കോഴിക്കോട്: കോഴിക്കോട് നഗരത്തെ ആവേശത്തിലാറാടിച്ച അന്പത്തിയൊന്പതാമത് സംസ്ഥാന സ്കൂള് അത്ലറ്റിക് മീറ്റിലെ ഓവറോള് കിരീടം എറണാകുളം നിലനിര്ത്തി. 25 സ്വര്ണ്ണവും 28 വെള്ളിയും 18 വെങ്കലവുമടക്കം 241 പോയിന്റ് എറണാകുളം നേടി. തുടര്ച്ചയായ മൂന്നാം തവണയാണ് എറണാകുളം കൗമാര കായികമേളയില് കിരീടം ചൂടുന്നത്. 24 സ്വര്ണ്ണവും 23 വെള്ളിയും 21 വെങ്കലവമടക്കം 225 പോയിന്റ് നേടിയ പാലക്കാട് രണ്ടാം സ്ഥാനത്ത്. മൂന്നാമത് ആതിഥേയരായ കോഴിക്കോട്. 16 സ്വര്ണ്ണവും 9 വെള്ളിയും 9 വെങ്കലവുമടക്കം 130 പോയിന്റ്.
അതേസമയം കഴിഞ്ഞ വര്ഷത്തെ അപേക്ഷിച്ച് മെഡല് വേട്ടയിലും പോയിന്റുകളിലും എറണാകുളത്തിന് കനത്ത ഇടിവ് സംഭവിച്ചു. കഴിഞ്ഞവര്ഷം 33 സ്വര്ണ്ണവും 28 വെള്ളിയും 20 വെങ്കലവുമായിരുന്നു എറണാകുളം നേടിയിരുന്നത്. ഇത്തവണ 9 സ്വര്ണ്ണത്തിന്റെയും 10 വെള്ളിയുടെയും 7 വെങ്കലത്തിന്റെയും കുറവാണ് അവര്ക്കുണ്ടായത്. കഴിഞ്ഞ വര്ഷം 290 പോയിന്റായിരുന്നു എറണാകുളം നേടിയത്. എന്നാല് ഇത്തവണയും രണ്ടാം സ്ഥാനം നേടിയ പാലക്കാട് മെഡല് നേട്ടത്തില് വന് വര്ദ്ധനവുണ്ടാക്കുകയും ചെയ്തു. കഴിഞ്ഞ വര്ഷം നേടിയ 15 സ്വര്ണ്ണത്തിന് പകരം ഇത്തവണ 24 സ്വര്ണ്ണമാണ് അവര്’നേടിയത്. കഴിഞ്ഞ വര്ഷം 190 പോയിന്റ് നേടിയ പാലക്കാട് ജില്ല ഇത്തവണ 35 പോയിന്റ് കൂടുതല് നേടുകയും ചെയ്തു. കഴിഞ്ഞ വര്ഷത്തെ ചാമ്പ്യന് സ്കൂളായ സെന്റ് ജോര്ജിന്റെ ദയനീയമായ പ്രകടനമാണ് എറണാകുളത്തിന് കിരീടം നിലനിര്ത്താനായെങ്കിലും മെഡലുകളുടെ എണ്ണത്തില് തിരിച്ചടി നേരിടാന് കാരണം. കഴിഞ്ഞ വര്ഷത്തെപ്പോലെ ഇത്തവണയും 16 സ്വര്ണ്ണം നേടിയാണ് കോഴിക്കോട് കരുത്തുതെളിയിച്ചത്.
എറണാകുളം ജില്ലയിലെ കോതമംഗലം മാര് ബേസില് എച്ച്എസ്എസ് ചാമ്പ്യന് സ്കൂള് പട്ടം മൂന്നുവര്ഷത്തിനുശേഷം തിരിച്ചുപിടിച്ചു. 2012-ല് കൈവിട്ട കിരീടമാണ് ഇത്തവണ അവര് തിരിച്ചുപിടിച്ചത്. 9 സ്വര്ണ്ണവും 13 വെള്ളിയം 7 വെങ്കലവുമടക്കം 91 പോയിന്റ് നേടിയ മാര്ബേസില് പാലക്കാട് പറളി സ്കൂളിന്റെ കനത്ത വെല്ലുവിളി അതിജീവിച്ചാണ് കിരീടം നേടിയത്. 12 സ്വര്ണ്ണവും 6 വെള്ളിയും 8 വെങ്കലവുമടക്കം 86 പോയിന്റാണ് പറളി സ്കൂള് വാരിക്കൂട്ടിയത്. 6 സ്വര്ണ്ണവും 10 വെള്ളിയും 7 വെങ്കലവുമടക്കം 67 പോയിന്റ് നേടിയ കല്ലടി സ്കൂള് മൂന്നാം സ്ഥാനത്തെത്തിയപ്പോള് 7 സ്വര്ണ്ണവും 3 വെള്ളിയും മൂന്ന് വെങ്കലവുമടക്കം 47 പോയിന്റുമായി എറണാകും ജില്ലയിലെ മാതിരപ്പിള്ളി ഗവ.വിഎച്ച്എസ്എസ് നാലാമത്തെി. 7 സ്വര്ണ്ണവും മൂന്ന് വെള്ളിയും നേടിയ ഉഷ സ്കൂളിന്റെ കരുത്തിലിറങ്ങിയ പൂവമ്പായി എഎംഎച്ച്എസാണ് നാലാമത്. എന്നാല് നിലവിലെ ചാമ്പ്യന്മാരായ കോതമംഗലം സെന്റ് ജോര്ജ് അതിദയനീയമായി ആറാം സ്ഥാനത്തേക്ക് പിന്തള്ളപ്പെട്ടു.
പ്രതികരിക്കാൻ ഇവിടെ എഴുതുക: