കുന്നത്തൂര്: ചട്ടങ്ങളും നിയമങ്ങളും മറികടന്ന് പഞ്ചായത്ത് കോണ്ഫറന്സ് ഹാള് സിപിഎമ്മിന് പരിപാടിക്ക് വിട്ടുനല്കാനുള്ള പഞ്ചായത്ത് തീരുമാനത്തിനെതിരെ വ്യാപക പ്രതിഷേധം.
ഇടതുഭരണത്തിന് കീഴിലുള്ള ശൂരനാട് തെക്ക് പഞ്ചായത്ത് ഭരണസ്വാധീനം ഉപയോഗിച്ച് പഞ്ചായത്ത് ഹാള് പാര്ട്ടി ഓഫീസാക്കി മാറ്റാനാണ് നീക്കം. സിപിഎം ഏരിയ സെക്രട്ടറി ശിവപ്രസാദാണ് സിപിഎമ്മിന്റെ യോഗ പഠനക്ലാസിന് പഞ്ചായത്ത് ഹാള് ആവശ്യപ്പെട്ട് കൊണ്ട് ഭരണസമിതിക്ക് കത്ത് നല്കിയത്. ഈ കത്ത് ചര്ച്ചയാകുകയും സിപിഎമ്മിലെയും സിപിഐയിലെയും ഭരണകക്ഷി അംഗങ്ങള് പിന്തുണച്ചപ്പോള് ബിജെപി ഉള്പ്പെടുന്ന പ്രതിപക്ഷ കക്ഷികള് ഇതിനെ എതിര്ത്തു. പൊതുപരിപാടികള് ഒഴികെ മറ്റ് ആവശ്യങ്ങള്ക്ക് പഞ്ചായത്ത് ഹാള് വിട്ടുനല്കാന് നിലവില് വ്യവസ്ഥയില്ല. എല്ലാ ഞായറാഴ്ചകളിലുമാണ് സിപിഎം ഹാള് ആവശ്യപ്പെട്ടിട്ടുള്ളത്. വാടക ഈടാക്കിയാവും ഹാള് നല്കുകയെന്നും ഇത് പഞ്ചായത്തിനൊരു വരുമാനമാര്ഗമാകുമെന്നുമാണ് അധികൃതരുടെ വാദം. എന്നാല് വാടകയീടാക്കി പഞ്ചായത്ത് കോണ്ഫറന്സ് ഹാള് വിട്ടുനല്കാന് നിലവിലെ ബൈലായില് ഭേദഗതി വരുത്തേണ്ടിവരും. ഇങ്ങനെയെങ്കില് എല്ലാ രാഷ്ട്രീയപാര്ട്ടികളുടെ പരിപാടികള്ക്കും പഞ്ചായത്ത് കെട്ടിടം വിട്ടുനല്കേണ്ടി വരുമെന്ന് പ്രതിപക്ഷകക്ഷികള് പറഞ്ഞു.
പ്രതികരിക്കാൻ ഇവിടെ എഴുതുക: