കുടയത്തൂര്: മലങ്കര ഡാം അറ്റകുറ്റപണികള്ക്കായി ഷട്ടര് തുറന്നതിനാല് ജലാശയത്തിന്റെ പരിസരങ്ങളില് ഉള്ള കിണറുകളിലെ വെള്ളം താഴ്ന്നു. ഇതു മൂലം പല കിണറുകളില് നിന്നും വെള്ളം പമ്പ് ചെയ്യുവാന് കഴിയുന്നില്ല. ഡാമിന്റെ പരിസരങ്ങളില് നൂറുകണക്കിന് കിണറുകളാണുള്ളത്. ജലാശയത്തിന്റെ ജല ലഭ്യത കണക്കിലെടുത്ത് പരിസരങ്ങളില് ഏത്തവാഴകൃഷി വ്യാപകമാണ്. ഡാമിനുള്ളിലെ വെള്ളത്തിന്റെ അളവ് വളരെ കുറഞ്ഞതിനാല് കൃഷി ആവശ്യത്തിനും വെള്ളം എടുക്കുവാന് സാധിക്കുന്നില്ല. ഡാമിന്റെ ഉള്ളിലെ അറ്റകുറ്റപണികള് ഇന്നലെ പൂര്ത്തിയായി. ഡാമിന്റെ പുറമെയുള്ള ജോലികളാണ് ഇപ്പോള് നടക്കുന്നത്.ഇന്നലെ ഉച്ചയോടെ ഷട്ടറുകള് അടച്ചു.
നീരൊഴുക്ക് കുറഞ്ഞതിനാല് ഡാം നിറയണമെങ്കില് ഒരാഴ്ച എടുക്കും. വളരെ മന്ദഗതിയിലാണ് ജലാശയത്തില് വെള്ളം നിറയുന്നത്. വെള്ളം വറ്റിതുരുത്തുകള് കാണപ്പെട്ട ജലാശയത്തില് വെള്ളം നിറയുന്നത് കാത്തിരിക്കുകയാണ് ഡാമിന്റ പരിസരത്തുള്ളവര്.
പ്രതികരിക്കാൻ ഇവിടെ എഴുതുക: