പൂച്ചാക്കല്: സ്പെയിനില് നിന്നുള്ള 90 അംഗ വിനോദ സഞ്ചാരികള്ക്ക് പാണാവള്ളി നാല്പ്പത്തെണ്ണീശ്വരം ക്ഷേത്രാങ്കണത്തില് പ്രത്യേക ഉത്സവമൊരുക്കി. നെറ്റിപ്പട്ടം കെട്ടിയ ഗജവീരന്മാര്ക്ക് മുന്നില് ചെണ്ടമേളമുയര്ന്നപ്പോള് സ്ത്രീകളടക്കമുള്ള വിദേശികള്ക്ക് കൗതുകമായി.
വരുന്ന കുംഭത്തില് ക്ഷേത്രത്തില് നടക്കേണ്ട ഉത്സവത്തിന് മുന്നോടിയായി മറ്റൊരു ഉത്സവാന്തരീക്ഷം കണ്ടപ്പോള് അത് സ്വദേശികള്ക്കും അത്ഭുതമായി. ക്ഷേത്രത്തിനു മുന്നില് രാവിലെ 10.30 ന് ആരംഭിച്ച ഉത്സവക്കാഴ്ചകള് ഒരുമണിക്കൂറിലേറെ നീണ്ടു. കഴിഞ്ഞ 13ന് കേരളത്തിലെത്തിയ സ്പെയിന്സംഘം 17ന് മടങ്ങും. ഇതിനിടയിലാണ് വിദേശികളുടെ സഞ്ചാരം ചിട്ടപ്പെടുത്തിയ ടൂര് കമ്പനിയോട് നാട്ടിന്പുറത്തെ ക്ഷേത്രോത്സവം കാണണമെന്ന് സംഘാംഗങ്ങള് ആവശ്യപ്പെട്ടത്്. ടൂര് കമ്പനിയുടെ ആവശ്യപ്രകാരം വാദ്യകലാകാരനായ പാണാവള്ളി സ്നേഹജയനാണ് ക്ഷേത്രഭാരവാഹികളുടെ അനുമതിയോടെ ഉത്സവം സംഘടിപ്പിച്ചത്. രണ്ട് ആനകളും, 15 കലാകാരന്മാരുടെ ചെണ്ടമേളവും അലങ്കരിച്ച ക്ഷേത്രാങ്കണവും ഒക്കെ വിദേശികള്ക്ക് പുത്തന് അനുഭവമാണ് നല്കിയത്.
പ്രതികരിക്കാൻ ഇവിടെ എഴുതുക: