കണ്ണൂര്: ക്രിസ്തുമസ് നവവല്സര ആഘോഷങ്ങളുടെ പശ്ചാത്തലത്തില് അനധികൃത മദ്യത്തിന്റെയും വ്യാജമദ്യത്തിന്റെയും വ്യാപനം തടയാന് ജനുവരി 5 വരെ എക്സൈസ് വകുപ്പ് സ്പെഷ്യല് ഡ്രൈവ് നടത്തുമെന്ന് വ്യാജമദ്യം തടയുന്നതിനുളള ജില്ലാതല ജനകീയ കമ്മിറ്റി യോഗത്തില് എക്സൈസ് ഡെപ്യൂട്ടി കമ്മീഷണര് വി.വി.സുരേന്ദ്രന് അറിയിച്ചു. ജില്ലാതലത്തില് 24 മണിക്കൂറും പ്രവര്ത്തിക്കുന്ന കണ്ട്രോള് റൂം ആരംഭിച്ചിട്ടുണ്ട്. 0497 2749500 ആണ് നമ്പര്. മദ്യകടത്ത്, വ്യാജമദ്യം തുടങ്ങിയവ സംബന്ധിച്ച വിവരങ്ങള് ഈ നമ്പറിലേക്ക് പൊതുജനങ്ങള്ക്ക് അറിയിക്കാവുന്നതാണ്.
കണ്ണൂര് കന്റോണ്മെന്റ് ബോര്ഡിന്റെ സഹകരണം തേടി ബര്ണശ്ശേരി, പയ്യാമ്പലം ഭാഗങ്ങളില് മദ്യപാനം നിയന്ത്രിക്കുന്നതിനുളള നടപടികള് സ്വീകരിക്കാന് യോഗം നിര്ദ്ദേശിച്ചു. ജില്ലയിലെ ഉന്നത വിദ്യാഭ്യാസ സ്ഥാപനങ്ങളിലും വ്യവസായ മേഖലകളിലും വിപുലമായ ബോധവല്ക്കരണ പ്രവര്ത്തനങ്ങള് എക്സൈസ് വകുപ്പിന്റെ നേതൃത്വത്തില് നടത്തും. വിദ്യാര്ത്ഥികളിലും യുവാക്കളിലും കഞ്ചാവ് ഉള്പ്പെടെയുളള ലഹരി വസ്തുക്കളുടെ ഉപയോഗം വര്ധിച്ചുവരുന്ന സാഹചര്യത്തില് പ്രത്യേക ബോധവല്ക്കരണ പ്രവര്ത്തനം നടത്താനും ശക്തമായ നടപടികള് കൈക്കൊളളാനും തീരുമാനിച്ചു.
ജില്ലയില് നവംബര് മാസം നടത്തിയ റെയ്ഡില് 256 ലിറ്റര് വിദേശമദ്യവും, 214 ലിറ്റര് മാഹി മദ്യവും പിടികൂടിയതായി യോഗത്തില് അവതരിപ്പിച്ച റിപ്പോര്ട്ടില് പറഞ്ഞു. 9 ലിറ്റര് ചാരായം, 6 ലിറ്റര് ബിയര്, 792 ഗ്രാം കഞ്ചാവ്, 5.4 ഗ്രാം ബ്രൗണ് ഷുഗര്, 465 ലിറ്റര് വാഷ് എന്നിവയും എക്സൈസ് പിടികൂടി. 108 അബ്കാരി കേസുകളും 8 എന്ഡിപിഎസ് കേസുകളും പുകയില ഉല്പ്പന്നങ്ങളുമായി ബന്ധപ്പെട്ട് 123 കോട്പ കേസുകളും ഈ കാലയളവില് എടുത്തു. ഡെപ്യൂട്ടി കലക്ടര്(എല്എ) പി.കെ.സുധീര് ബാബു യോഗത്തില് അധ്യക്ഷത വഹിച്ചു. കണ്ണൂര് ബ്ലോക്ക് പഞ്ചായത്ത് വൈസ് പ്രസിഡണ്ട് കെ.എം.സപ്ന, ആന്തൂര് നഗരരസഭാ വൈസ് ചെയര്മാന് കെ.ഷാജു, കൂത്തുപറമ്പ് നഗരസഭ സ്റ്റാന്റിങ്ങ് കമ്മിറ്റി ചെയര്മാന് വി.രാമകൃഷ്ണന്, വിവിധ സംഘടനാ പ്രതിനിധികളായ പി.ടി.സഗുണന്, കെ.കെ.രാജന്, കെ.പി.പുരുഷോത്തമന്, ഡിവൈഎസ്പി ടി.പി.രഞ്ജിത്ത് തുടങ്ങിയവര് പങ്കെടുത്തു.
ലൈബ്രറി സയന്സ് കോഴ്സ്
കണ്ണൂര്: തളിപ്പറമ്പ് ഏഴാംമൈലില് പ്രവര്ത്തിക്കുന്ന ഐഎച്ച്ആര്ഡി അപ്ലൈഡ് സയന്സ് കോളേജില് സര്ക്കാര് അംഗീകൃത ലൈബ്രറി & ഇന്ഫര്മേഷന് സയന്സ് കോഴ്സുകളിലേക്ക് അപേക്ഷ ക്ഷണിച്ചു. സെക്കന്റ് ക്ലാസ് എസ്എസ്എല്സി/ഹയര് സെക്കണ്ടറി/ഡിഗ്രി ആണ് യോഗ്യത. ഫോണ്: 0460 2206050.
പ്രതികരിക്കാൻ ഇവിടെ എഴുതുക: