കോട്ടയം: കാര്ഷിക മേഖലയ്ക്ക് പ്രധാന്യം നല്കുന്ന വികസന നയമാണ് ലക്ഷ്യമിടുന്നതെന്ന് ജില്ല പഞ്ചായത്ത് പ്രസിഡന്റായി തിരഞ്ഞെടുക്കപ്പെട്ട ജോഷി ഫിലിപ്പ് പറഞ്ഞു. സത്യപ്രതിജ്ഞാ ചടങ്ങിനു ശേഷം ജില്ലാ പഞ്ചായത്ത് കോണ്ഫറന്സ് ഹാളില് ഗ്രാമവികസന-ഇന്ഫര്മേഷന് പബ്ലിക് റിലേഷന്സ്- സാംസ്കാരിക വകുപ്പു മന്ത്രി കെ.സി. ജോസഫിന്റെ സാന്നിദ്ധ്യത്തില് ചേര്ന്ന അനുമോദന യോഗത്തിലെ മറുപടി പ്രസംഗത്തിലാണ് അദ്ദേഹം ഇതു പറഞ്ഞത്. അടിസ്ഥാന സൗകര്യ വികസനത്തിലും വിദ്യാഭ്യാസ രംഗത്തും മുന് വര്ഷങ്ങളില് ജില്ല കുതിച്ചു ചാട്ടം നടത്തിയിട്ടുണ്ട്. ജില്ലയുടെ പ്രധാന സാമ്പത്തിക അടിത്തറയായ കാര്ഷിക മേഖലയെ ശക്തിപ്പെടുത്തുന്ന പ്രവര്ത്തനങ്ങള്ക്ക് ജില്ലാ പഞ്ചായത്ത് ഊന്നല് നല്കും. ദുര്ബല വിഭാഗങ്ങള്ക്ക് പ്രത്യേക പരിഗണന നല്കും. അവരുടെ ജീവിത നിലവാരം ഉയര്ത്തുന്നതിന് പദ്ധതികള് ആവിഷ്ക്കരിക്കും. ഉദ്യോഗസ്ഥരുടെയും ജനപ്രതിനിധികളുടെയും കൂട്ടായ പ്രവര്ത്തനത്തിലൂടെ ജില്ലയുടെ വികസന നേട്ടം കൈവരിക്കാനാകും- അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: