കണ്ണൂര്: എയ്ഡഡ് സ്കൂളിലെ പ്രീപ്രൈമറി ജീവനക്കാരുടെ ശമ്പളം സര്ക്കാറിന്റെ ബാധ്യതയില്ലെന്നുള്ള ഹൈക്കോടതി വിധിയെ ജില്ലാ പ്രീ പ്രൈമറി ടീച്ചേഴ്സ് അസോസിയേഷന് ശക്തമായി അപലപിച്ചു. സ്കൂള് മാനേജ്മെന്റോ പിടിഎയോ പ്രീപ്രൈമറി അധ്യാപകര്ക്ക് 5000 രൂപയും ആയമാര്ക്ക് 3,500 രൂപയും ഓണറേറിയം നല്കണമെന്നുള്ള സര്ക്കാര് ഉത്തരവ് ശരിവെച്ചുകൊണ്ടാണ് ഹൈക്കോടതി ഈ വിധി പുറപ്പെടുവിച്ചിരിക്കുന്നത്.
പ്രീ പ്രൈമറി മേഖലയില് വര്ഷങ്ങളായി ഇത്ര തുച്ഛമായ വേതനത്തില് ജോലി ചെയ്തുവരുന്നവരാണ് ഈ അധ്യാപകരും ആയമാരും. പ്രീ പ്രൈമറിയിലെ കുട്ടികളുടെ കണക്കുകള് സര്ക്കാര് സൂക്ഷിക്കുകയും പോഷകാഹാരവും ഉച്ചക്കഞ്ഞിയും ലഭ്യമാക്കുകയും ചെയ്യുന്നുണ്ട്. എന്നാല് അധ്യാപകര്ക്കും ആയമാര്ക്കും സര്ക്കാര് ശമ്പളമോ മറ്റ് ആനുകൂല്യങ്ങളോ നല്കുന്നില്ലെന്ന് മാത്രമല്ല, ജീവനക്കാരുടെ കൃത്യമായ കണക്കുകള് പോലും സര്ക്കാറിന്റെ പക്കലില്ല. കേന്ദ്ര വിദ്യാഭ്യാസ അവകാശ നിയമപ്രകാരം പ്രീ പ്രൈമറിയും സ്കൂള് വിദ്യാഭ്യാസ പ്രക്രിയയുടെ ഭാഗമാണ്. ഈ സാഹചര്യത്തില് ഹൈക്കോടതിയില് അധ്യാപകര് നടത്തിയ കേസിനെ തുടര്ന്നുണ്ടായ വിധി ഈ മേഖലയിലെ ആയിരക്കണക്കായ പ്രീ പ്രൈമറി സ്കൂള് ജീവനക്കാരുടെ താല്പര്യങ്ങളെ പ്രതിഫലിപ്പിക്കുന്നതല്ല. ആയമാര്ക്ക് ഓണറേറിയും നല്കുന്നത് വിദ്യാഭ്യാസ ഡെപ്യൂട്ടി ഡയരക്ടര്മാര് ഉറപ്പാക്കണമെന്നാണ് കോടതി പറഞ്ഞിട്ടുള്ളത്. ഹൈക്കോടതി വിധിക്കെതിരെയും സര്ക്കാര് ഉത്തരവിനെതിരെയും ജീവനക്കാര് ഒന്നടങ്കം പ്രതിഷേധത്തിലാണ്. ഇന്നത്തെ ജീവിതസാഹചര്യത്തില് 5000 രൂപ മാസ ശമ്പളത്തില് മാന്യമായി ജീവിതം നിലനിര്ത്താന് സാധിക്കുകയില്ല. കേന്ദ്ര സര്ക്കാര് നിശ്ചയിച്ചിട്ടുള്ള മിനിമം കൂലി കണക്കാക്കിയാല്പ്പോലും ഇതില് കൂടുതല് വരും.
കേന്ദ്ര വിദ്യാഭ്യാസ അവകാശ നിയമപ്രകാരം പ്രീപ്രൈമറിയെയും സ്കൂള് വിദ്യാഭ്യാസത്തിന്റെ ഭാഗമായി അംഗീകരിക്കുകയും പിഎസ്സി വഴി നിയമിക്കപ്പെട്ട പ്രീ പ്രൈമറി അധ്യാപകര്ക്ക് ലബിക്കുന്ന അതേ ശമ്പളവും മറ്റ് ആനുകൂല്യങ്ങളിലും നല്കുകയും ചെയ്യുക എന്നതാണ് പ്രീ പ്രൈമറി ജീവനക്കാരുടെ പ്രധാന ആവശ്യം.
ഈ ആവശ്യങ്ങളുന്നയിച്ചുകൊണ്ട് ശക്തമായ പരിപാടികളിലേക്ക് നീങ്ങുവാന് തന്നെയാണ് ജീവനക്കാര് തീരുമാനിച്ചിരിക്കുന്നത്. കഴിഞ്ഞ ദിവസം ചേര്ന്ന ജില്ലാ കമ്മറ്റിയോഗത്തില് ജനുവരി 16 ന് കണ്ണൂര് കലക്ടറേറ്റിലേക്ക് മാര്ച്ചും ധര്ണയും നടത്തുവാനും മറ്റ് പ്രക്ഷോഭ പരിപാടികള് സംഘടിപ്പിക്കാനും തീരുമാനിച്ചിട്ടുണ്ട്. സമരപരിപാടികള് ആസൂത്രണം ചെയ്യുന്നതിനുള്ള ആലോചനായോഗം ജനുവരി 2 ന് രാവിലെ 10 മണിക്ക് മട്ടന്നൂര് ഗവ യുപി സ്കൂളില് നടക്കും.
പ്രതികരിക്കാൻ ഇവിടെ എഴുതുക: