കോട്ടയം: കേരളാ സ്റ്റേറ്റ് ട്രാന്സ്പോര്ട്ട് ഡ്രൈവേഴ്സ് യൂണിയന് 40-ാം സംസ്ഥാന സമ്മേളനം 21,22 തീയതികളില് കോട്ടയത്ത് നടക്കുമെന്ന് ഭാരവാഹികള് പത്രസമ്മേളനത്തില് പറഞ്ഞു. 21ന് പ്രകടനത്തോടെയാണ് സമ്മേളനം ആരംഭിക്കുന്നത്. രാവിലെ 10ന് കോടിമതയില് നിന്ന് പ്രകടനം ആരംഭിച്ച് സമ്മേളന സ്ഥലമായ മാമ്മന് മാപ്പിള ഹാളില് എത്തിച്ചേരും. തുടര്ന്ന് സമ്മേളനം മന്ത്രി തിരുവഞ്ചൂര് രാധാകൃഷ്ണന് ഉദ്ഘാടനം ചെയ്യും. ഡ്രൈവേഴ്സ് യൂണിയന് സംസ്ഥാന പ്രസിഡന്റ് കെ. മുരളീധരന് അദ്ധ്യക്ഷത വഹിക്കും. മന്ത്രി വി.എസ്. ശിവകുമാര് മുഖ്യപ്രഭാഷണം നടത്തും. ജോസ് കെ മാണി എ.പി, എംഎല്എമാരായ എം.വി. ശ്രേയാംസ് കുമാര്, അഡ്വ. മോന്സ് ജോസഫ്, തുടങ്ങിയവര് പ്രസംഗിക്കും. ഉച്ചക്ക് 2ന് കേരള സര്വ്വകലാശാലാ മുന് വൈസ് ചാന്സിലര് ഡോ. ബി.ഇക്ബാല് ക്ലാസെടുക്കും. വൈകിട്ട് 4ന് സര്വ്വീസില് നിന്നും വിരമിച്ചവര്ക്ക് യാത്രയയപ്പ് സമ്മേളനം. തുടര്ന്ന് ഗാനമേള. 22ന് രാവിലെ 9ന് സിഎസ്ഐ റിട്രീറ്റ് സെന്ററില് നടക്കുന്ന പ്രതിനിധി സമ്മേളനത്തില് സംസ്ഥാന പ്രസിഡന്റ് കെ.മുരളീധരന് എംഎല്എ അദ്ധ്യക്ഷത വഹിക്കും. ജനറല് സെക്രട്ടറി അര്. അയ്യപ്പന് റിപ്പോര്ട്ടും ഖജാന്ജി എസ്.പി. പരമേശ്വരന് കണക്കും അവതരിപ്പിക്കും. ഉച്ചക്ക് 2ന് സമാപന സമ്മേളനം നടക്കും. സംസ്ഥാനത്തെ 96 ഡിപ്പോകളില് നിന്നുള്ള പ്രതിനിധികള് സമ്മേളനത്തില് പങ്കെടുക്കും. ഡ്രൈവര്മാര്ക്ക് അര്ഹതപ്പെട്ട പ്രൊമോഷന് നല്കുക, ഡ്രൈവര് കണ്ടക്ടര് സംവിധാനം ഉടന് നടപ്പിലാക്കുക തുടങ്ങിയ കാര്യങ്ങള് സമ്മേളനം ചര്ച്ച ചെയ്യും. പത്രസമ്മേളനത്തില് പി.സി. കുരുവിള, ജോര്ജ്ജ് ജോസഫ്, ജോയീസ് മൈക്കിള്, സി.എം. ഫിലിപ്പ്, കെ.എന്. സോമരാജന് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: