ന്യൂദല്ഹി: ബംഗളൂരൂ സ്ഫോടനം അടക്കമുള്ള കേസുകളിലെ വിചാരണ ഏകീകരിക്കണമെന്ന് ആവശ്യപ്പെട്ട് കേസിലെ പ്രതി അബ്ദുള് നാസര് മഅ്ദനി നല്കിയ ഹര്ജി വിചാരണക്കോടതിയില് നല്കാന് സുപ്രീംകോടതി നിര്ദ്ദേശിച്ചു. ബംഗളൂരുവിലെ വിചാരണക്കോടതിയില് ഒരാഴ്ചയ്ക്കകം അപേക്ഷ നല്കാനും കോടതി നിര്ദ്ദേശിച്ചു. തനിക്കെതിരെയുള്ള ഒമ്പതു കേസുകളിലേയും വിചാരണ ഒന്നിച്ച് നടത്തണമെന്ന് ആവശ്യപ്പെട്ടാണ് മഅ്ദനി സുപ്രീംകോടതിയെ സമീപിച്ചത്.
മഅ്ദനിയുടെ അപേക്ഷയില് ഒരാഴ്ചയ്ക്കകം തീരുമാനം കൈക്കൊള്ളാനും സുപ്രീംകോടതി വിചാരണക്കോടതിയോട് നിര്ദ്ദേശിച്ചു. കേസിലെ ഒരേ സാക്ഷിയെ തന്നെ നിരവധി തവണ വിളിച്ചു വരുത്തിയ പ്രോസിക്യൂഷന്റെ നടപടിയെ കുറിച്ചും വിശദീകരിക്കേണ്ടി വരും. വിചാരണ എന്ന് പൂര്ത്തിയാവും എന്ന കാര്യവും വിചാരണക്കോടതി സുപ്രീംകോടതിയെ അറിയിക്കണം. ബംഗളൂരു സ്ഫോടന കേസിലെ വിചാരണ നടപടികള് വൈകുന്നതില് സുപ്രീംകോടതി നേരത്തെ അതൃപ്തി രേഖപ്പെടുത്തിയിരുന്നു. തുടര്ന്ന് കര്ണാടക സര്ക്കാര് വിചാരണയ്ക്കായി പ്രത്യേക കോടതി രൂപീകരിച്ചു.
നിലവില് ചികിത്സാര്ത്ഥമുള്ള ജാമ്യത്തിലാണ് മഅ്ദനി. നിലവിലെ ജാമ്യം ഏകാന്ത തടവ് പോലെയാണെന്നും കേസിന്റെ വിചാരണ നീളുന്നത് മനുഷ്യാവകാശങ്ങളുടെ ലംഘനമാണെന്നും മഅദ്നി ഹര്ജിയില് ചൂണ്ടിക്കാട്ടിയിരുന്നു.
പ്രതികരിക്കാൻ ഇവിടെ എഴുതുക: