എരുമേലി: വിവിധ പത്രങ്ങള് വിതരണത്തിന് കൊണ്ടുവരുന്ന വാഹനം അപകടത്തില്പെട്ട് ഓട്ടോ ഡ്രൈവര്ക്ക് ഗുരുതരമായി പരിക്കേറ്റു.
കാഞ്ഞിരപ്പള്ളിക്ക് പോയ ഓട്ടോയില് ലോറിയിടിച്ച് ഡ്രൈവര്ക്ക് ഗുരുതരമായി പരിക്കേറ്റത്.കാല്മുട്ട് തകര്ന്ന് ഓട്ടോയില് അകപ്പെട്ട ഡ്രൈവറെ ആശുപത്രിയിലെത്തിക്കാന് വാഹനവുമായി എത്താമെന്നു പറഞ്ഞ് വിശ്വസിപ്പിച്ച് ലോറിയുടെ ഡ്രൈവര് ലോറിയുമായി സ്ഥലം വിട്ടു.തുടര്ന്ന് പോലീസ് എത്തിയാണ് ഓട്ടോ ഡ്രൈവറെ ആശുപത്രിയിലെത്തിച്ചത്.
തിങ്കളാഴ്ച പുലര്ച്ചെ 5.30ന് കാഞ്ഞിരപ്പള്ളി -എരുമേലി പാതയില് കൊരട്ടി മഹാദേവക്ഷേത്രത്തിന് മുന്പിലുള്ള വളവിലാണ് അപകടം. അപകടത്തില് പരിക്കേറ്റ എരുമേലി നേര്ച്ചപ്പാറ കണ്ടന്ങ്കരിയില് സണ്ണിയെ (45)കാഞ്ഞിരപ്പള്ളി ജനറല് ആശുപത്രിയിലും പിന്നീട് കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിച്ചു.
സണ്ണിയുടെ വലതുകാല്മുട്ട് ശസ്ത്രക്രിയയ്ക്ക് വിധേയമാക്കി.പുലര്ച്ചെ ഓട്ടോയില് 26 ാം മൈലില് നിന്നും പത്രം എടുത്ത് എരുമേലി മേഖലയിലേയ്ക്ക് എത്തിക്കുന്നതിനായി പോകും വഴി അമിതവേഗതയില് എതിര്ദിശയില് നിന്നും എത്തിയ ലോറി ഇടിക്കുകയായിരുന്നു. അപകടത്തില് ഓട്ടോറിക്ഷ പൂര്ണമായും തകര്ന്നു. സംഭവം നടന്നയുടന് സണ്ണി തന്നെ എരുമേലി പോലീസിനെ ഫോണില് വിവരമറിയച്ചു.സ്ഥലത്തെത്തിയ പോലീസ് ആംബുലന്സ് വരുത്തി കാഞ്ഞിരപ്പള്ളി ജനറല് ആശുപത്രിയില് എത്തിക്കുകയായിരുന്നു.
പൊന്കുന്നം: പാലാ-പൊന്കുന്നം റോഡില് ശബരിമല തീര്ത്ഥാടകര് സഞ്ചരിച്ച കാര് നിയന്ത്രണം വിട്ട് കാല്നടയാത്രക്കാരായ ഇതരസംസ്ഥാനത്തൊഴികളെ ഇടിച്ചുതെറിപ്പിച്ചു.
മൂന്നു കാല്നടയാത്രക്കാര്ക്കും കാറിന്റെ ഡ്രൈവറായ തീര്ത്ഥാടകനും സാരമായി പരിക്കേറ്റു. ഗുരുതരമായി പരിക്കേറ്റ ബംഗാള് കൊല്ക്കത്ത സ്വദേശികളായ നസറുദീന്(29), അംജാദ്(37), അജ്മല് (30) എന്നിവരെ കോട്ടയം മെഡിക്കല് കോളജ് ആശുപത്രിയില് പ്രവേശിപ്പിച്ചു. കാര് ഡ്രൈവര് തൊടുപുഴ ഉടുമ്പന്നൂര് പുളുവേലില് വീട്ടില് റ്റി.എം. ചന്ദ്രബോസിനെ(49) പാലായിലെ ജനറല് ആശുപത്രിയില് പ്രവേശിപ്പിച്ചു. മൂന്നാര് ഗ്രേഡ് എസ്ഐ ആണു ചന്ദ്രബോസ്. കാറിലുണ്ടായിരുന്ന രണ്ടു കുട്ടികള് പരിക്കേല്ക്കാതെ രക്ഷപ്പെട്ടു.
പാലാ-പൊന്കുന്നം റോഡില് എലിക്കുളം അഞ്ചാം മൈലില് ഇന്നലെ രാവിലെ 8.45നായിരുന്നു അപകടം. തൊടുപുഴയില് നിന്നു ശബരിമലയിലേക്കു പോയ തീര്ത്ഥാടകരുടെ കാറാണ് അപകടത്തില്പ്പെട്ടത്. ബസില് നിന്നിറങ്ങി പണിസ്ഥലത്തേക്കു നടന്നു പോവുകയായിരുന്നു തൊഴിലാളികള്. കാര് പിന്നില് നിന്ന് ഇടിച്ചുവീഴ്ത്തിയ ശേഷം 20 മീറ്ററോളം നിരക്കിക്കൊണ്ടു പോയി.
കഴിഞ്ഞ ദിവസം ഈ ഭാഗത്ത് ബൈക്ക് അപകടത്തില്പ്പെട്ടപ്പോള് രക്ഷാപ്രവര്ത്തനത്തിന് മുന്നിട്ടിറങ്ങിയത് ഇന്നലെ അപകടത്തില്പ്പെട്ട ഇതരസംസ്ഥാനത്തൊഴിലാളികളായിരുന്നു. സ്ഥലത്തെത്തിയ പൊന്കുന്നം പോലീസ് മേല്നടപടികള് സ്വീകരിച്ചു.
പ്രതികരിക്കാൻ ഇവിടെ എഴുതുക: