കണ്ണൂര്: സാംസ്കാരിക വകുപ്പിന്റെ ആഭിമുഖ്യത്തില് ഫെബ്രുവരി മാസത്തില് മുംബൈയില് സംഘടിപ്പിച്ച കേരള പൈതൃകോല്സവത്തില് വിവിധ മല്സരങ്ങളില് വിജയികളായ വിദ്യാര്ത്ഥികളുടെ പൈതൃക പഠനയാത്രക്ക് ഇന്ന് കണ്ണൂരില് തുടക്കമാകും. മറുനാടന് മലയാളികളുടെ പുതുതലമുറയ്ക്ക് കേരളത്തിന്റെ പൈതൃകം പരിചയപ്പെടുത്തുന്നതിനുള്ള യാത്ര സംസ്ഥാന പുരാവസ്തു-പുരാരേഖ വകുപ്പുകളുടെ നേതൃത്വത്തിലാണ് നടത്തുന്നത്.
ഇന്ന് ഉച്ചയോടെ കണ്ണൂരിലെത്തുന്ന വിദ്യാര്ത്ഥികള് ജില്ലയില് കണ്ണൂര് കോട്ട, അറക്കല് മ്യൂസിയം, പറശ്ശിനിക്കടവ് എന്നീ സ്ഥലങ്ങള് സന്ദര്ശിക്കും. തുടര്ന്ന് കൊട്ടിയൂര് വഴി വയനാട് ജില്ലയിലെത്തി മാനന്തവാടി, പഴശ്ശി കുടീരം, സുല്ത്താന്ബത്തേരി ജൈനക്ഷേത്രം, അമ്പലവയല് മ്യൂസിയം, എടക്കല് ഗുഹ തുടങ്ങിയ ഇടങ്ങള് കാണും. തുടര്ന്ന് പാലക്കാട് കോട്ട, കേരള കലാമണ്ഡലം, തൃശ്ശൂര് ശക്തന് തമ്പുരാന് കൊട്ടാരം, ചുവര്ചിത്ര കലാകേന്ദ്രം, മുസിരിസ് പൈതൃക പ്രദേശങ്ങള്, ചേരമാന് മസ്ജിദ്, ചേന്ദമംഗലം സിനഗോഗ്, മട്ടാഞ്ചേരി, തൃപ്പൂണിത്തുറ ഹില് പാലസ്, ചേര്ത്തല കടക്കരപ്പള്ളി, തൈക്കല് കപ്പല് ഉദ്ഖനന സ്ഥലം, തകഴി മ്യൂസിയം, കരുമാടിക്കുട്ടന്, കായംകുളം കൃഷ്ണപുരം കൊട്ടാരം എന്നീ സ്ഥലങ്ങള് പിന്നിട്ട് 12 ന് തിരുവനന്തപുരത്തെത്തും. തിരുവനന്തപുരം ജില്ലയില് മടവൂര്പ്പാറ, മ്യൂസിയം, മൃഗശാല, ശാസ്ത്രസാങ്കേതിക മ്യൂസിയം, ശ്രീപത്മനാഭ സ്വാമി ക്ഷേത്രം, ശംഖുമുഖം, കോവളം എന്നിവിടങ്ങള് കൂടി കണ്ട് 13 ന് മുംബൈയിലേക്ക് മടങ്ങും. തൃപ്പൂണിത്തുറ ഹില് പാലസില് സംഘത്തിനായി സെന്റര് ഫോര് ഹെറിറ്റേജ് സ്റ്റഡീസിന്റെ ആഭിമുഖ്യത്തില് കേരളീയ നാടന്കലകളും സാംസ്കാരിക പരിപാടികളും സംഘടിപ്പിക്കും.
പ്രതികരിക്കാൻ ഇവിടെ എഴുതുക: