കാര്ത്തികപ്പള്ളി: പുഴുക്കള് വീട്ടുകാരുടെ ഉറക്കം കെടുത്തുന്നു. ഹരിപ്പാട് നഗരസഭ 22-ാം വാര്ഡില് കാര്ത്തികപ്പള്ളി വെട്ടുവേനി വാതല്ലൂര് കോയിക്കലിന് കിഴക്ക് ഭാഗത്തുള്ള വീട്ടുകാരാണ് പുഴുക്കളെ കൊണ്ട് പൊറുതിമുട്ടിയിരിക്കുന്നത്. രോമങ്ങള് നിറഞ്ഞ ഇളംചുവപ്പും വെളുപ്പും കറുപ്പും നിറത്തിലുള്ള പുഴുക്കള് പ്രദേശമാകെ നിറഞ്ഞതോടെ വഴിനടക്കാന് പോലും കഴിയാത്ത അവസ്ഥയിലാണ് വീട്ടുകാര്. ശനിയാഴ്ച മുതലാണ് പ്രദേശത്ത് പുഴുക്കളെ കണ്ടുതുടങ്ങിയത്. ഞായറാഴ്ച ആയതോടെ ചെടികളിലും മരങ്ങളിലും നടവഴിയിലുമെല്ലാം പുഴുക്കളെകൊണ്ട് നിറഞ്ഞു.
വെള്ളം കെട്ടിനില്ക്കുന്ന ഭാഗത്ത് കിളിച്ചു നില്ക്കുന്ന ചെടികളിലാണ് പുഴുക്കള് ഏറെയുള്ളത്. അഞ്ച് സെന്റീമീറ്ററോളം നീളമുള്ള പുഴുക്കള് ഇലകളാണ് ഭക്ഷിക്കുന്നത്. ഒരോസ്ഥലത്തും ഇലകള് തീരുന്നതോടെ അടുത്ത സ്ഥലത്തേക്ക് നീങ്ങും. പുഴുക്കള് ശരീരത്തില് മുട്ടിയാല് അസഹ്യമായ ചൊറിച്ചില് അനുഭവപ്പെടുമെന്ന് നാട്ടുകാര് പറയുന്നു. പുഴുവിനെ സ്പര്ശിക്കാതെ നടക്കാന് കഴിയാത്ത അവസ്ഥയില് പ്രദേശവാസികള് വിഷമത്തിലാണ്. എറെ സാഹസപ്പെട്ടാണ് ഇപ്പോള് യാത്ര നടത്തുന്നത്. വീട്ടിനുള്ളിലേക്ക് പുഴുക്കള് കയറി തുടങ്ങി.
പുഴുക്കളെ കാണാന് കഴിയാത്തതിനാല് രാത്രിയില് പുറത്തിറങ്ങാറില്ലെന്ന് വീട്ടുകാര് പറയുന്നു. തീകത്തിച്ചും മണ്ണെണ്ണ ഒഴിച്ചും പുഴുവിനെ നശിപ്പിക്കാന് ശ്രമിക്കുന്നുണ്ടെങ്കിലും ശല്യത്തിനു കുറവില്ല. അധികാരികള് അടിയന്തിര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
പ്രതികരിക്കാൻ ഇവിടെ എഴുതുക: