തലശ്ശേരി: കേരള സ്റ്റേറ്റ് ഭാരത് സ്കൗട്ട് ആന്റ് ഗൈഡ്സ് സംസ്ഥാന അസോസിയേഷന് തലശ്ശേരി മലബാര് കേന്സര് സെന്ററിന്റെ ഉപയോഗത്തിനായി നല്കുന്ന പാലിയേറ്റീവ് വാഹനത്തിന്റെ കൈമാറ്റ ചടങ്ങ് നാളെ കാലത്ത് 10 മണിക്ക് ആരോഗ്യ മന്ത്രി വി.എസ്.ശിവകുമാര് നിര്വ്വഹിക്കുമെന്ന് ഭാരവാഹികള് പത്രസമ്മേളനത്തില് പറഞ്ഞു. സംസ്ഥാനത്തിലെ മുഴുവന്വിദ്യാലയങ്ങളും കേന്ദ്രീകരിച്ച് നടപ്പിലാക്കിയ ആരോഗ്യ ശുചിത്വ വിദ്യാഭ്യാസ പരിപാടിയുടെ ഭാഗമായി സാന്ത്വനത്തില് എന്റെ പങ്ക് എന്ന പദ്ധതി പ്രകാരം സ്വരൂപിച്ച സംഖ്യ ഉപയോഗിച്ചാണ് വാഹനം വാങ്ങിയത്.
തലശ്ശേരി സേക്രട്ട് ഹാര്ട്ട് സ്കൂളില് നടക്കുന്ന ചടങ്ങില് എംസിസി ഡയറക്ടര് ഡോ.സതീഷ് ബാലസുബ്രഹ്മണ്യന് വാഹനം ഏറ്റുവാങ്ങും. നഗരസഭാ ഉപാധ്യക്ഷ നജ്മ ഹാഷിം, അധ്യക്ഷത വഹിക്കും. തലശ്ശേരി സബ് കലക്ടര് നവജ്യോത് ഖോസ, സംസ്ഥാന സ്കൗട്ട് കമ്മീഷണര് സി.വിനോദ് കുമാര്, സെക്രട്ടറി പി.ടി.സക്കീര് ഹുസൈന്, ഓര്ഗനൈസിംഗ് കമ്മീഷണര് ജി.കെ.ഗിരീഷ് എന്നിവര് പ്രസംഗിക്കും. പത്രസമ്മേളനത്തില് തലശ്ശേരി വിദ്യാഭ്യാസ ജില്ലാ സെക്രട്ടറി കെ.എം.ചന്ദ്രന്, തലശ്ശേരി സൗത്ത് ഉപജില്ലാ സെക്രട്ടറി ബി.അബ്ദുള് സലാം എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: