കോട്ടയം: റെയില്വേ സ്റ്റേഷനിലേക്കുള്ള റോഡുകള് തകര്ന്നു റയില്വേ സ്റ്റേഷനിലേക്കുള്ള പ്രധാന റോഡുകളായ റബ്ബര് ബോര്ഡ് ഗുഡ്ഷെഡ് റോഡും, റബ്ബര് ബോര്ഡ് റെയില്വേ സ്റ്റേഷന് റോഡുമാണ് പൊളിഞ്ഞ് കിടന്ന് കാല്നടയാത്രക്കാര്ക്ക് പോലും നടക്കാന് സാധിക്കാന് പറ്റാത്തക്ക രീതിയിലായിരിക്കുന്നത്. ദിനം പ്രതി നിരവധി വിദ്യാര്ത്ഥികളും കാല്നടയാത്രക്കാരും ഇരുചക്രവാഹനക്കാരുമാണ് ഇതുവഴി സഞ്ചരിക്കുന്നത്. നഗരത്തില് നിന്നും റയില്വേ സ്റ്റേഷനിലേക്ക് വരുന്നതിനായുള്ള ഇടവഴികളാണിത്. ട്രെയിനെ ആശ്രയിച്ച് യാത്ര ചെയ്യുന്നവര് കൂടുതലായും ഈ വഴിയാണ് യാത്ര ചെയ്യുന്നത്. അതിനാല് ഇവിടെ ഒട്ടു മിക്ക സമയങ്ങളിലും തിരക്കായിരിക്കും. ഈ റോഡുകള് പൊട്ടിപ്പൊളിഞ്ഞു കിടക്കുന്നതിനാല് ദിനം പ്രതി നിരവധി അപകടങ്ങളാണ് ഇവിടെ നടക്കുന്നത്. കൂടുതലായും ഇരുചക്രവാഹനക്കാരാണ് ഇവിടെ അപകടത്തില് പെടുന്നത്. കുടുംബമായും മറ്റും വരുന്ന നിരവധിപേര്ക്ക് റോഡിലെ കുഴിയില് അകപ്പെട്ട് അപകടം സംഭവിച്ചിട്ടുണ്ട്. മാസങ്ങളായി തകര്ന്നു കിടക്കുന്ന റോഡുകള് നന്നാക്കുന്നതിനായി ഇവിടുത്തെ ജനങ്ങള് ഒത്തിരി തവണ അധികൃതര്ക്ക് പരാതി നല്കിയതാണ്. എന്നിട്ടും ജനപ്രതിനിധികളോ മറ്റധികൃതരോ റോഡ് നന്നാക്കാന് തയ്യാറായിട്ടില്ലെന്നാണ് നാട്ടുകാര് പറയുന്നത്.
ശബരിമല സീസണായി കഴിഞ്ഞാല് ജില്ലയിലെ റോഡുകള് എല്ലാം നന്നാക്കുമെന്നാണ് ഗതാഗതവകുപ്പ് മന്ത്രി തിരുവഞ്ചൂര് രാധാകൃഷ്ണന് പറഞ്ഞിരുന്നത്. ശബരിമല സീസണ് തുടങ്ങിയിട്ടും റെയില്വേ സ്റ്റേഷനിലേക്ക് വരുന്ന ഈ റോഡുകളുടെ പണി ആരംഭിച്ചിട്ടില്ല. ഇത് മൂലം മറ്റുള്ള സംസ്ഥാനങ്ങളില് നിന്നും ജില്ലകളില് നിന്നും എത്തുന്ന ഭക്തന്മാരാണ് കഷ്ടതയനുഭവിക്കുന്നത്. ഇനിയും റോഡ് നന്നാക്കാന് തയ്യാറായില്ലെങ്കില് പ്രതിഷേധവുമായി രംഗത്ത് വരുമെന്നാണ് നാട്ടുകാര് പറയുന്നത്.
പ്രതികരിക്കാൻ ഇവിടെ എഴുതുക: