സൗഭാഗ്യങ്ങള്ക്ക് പൂര്ണ്ണത വേണമെന്ന് ആഗ്രഹിക്കാത്ത മനുഷ്യരില്ല. എന്താണ് അതിനുള്ള ഉത്തമ മാര്ഗ്ഗം? ഉത്തരം ജ്യോതിഷത്തില് ഒന്നേയുള്ളൂ. ഉച്ചനായഗ്രഹത്തെ വശീകരിക്കുക (പ്രീതിപ്പെടുത്തുക). അതിന് ഗ്രഹശ്രേഷ്ഠന്മാര് എന്ത് ഇഷ്ടപ്പെടുന്നോ അത് അര്പ്പിക്കുക. നവഗ്രഹപ്രീതി പ്രതീക്ഷിച്ച് നാം ഏവരും പലവിധ പരിഹാരങ്ങളും ചെയ്യാറുണ്ട്. എങ്കിലും എല്ലാ മതസ്ഥര്ക്കും ഒരുപോലെ സ്വീകാര്യമായ മാര്ഗ്ഗമാണ് രത്നധാരണം.
ചിലര്ക്കെങ്കിലും രത്നധാരണം എന്നു കേള്ക്കുമ്പോള് മുഷിച്ചില് ഉണ്ടാവുക സാധാരണം. അതിനുള്ള പ്രധാന കാരണം, രത്നങ്ങളുടെ വിലയും അതിന്റെ ശാസ്ത്രീയവശം മനസ്സിലാക്കാത്തതുമാണ്. എന്നാല് രത്നങ്ങളെക്കുറിച്ച് കൂടുതല് അറിയുമ്പോള് നവരത്നങ്ങള് ഒരു വ്യക്തിക്ക് ലഭിക്കാനും ഒരു യോഗം വേണമെന്ന് മനസ്സിലാകും.
കൃത്യമായിപ്പറഞ്ഞാല്, ഒരുവന് രത്നം കൈവശം വന്നുചേരണമെങ്കില് അയാളുടെ ഗ്രഹനിലയില് ഗ്രഹങ്ങള് നീചദൃഷ്ടി കൂടാതെ ഉത്തമരാശികളില് നില്ക്കണം. ഇങ്ങനെയുള്ള ഗ്രഹങ്ങളുടെ അപഹാര, ചാരഫലങ്ങളുടെ കാലത്ത് രത്നങ്ങള് വന്നുചേരാം.
ഭാരതീയരെ അപേക്ഷിച്ച് വിദേശികള് രത്നധാരണത്തില് മുന്പിലാണ്. യഥാസമയം ആസ്ട്രോകണ്സള്ട്ടിന്റെ സഹായത്തോടെ അവര് അതിന്റെ മേന്മയും എക്സ്പയറി ഡേറ്റും മനസിലാക്കുന്നു. അതിന്റെ മേന്മയും ഉന്നതിയും അവര്ക്കുണ്ടുതാനും. രത്നധാരണത്തില് ഇന്ന് ഗണ്യമായ നിലയില് ചൂഷണം നടക്കുന്ന ഒരു സ്ഥിതിവിശേഷമാണ് ഉള്ളത്. ജ്യോതിഷികള്ക്ക് ഇടയില്ത്തന്നെ രത്നധാരണ വിധിയെക്കുറിച്ച് ഭിന്ന അഭിപ്രായങ്ങളുണ്ട്.
ചിലര് ജന്മനക്ഷത്രക്കല്ലുകള് ധരിക്കാന് ആവശ്യപ്പെടുമ്പോള് മറ്റു ചിലര് ലഗ്നാധിപന്റെ കല്ലുകള് ഉപദേശിക്കുന്നു. വേറെ ചിലരാകട്ടെ, ജനനദിവസവും മാസവും അടിസ്ഥാനമാക്കി രത്നക്കല്ലുകള് നിര്ദ്ദേശിക്കുന്നു. മുന്പിന് നോക്കാതെ ഇത്തരത്തിലുള്ള നിര്ദ്ദേശങ്ങള് അസ്ഥാനത്ത് ആവുകയും ചെയ്യും.
രത്നധാരണംകൊണ്ട് മറ്റുളളവര്ക്ക് മെച്ചം ഉണ്ടാവണമെന്ന് ആഗ്രഹിക്കുന്ന ജ്യോതിഷികള്, ജാതകന്റെ ഗ്രഹനില, നവാംശകം, ഉച്ച നീചരാശികള്, മൗഢ്യം, ദൃഷ്ടിദോഷം, ഗുണം എന്നിവ ഗഹനമായി പഠിച്ച്, ഏറ്റവും അനുകൂലനും ഉച്ചനുമായ ഗ്രഹം ഏതെന്ന് ഒരു നിഗമനത്തിലെത്തിച്ചേര്ന്നശേഷം, അനുകൂലനായ ഗ്രഹത്തിന്റെ രത്നം ഉപദേശിക്കും. ഇങ്ങനെ ചെയ്യും വഴി, ചാരഫലത്തിന്റെ സമയത്തും ദശാ അപഹാരത്തിന്റെ സമയത്തും ജാതകന്റെ ജീവിതം മെച്ചപ്പെടുകയും ക്രമേണ പച്ചപിടിക്കുകയും ചെയ്യും.
നേരെമറിച്ച്, ദോഷകാരകന്റെയും നീചത്തില് നില്ക്കുന്ന ഗ്രഹത്തിന്റെയും രത്നധാരണം നടത്താന് ആവശ്യപ്പെട്ടാല് അതാതു ഗ്രഹത്തിന്റെ, ദശാചാരഫലങ്ങള് ജാതകന് പ്രതികൂലമായി ഭവിക്കുന്നതാണ്. ഒപ്പം ജ്യോതിഷിയിലും ജ്യോതിഷത്തിലും അവിശ്വാസവും പുച്ഛവും ഉണ്ടാകും. സര്വ്വോപരി പണനഷ്ടവും.
പ്രതികരിക്കാൻ ഇവിടെ എഴുതുക: