ബോര്‍ഡുകള്‍ വകവയ്ക്കാതെ പാര്‍ക്കിംഗ് തോന്നിയപോലെ

Friday 6 November 2015 8:21 pm IST

  തിരുവനന്തപുരം: എംജി റോഡില്‍ ഗതാഗതക്കുരുക്കൊഴിവാക്കുന്നതിന്റെ ഭാഗമായി നടപ്പാക്കുന്ന പാര്‍ക്കിംഗ് പരിഷ്‌കാരം ഇന്നലെ ആരംഭിച്ചു. പുളിമൂട്ടില്‍ കളക്ടര്‍ ബിജു പ്രഭാകറും സിറ്റി പോലീസ് കമ്മിഷണര്‍ എച്ച്. വെങ്കിടേഷും ചേര്‍ന്ന് ഉദ്ഘാടനം നിര്‍വ്വഹിച്ചു. ധാരാളം വ്യാപാര സ്ഥാപനങ്ങളും എടിഎം കൗണ്ടറുകളും ഉള്ള ഇവിടെ ഫീസ് ഈടാക്കുന്നതിനെക്കുറിച്ച് വ്യാപാരികള്‍ക്കിടയില്‍ രണ്ടഭിപ്രായമാണുള്ളത്. ഇതിനെതിരെ പ്രതിഷേധവുമായി ചെറുകിട വ്യാപാരികള്‍ രംഗത്തുവന്നിരുന്നു. വന്‍കിട വ്യാപാരികളെ സഹായിക്കാനാണെന്നായിരുന്നു ആരോപണം. എന്നാല്‍ ഇന്നലെ രാവിലെ മുതല്‍ നോ പാര്‍ക്കിംഗ് ബോര്‍ഡുകളും ഇരുചക്രവാഹനത്തിനും നാലുചക്രവാഹനത്തിനും പ്രത്യേകം സ്ഥലങ്ങളാണ് നിര്‍ദേശിച്ചത്. ഇതിനായി പ്രത്യേകം ബോര്‍ഡുകളും സ്ഥാപിച്ചിരുന്നു. എന്നാല്‍ ഈ ബോര്‍ഡുകള്‍ വകവയ്ക്കാതെയുള്ള പാര്‍ക്കിംഗ് നിര്‍ബാധം തുടരുകയാണ്. തുടക്കമെന്ന നിലയില്‍ വാഹന ഉടമകളെ ബോധവത്കരിക്കുകയാണ് കഴിഞ്ഞദിവസം ചെയ്തത്. ഇതിനായി ലഘുലേഖകള്‍ ഓരോരുത്തര്‍ക്കും വിതരണം ചെയ്തു. തെരഞ്ഞെടുപ്പുമായി ബന്ധപ്പെട്ട് പോലീസുകാര്‍ക്ക് ഡ്യൂട്ടി ഉള്ളതിനാല്‍ നാളെമുതല്‍ പാര്‍ക്കിംഗ് ഫീസ് പിരിവ് കര്‍ശനമാക്കാനാണ് തീരുമാനം. കളക്ടറുടെ നേതൃത്വത്തിലുള്ള കോര്‍പ്പറേഷന്‍ അഡ്മിനിട്രേഷന്‍ ഭരണസമിതിയാണ് കഴിഞ്ഞദിവസം എംജി റോഡില്‍ രാവിലെ മുതല്‍ വൈകിട്ടു വരെ പാര്‍ക്കിംഗ് ഫീസ് ഏര്‍പ്പെടുത്താന്‍ തീരുമാനിച്ചത്. രണ്ടു മണിക്കൂര്‍വരെ ഇരു ചക്രവാഹനങ്ങളില്‍ നിന്ന് രണ്ടു രൂപയും നാലുചക്രവാഹനങ്ങളില്‍ നിന്ന് പത്ത് രൂപയും ഈടാക്കാനാണ് അഡ്മിനിട്രേറ്റര്‍ ഭരണസമിതി തീരുമാനം എടുത്തിരിക്കുന്നത്. എംജി റോഡിലെ ഗതാഗതക്കുരുക്ക് ഒഴിവാക്കാനാണ് പാര്‍ക്കിംഗ് ഫീസ് ഏര്‍പ്പെടുത്താനുള്ള നീക്കം. എന്നാല്‍ ഫീസ് കൊടുത്ത് റോഡിനിരുവശവും വാഹനങ്ങള്‍ പാര്‍ക്ക് ചെയ്താല്‍ ഗതാഗതക്കുരുക്കിന് എങ്ങനെ പരിഹാരമുണ്ടാകുമെന്നാണ് വ്യാപാരികളുടെ ചോദ്യം. എംജി റോഡില്‍ പാര്‍ക്കിംഗ് പ്രശ്‌നം രൂക്ഷമായപ്പോള്‍ ഷോപ്പിംഗ് മാളുകള്‍ക്ക് നോട്ടീസ് നല്‍കിയതിന്റെ അടിസ്ഥാനത്തില്‍ അവര്‍ സ്വന്തം ചെലവില്‍ പാര്‍ക്കിംഗ് സൗകര്യം ഏര്‍പ്പെടുത്തിക്കഴിഞ്ഞു. ഈ പ്രദേശത്ത് പോലീസിനെയും നിയോഗിച്ചു. ഇതോടെ ഗതാക്കുരുക്കിന് ഏറെക്കുറെ ശമനമുണ്ടായി. ചെറുകിട വ്യാപാരികളുടെ കച്ചവടത്തിന് പാക്കിംഗ് പ്രതികൂലമാകുമെതിനാലാണ് പരാതിയുമായി വ്യപാരികള്‍ നേരത്തെ നഗരസഭയെ സമീപിച്ചത്. ഇതിനെതിരെ കളക്ടര്‍ രംഗത്ത് വന്നെങ്കിലും നഗരസഭ തീരുമാനം മാറ്റാന്‍ തയ്യാറായിരുന്നില്ല. ഇതിന്റെ പ്രതികാരമെന്നോണമാണ് അധികാരം കയ്യില്‍ കിട്ടിയപ്പോള്‍ തിടുക്കത്തില്‍ പാര്‍ക്കംഗ് ഫീ ഏര്‍പ്പെടുത്താനുള്ള നീക്കം. പുതിയ കൗണ്‍സില്‍ വരാന്‍ ദിവസങ്ങള്‍ മാത്രം ബാക്കി നില്‍ക്കെ നയപരമായുള്ള ഇത്തരം തീരുമാനം എടുത്തതില്‍ രാഷ്ട്രീയ പാര്‍ട്ടികളും നഗരസഭാ ജീവനക്കാരും അമര്‍ഷത്തിലാണ്. എംജി റോഡില്‍ നിരവധി പൊതുമേഖല ബാങ്കുകള്‍ പ്രവര്‍ത്തിക്കുന്നുണ്ട്. ബാങ്കിലും മറ്റുമെത്തുന്ന വൃദ്ധര്‍ ഉള്‍പ്പെടെ നിരവധി പേരെ പുതിയ തീരുമാനം സാരമായി ബാധിക്കും.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.