. 10,073 വോട്ടര്മാരാണ് ഉള്ളത്. പരിചയ സമ്പന്നനും പൊതുസമ്മതനായ വ്യക്തിത്വത്തെ പൊന്കുന്നം ഡിവിഷനില് ബിജെപി സ്ഥാനാര്ത്ഥിയാക്കിയപ്പോള് തന്നെ ഇരുമുന്നണികളും പ്രതിരോധത്തിലായി. ഇവിടെ സ്ഥാനാര്ത്ഥിയായ പി. പ്രസാദ് പൊന്കുന്നത്തിന് സുപരിചിതനാണ്. ബിജെപി ജില്ലാ സെക്രട്ടറി, വാഴൂര് നിയോജകമണ്ഡലം പ്രസിഡന്റ്, ആര്എസ്എസിന്റെ വിവിധ ചുമതലകള്, പൊന്കുന്നം സാംസ്കാരിക സംഘടനാ സെക്രട്ടറി, താലൂക്ക് ലീഗല് സര്വ്വീസ് സൊസൈറ്റിയുടെ ചുമതല, പൊന്കുന്നം ജനമൈത്രി പോലീസ് എന്നിവയുടെ പ്രവര്ത്തനങ്ങള്ക്ക് നേതൃത്വം വഹിച്ചിട്ടുണ്ട്. മുമ്പ് ഒരു തവണ ചിറക്കടവ് പഞ്ചായത്ത് അഞ്ചാം വാര്ഡില് നിന്നും മത്സരിക്കുകയും രണ്ടാം സ്ഥാനത്ത് എത്തിച്ചേരുകയും ചെയ്തിരുന്നു. പഞ്ചായത്തിലെ 6,7,8,9, 17,18 വാര്ഡുകള് ഉള്പ്പെട്ടതാണ് വാഴൂര് ബ്ലോക്ക് ചിറക്കടവ് ഡിവിഷന്. ഇവിടെ മത്സരിക്കുന്ന ഷീബ സാബു ചിറക്കടവ് ഡിവിഷന്റെ സമഗ്ര വികസനം ഉറപ്പു നല്കുന്നു. വികസന മുരടിപ്പ് അനുഭവിക്കുന്ന ഡിവിഷനില് അടിസ്ഥാന വികസനത്തിന് മുന്തൂക്കം നല്കി പ്രവര്ത്തനമാണ് ലക്ഷ്യം വയ്ക്കുന്നത്. കുടിവെള്ളം, തകര്ന്ന റോഡുകള് എന്നിവയ്ക്കെല്ലാം മുന്തൂക്കം നല്കാന് കഴിയുമെന്ന് ഷീബ സാബു പറയുന്നു. വികസന മുരടിപ്പില് മനസ് മടിച്ച് വോട്ടര്മാര് ഇരുമുന്നണികളെ തള്ളി ബിജെപിയെ വിജയപ്പിക്കുമെന്ന് പ്രവര്ത്തകര് പറയുന്നു.
പഞ്ചായത്തിലെ 10,11,12, 13,14,15,16 വാര്ഡുകള് ഉള്പ്പെട്ടതാണ് ചെറുവള്ളി ഡിവിഷന്. ചെറുവള്ളി ഡിവിഷനില് നിന്നും ജനവിധി തേടുന്ന ജയടീച്ചര് കുടുംബശ്രീ പ്രവര്ത്തനങ്ങളിലൂടെ പൊതുരംഗത്തെത്തി. ദീര്ഘകാലം അദ്ധ്യാപികയായി സേവനം അനുഷ്ഠിച്ചു. ഇതിലൂടെ നേടിയ ശിക്ഷ്യസമ്പത്ത് ടീച്ചര്ക്ക് തുണയാകും. ഇപ്പോള് സ്റ്റേറ്റ് ബാങ്ക് ഓഫ് ഇന്ത്യയുടെ ഇന്ഷുറന്സ് മേഖലയില് ട്രയിനറായി ജോലി നോക്കുന്നു. വികസനകാര്യത്തില് ഏറ്റവും പിന്നിലായ ചെറുവള്ളി ഡിവിഷനെ വികസനത്തിന്റെ പാതയിലേക്ക് കൈപിടിച്ച് ഉയര്ത്താന് പരിശ്രമിക്കുമെന്ന് ജയ ടീച്ചര് ഉറപ്പുനല്കുന്നു.
മൂന്നു സ്ഥാനാര്ത്ഥികളും വീടുകയറിയുള്ള പ്രവര്ത്തനത്തിന് ഏറെ പ്രാധാന്യം നല്കിയത് ഏറെ ഗുണകരമാണ്. വീടു കയറിയുള്ള പ്രവര്ത്തനത്തിന് ഇരുമുന്നണി സ്ഥാനാര്ത്ഥികളും ഏറെ പിന്നിലാണെന്നതും ബിജെപി സ്ഥാനാര്ത്ഥികളുടെ വിജയത്തിന് ഏറെ ഗുണകരമാകും.
പ്രതികരിക്കാൻ ഇവിടെ എഴുതുക: