ശ്രീരാമന്റെ വനവാസകാലയളവിനെപ്പറ്റി വാല്മീകിരാമായണത്തില് വ്യക്തമായ പരാമര്ശങ്ങളില്ല. ശ്രീരാമന് വനവാസത്തിനു പുറപ്പെട്ടപ്പോള് രാമന് ഇരുപത്തേഴു വയസ്സും സീതയ്ക്ക് പതിനെട്ടും. (രാമന്റെ വിവാഹം പതിനഞ്ചാം വയസ്സില്. സീതയ്ക്ക് അന്ന് വയസ്സ് ആറ്) അതുകഴിഞ്ഞ് പന്ത്രണ്ടുവര്ഷം സീതയോടൊപ്പം അയോദ്ധ്യയില് സുഖവാസം.
പിന്നീടാണ് കാട്ടിലേക്കുള്ള യാത്ര തുടങ്ങുന്നത്. ഭരതനു കൊടുത്ത വാക്കനുസരിച്ച് കൃത്യം പതിന്നാലു വര്ഷം തികഞ്ഞനാള് മടങ്ങിയെത്തി. ഈ പതിന്നാലു വര്ഷത്തില് പതിമൂന്നുവര്ഷം വനവാസം എന്ന് എഴുത്തച്ഛന് പറയുന്നു. അയോദ്ധ്യയില്നിന്നും പുറപ്പെട്ട് നാലാംനാള് ശൃംഗിവേരപുരത്തിലെത്തി. അഞ്ചാംനാള് ഗംഗ കടന്നു. ഭരദ്വാജന്, അത്രി മുതലായ മഹര്ഷിമാരുടെ ആശ്രമങ്ങളിലും ചിത്രകൂടത്തിലുമായി ഒരുവര്ഷം.
അതുകഴിഞ്ഞ് ദണ്ഡകാരണ്യത്തിലുമെത്തി. ശരഭംഗന്, സുതീഷ്ണന് തുടങ്ങിയവരുടെ ആശ്രമങ്ങളിലും മറ്റു മഹര്ഷിമാരുടെ ആശ്രമങ്ങളിലുമായി പത്തുവര്ഷം വസിച്ചുവെന്ന് വാല്മീകി പറയുന്നു.
തഥാ സംവസതസ്തസ്യ
മുനീനാമാശ്രമേഷു വൈ-
രമതശ്ചാനുകൂല്യേന
യയുസ്സംവത്സരാ ദശ
അതുകഴിഞ്ഞാണ് അഗസ്ത്യനെ കാണുന്നതും പഞ്ചവടിയില് താമസമാക്കുന്നതും. വനവാസം പതിമൂന്നുവര്ഷം തികയുന്ന കാലത്താണ് സീതാപഹരണം. അപ്പോള് പഞ്ചവടിയില് ഏതാണ്ട് രണ്ടുവര്ഷം ശാന്തജീവിതം നയിച്ചുവെന്നൂഹിക്കാം.
പ്രതികരിക്കാൻ ഇവിടെ എഴുതുക: