കണ്ണൂര്: കുടുംബശ്രീ റേഡിയോ പ്രക്ഷേപണ പരമ്പരയുടെ ഒന്നാം വാര്ഷികാഘോഷത്തോടനുബന്ധിച്ച് കുടുംബശ്രീ ജില്ലാമിഷനും കണ്ണൂര് ആകാശവാണിയും സംയുക്തമായി സംഘടിപ്പിക്കുന്ന കുടുംബശ്രീ റേഡിയോ വിജ്ഞാനോത്സവം 201516 ജില്ലയിലെ 5 കേന്ദ്രങ്ങളില് തുടക്കമായി. ജില്ലാതല ഉദ്ഘാടനം കണ്ണൂര് ഗവ.വൊക്കേഷണല് ഹയര്സെക്കന്ററി സ്കൂളില് കണ്ണൂര് മുന്സിപ്പല് കോര്പ്പറേഷന് സ്റ്റാന്ഡിംഗ് കമ്മിറ്റി ചെയര്മാന് അഡ്വ.പി.ഇന്ദിരയുടെ അദ്ധ്യക്ഷതയില് ജില്ലാപഞ്ചായത്ത് വൈസ് പ്രസിഡന്റ് പി.പി.ദിവ്യ നിര്വ്വഹിച്ചു. കണ്ണൂര് ആകാശവാണി നിലയം പ്രോഗ്രാം ഹെഡ് കെ.ബാലചന്ദ്രന് പദ്ധതി വിശദീകരണം നടത്തി. കുടുംബശ്രീ ജില്ലാമിഷന് കോ-ഓര്ഡിനേറ്റര് എം.വി.പ്രേമരാജന്, ഡിടിപിസി സെക്രട്ടറി സജിവര്ഗീസ്, പ്രസ്സ് ക്ലബ് പ്രസിഡന്റ് െ്രക.ടി.ശശി എന്നിവര് പ്രസംഗിച്ചു.
ജില്ലയിലെ പ്രാദേശിക വികസനത്തിന് ഊര്ജം പകരുന്ന കുടുംബശ്രീയുടെ വ്യത്യസ്തങ്ങളായ പ്രവര്ത്തനങ്ങള്ക്കൊപ്പം കുടുംബശ്രീയെ സംബന്ധിച്ച് മറ്റെല്ലാ വിവരങ്ങളും നേരിട്ടും പൊതുസമൂഹത്തെ അറിയിക്കുക എന്നതാണ് വിജ്ഞാനോത്സവത്തിന്റെ മുഖ്യലക്ഷ്യം.
ജില്ലയിലെ വിവിധ കേന്ദ്രങ്ങളില് നടന്ന വിജ്ഞാനോത്സവ മേഖലതല പരീക്ഷയുടെ ഔപചാരിക ഉദ്ഘാടനം നഗരസഭാ ചെയര്മാന്മാരായ റംല ടീച്ചര്(പാനൂര്), എം.സുകുമാരന് (കൂത്തുപറമ്പ്), പി.പി.രാഘവന് (ശ്രീകണ്ഠാപുരം), അള്ളാംകുളം മുഹമ്മദ് (തളിപ്പറമ്പ്), എന്നിവര് നിര്വ്വഹിച്ചു. ചടങ്ങില് ബ്ലോക്ക് പഞ്ചായത്ത് പ്രസിഡന്റുമാരായ കെ.ഇ.കുഞ്ഞബ്ദുള്ള, എ.അശോകന്, വസന്തകുമാരി, ടി.ലത എന്നിവര് അദ്ധ്യക്ഷത വഹിച്ചു.
മൂന്നരലക്ഷം അയല്ക്കൂട്ട അംഗങ്ങളില് നിന്ന് തെരഞ്ഞെടുക്കപ്പെട്ട നാനൂറില്പ്പരം കുടുംബശ്രീ അംഗങ്ങളാണ് 87 സിഡിഎസുകളെ പ്രതിനിധികരിച്ച് ആദ്യഘട്ടത്തില് മത്സരിച്ച് ഓരോ സിഡിഎസില് നിന്നും സിഡിഎസ് ചെയര്പേഴ്സണ് ഉള്പ്പെടെ അഞ്ച് കുടുംബശ്രീ അംഗങ്ങളടങ്ങുന്ന ഓരോ ടീമാണ് മത്സരത്തില് പങ്കെടുത്തത്. മത്സരാര്ഥികളുടെ അറിവ് അളക്കുന്നതിനായി 100 ചോദ്യങ്ങളടങ്ങിയ ഒരു ചോദ്യാവലിയാണ് ഓരോ ടീമിനും ലഭിച്ചത്.
ഒന്നാംഘട്ട മത്സരത്തിലൂടെ 11 ബ്ലോക്കില് നിന്നും 11 ടീമുകളെയാണ് ഉയര്ന്ന മാര്ക്കുകളുടെ അടിസ്ഥാനത്തില് രണ്ടാം ഘട്ടത്തിലേക്ക് തിരഞ്ഞെടുക്കുക. രണ്ടാം ഘട്ടത്തില് തെരഞ്ഞെടുക്കപ്പെട്ട സിഡിഎസുകളുടെ പ്രവര്ത്തന മികവാണ് പ്രധാനമായും വിലയിരുത്തുന്നത്.
രണ്ടാം ഘട്ടത്തില് വിലയിരുത്തപ്പെട്ട പ്രവര്ത്തന മികവിന്റെ അടിസ്ഥാനത്തില് അഞ്ച് ടീമുകളെ മെഗാഫെനലിലേക്ക് തെരഞ്ഞെടുക്കുന്നതായിരിക്കും. മെഗാഫൈനല് റൗണ്ട് മത്സരത്തില് യോഗ്യത നേടിയ ടീമുകള് വിദഗ്ദ്ധ വിധികര്ത്താക്കളുടെയും പൊതുജനങ്ങള്ക്കും മുമ്പാകെ അവതരണം നടത്തുകയും ഇതിന്റെ അടിസ്ഥാനത്തില് കുടുംബശ്രീ റേഡിയോ വിജ്ഞാനോത്സവ വിജയിയെ പ്രഖ്യാപിക്കുകയും ചെയ്യും. കുടുംബശ്രീ സിഡിഎസിലെ പ്രവര്ത്തനങ്ങളും പദ്ധതികളും പൊതുജനസമക്ഷം അവതരിപ്പിക്കുന്ന പരിപാടിയായിരിക്കും മെഗാഫൈനല്. വിജയികളായ ആദ്യത്തെ മൂന്നു ടീമുകള്ക്ക് പ്രശസ്തി പത്രവും ക്യാഷ് അവാര്ഡും നല്കി അനുമോദിക്കുന്നതായിരിക്കും. മെഗാഫൈനല് മത്സരത്തോടനുബന്ധിച്ച് കുടുംബശ്രീ പ്രവര്ത്തകരുടെ കലാവിരുന്നും അരങ്ങേറും.
പ്രതികരിക്കാൻ ഇവിടെ എഴുതുക: