തൃശൂര്: കണ്സ്യൂമര് ഫെഡ് അഴിമതി സംബന്ധിച്ച ആരോപണങ്ങളില് കഴമ്പില്ലെന്ന് വിജിലന്സ് കോടതിയില് സര്ക്കാര്. ഹൈക്കോടതിയില് നല്കിയ സത്യവാങ്മൂലത്തിനു വിരുദ്ധമായാണ് വിജിലന്സ് കോടതിയില് ആഭ്യന്തരവകുപ്പും വിജിലന്സും നിലപാട് സ്വീകരിക്കുന്നത്.
2015 വരെയുള്ള കാലത്തെ പര്ച്ചേസിങ്, നടത്തിപ്പ്, ചിലവ് എന്നിവയില് ക്രമക്കേടുണ്ടെന്നും ഇത് സംബന്ധിച്ച് അന്വേഷണം നടത്തണമെന്നും ആവശ്യപ്പെട്ടുള്ളതായിരുന്നു ഹര്ജി.
ആരോപണങ്ങളെ തുടര്ന്ന് വിവിധ ജില്ലകളിലായി ആഭ്യന്തര അന്വേഷണം ഉള്പ്പെടെ പലവിധ അന്വേഷണങ്ങള് നടന്നിട്ടുണ്ടെന്നും, പരാതിയില് കഴമ്പില്ലെന്നും വിജിലന്സിന് വേണ്ടി ഹാജരായ അഡീഷണല് ലീഗല് അഡൈ്വസര് കോടതിയില് അറിയിച്ചു. ഇതോടെ കണ്സ്യൂമര്ഫെഡ് അഴിമതിക്കേസില് ഇതുവരെ നടത്തിയ അന്വേഷണങ്ങളുടെ വിവരങ്ങളും റിപ്പോര്ട്ടുമടങ്ങിയ വിശദാംശങ്ങള് ജനുവരി ഏഴിനകം ഹാജരാക്കാന് തൃശൂര് വിജിലന്സ് കോടതി ഉത്തരവായി.
കണ്സ്യൂമര്ഫെഡ് അഴിമതിയില് സി.ബി.ഐ അന്വേഷണം വേണമെന്ന ഹൈക്കോടതിയിലെ ഹര്ജിയില് വിജിലന്സ് അന്വേഷണം നടക്കുന്നുണ്ടെന്നും, സി.ബി.ഐ അന്വേഷണം വേണ്ടെന്നുമായിരുന്നു സത്യവാങ്മൂലത്തില് സര്ക്കാര് നേരത്തെ ഹൈക്കോടതിയെ അറിയിച്ചിരുന്നത്. ഇതില് നിന്നും വ്യത്യസ്തമായ നിലപാടാണ് ഇപ്പോള് വിജിലന്സ് കോടതിയില് സ്വീകരിച്ചിരിക്കുന്നത്.
കണ്സ്യൂമര്ഫെഡില് ടോമിന് തച്ചങ്കരിയെ എം.ഡിയായി നിയമിച്ചതിന് ശേഷം നടത്തിയ ആഭ്യന്തര അന്വേഷണത്തില് വലിയ ക്രമക്കേടുകള് കണ്ടെത്തിയതും വിവാദമായിരുന്നു. ഡയറക്ടര് ബോര്ഡ് അംഗമായിരുന്ന സതീശന് പാച്ചേനിയുടെ നേതൃത്വത്തില് അന്വേഷണം നടത്തിയതിലും ക്രമക്കേട് കണ്ടത്തെിയതോടെ, സര്ക്കാര് കണ്സ്യൂമര്ഫെഡ് ഭരണസമിതി പിരിച്ചുവിടുകയായിരുന്നു. അഞ്ച് പരാതികളില് അന്വേഷണം നടത്തിയതില് രണ്ടെണ്ണം റിപ്പോര്ട്ട് സമര്പ്പിച്ചുവെന്നും, മൂന്നെണ്ണം അന്വേഷണത്തിന്റെ അവസാനഘട്ടത്തിലാണെന്നുമായിരുന്നു വിജിലന്സ് ഹൈക്കോടതിയില് നല്കിയിരുന്ന സത്യവാങ്മൂലം.
റിപ്പോര്ട്ട് സമര്പ്പിക്കാന് സമയം വേണമെന്ന് വിജിലന്സ് ആവശ്യപ്പെട്ടുവെങ്കിലും ആവശ്യം കോടതി തള്ളി. മന്ത്രി സി.എന്. ബാലകൃഷ്ണന് ഹര്ജിയില് എട്ടാം എതിര്കക്ഷിയാണ്. കണ്സ്യൂമര്ഫെഡ് മുന് എം.ഡി ജോയ് തോമസ്, സഹകരണ വകുപ്പ് മുന് അഡീഷണല് രജിസ്ട്രാര് വി.സനില്കുമാര്, കണ്സ്യൂമര്ഫെഡ് മുന് എം.ഡി റിജി ജി.നായര്, മുന് ചീഫ് മാനേജര് ആര്.ജയകുമാര്, മുന് റീജ്യണല് മാനേജര് എം.ഷാജി, മുന് റീജ്യണല് മാനേജര് സ്വിഷ് സുകുമാരന്, കണ്സ്യൂമര്ഫെഡ് വിദേശ മദ്യം വിഭാഗത്തിലെ മുന് മാനേജര് സുജിത കുമാരി എന്നിവരാണ് ഒന്നു മുതല് ഏഴ് വരെ പ്രതികള്. മലയാളവേദി പ്രസിഡണ്ടും പൊതുപ്രവര്ത്തകനുമായ ജോര്ജ്ജ് വട്ടുകുളം നല്കിയ ഹര്ജിയിലാണ് വിജിലന്സ് ജഡ്ജ് എസ്.എസ്. വാസന്റെ നടപടി. നേരത്തെ ലോകായുക്തയെ സമീപിച്ചിരുന്നുവെങ്കിലും ഹര്ജി സ്വീകരിച്ചിരുന്നില്ല. ഇതേത്തുടര്ന്നാണ് വിജിലന്സിനെ സമീപിച്ചത്.
പ്രതികരിക്കാൻ ഇവിടെ എഴുതുക: