ആലപ്പുഴ: കെ.ആര്. ഗൗരിയമ്മയ്ക്കൊപ്പം ഉറച്ചുനിന്നതിനും ജെഎസ്എസ് വളര്ത്തിയതിനും സിപിഎം കൊലചെയ്തവരെയും കൊല്ലാക്കൊല ചെയ്തവരെയും മറന്ന് ഗൗരിയമ്മ പ്രവര്ത്തിക്കുന്നതില് ദുഃഖമുണ്ടെന്നും ഇത് വഞ്ചനയാണെന്നും ആക്ഷേപിച്ച് ജില്ലാ കമ്മറ്റിയംഗവും കലാകാരനുമായ ആശ്രമം ചെല്ലപ്പന് തുറന്നകത്തയച്ചു.
ജെഎസ്എസ് രൂപീകരണത്തെത്തുടര്ന്ന് സിപിഎം കേരളത്തില് സംഹാര താണ്ഡവമാണ് ആടിയത്. അരൂര്, ചേര്ത്തല, മാരാരിക്കുളം, കഞ്ഞിക്കുഴി, തണ്ണീര്മുക്കം, ആലപ്പുഴ, കുട്ടനാട്, പുന്നപ്ര പ്രദേശങ്ങളില് ഭീകരമായ അക്രമം അഴിച്ചുവിട്ടു. അഞ്ചുപേരെ കൊലപ്പെടുത്തി. നിരവധി വീടുകള് തല്ലിത്തകര്ത്തു. കയര് ചാപ്രകള് പോലും നശിപ്പിച്ചു. പലരും അക്രമം ഭയന്ന് നാടുവിട്ടു. ചിലര് അക്രമങ്ങള്ക്കിരയായി ഇന്നും ജീവച്ഛവമായി അവശേഷിക്കുന്നു. ഇവരെല്ലാംതന്നെ ഗൗരിയമ്മയ്ക്കുവേണ്ടി ജീവിച്ചവരാണ്. അവരെ മറന്നാണ് ഒരു സുപ്രഭാതത്തില് ഗൗരിയമ്മ സിപിഎമ്മിലേക്ക് മടങ്ങാന് ശ്രമിക്കുന്നതും സിപിഎമ്മിന് അനുകൂലമായി വോട്ടുപിടിക്കുന്നതെന്നും സിപിഎം അക്രമത്തിനിരയായ ചെല്ലപ്പന് പരിതപിക്കുന്നു.
1962ല് കമ്യൂണിസ്റ്റ് പാര്ട്ടി അംഗത്വം ലഭിച്ച താന് 1994ല് ഗൗരിയമ്മയെ പാര്ട്ടിയില്നിന്നും പുറത്താക്കിയതില് പ്രതിഷേധിച്ചി അവരോടൊപ്പം അണിചേരുകയായിരുന്നു. മുഹമ്മയിലെയും മാരിക്കുളത്തെയും ജെഎസ്എസ് രൂപീകരണത്തിന് പ്രധാന പങ്കുവഹിച്ച തന്നെ സിപിഎമ്മുകാര് നടുറോഡിലിട്ട് അക്രമിച്ചു. നട്ടെല്ലുപൊട്ടിയും കിഡ്നിക്കു തകരാര് സംഭവിച്ചും താനിന്ന് അതീവ ദുരിതത്തിലാണ് കഴിയുന്നത്. തന്നേപ്പോലെ സിപിഎമ്മിന്റെ കിരാത വേട്ടയ്ക്കിരയായ ആയിരങ്ങള്ക്ക് കഴിഞ്ഞ 21 വര്ഷം ഒരിക്കലും മറക്കാന് കഴിയില്ല.
പുന്നപ്ര- വയലാര് സമര സേനാനി ഫോര്വേഡ് കരുണാകരന്റെ മകന് ശശിയെ പോസ്റ്ററൊട്ടിച്ചു എന്ന കാരണത്താല് സിപിഎമ്മുകാര് 16 വെട്ടുവെട്ടിക്കൊന്നു. ഗൗരിയമ്മയുടെ പോസ്റ്ററൊട്ടിച്ചു എന്നതായിരുന്നു കുറ്റം. ആ കുടുംബം ഇതോടെ വഴിയാധാരമായി. കൈനടിയില് മകന് സുരേഷ് ജെഎസ്എസ് പ്രവര്ത്തകനായതിന് അച്ഛന് കുമാരനെ തുഴയ്ക്ക് അടിച്ചുകൊന്നു. ഇടുക്കിയില് കുട്ടച്ചനെ കൊലപ്പെടുത്തി. തിരുവനന്തപുരത്ത് ഉദയകുമാറിനെ കൊലചെയ്തു. ഇങ്ങനെ രക്തസാക്ഷികളായവരും അക്രമത്തിനിരയായവരും കള്ളക്കേസില് കുടുക്കപ്പെട്ടവരും നിരവധിയാണ്.
ശ്രീനാരായണ ഗുരുവിനെപ്പോലും അധിക്ഷേപിക്കുന്ന തലത്തിലേക്ക് സിപിഎം എത്തിച്ചേര്ന്നതായും ഈ സാഹചര്യത്തില് സിപിഎമ്മിനെ സഹായിക്കുന്ന നിലപാടില് നിന്നും ഗൗരിയമ്മ പിന്തിരിയണമെന്നും ചെല്ലപ്പന് അഭ്യര്ത്ഥിക്കുന്നു.
പ്രതികരിക്കാൻ ഇവിടെ എഴുതുക: