കണ്ണൂര്: കുടുംബശ്രീ മിഷന്റെ വിവിധ പദ്ധതികളും പരിപാടികളും അയല്ക്കൂട്ട തലങ്ങളില് എത്തിക്കുന്നതിനായി കുടുംബശ്രീ കണ്ണൂര് ജില്ലാമിഷന് കണ്ണൂര് ആകാശവാണി നിലയവുമായി സഹകരിച്ച് നടത്തുന്ന റേഡിയോ പരിപാടിയായ ‘കുടുംബശ്രീ റേഡിയോ’ പ്രക്ഷേപണം ഒരു വര്ഷം പിന്നിട്ടിരിക്കുന്നു. ഇതിന്റെ ഒന്നാം വാര്ഷികത്തിന്റെ ഭാഗമായി സംഘടിപ്പിക്കുന്ന ‘കുടുംബശ്രീ റേഡിയോ വിജ്ഞാനോത്സവം ‘ മത്സരത്തിന്റെ അന്തിമഘട്ടത്തിലേക്ക് പ്രവേശിച്ചിരിക്കുകയാണ്.
ജില്ലയിലെ മുഴുവന് സിഡിഎസ്സുകളേയും പങ്കെടുപ്പിചച്ച് 2015 ഡിസംബറില് ജില്ലയിലെ 5 കേന്ദ്രങ്ങളില് വെച്ച് എഴുത്ത് പരീക്ഷ നടത്തി ഓരോ ബ്ലോക്കില് നിന്നും ഏറ്റവും കൂടുതല് മാര്ക്ക് നേടിയ 11 സിഡിഎസ്സുകളെ ബ്ലോക്ക് തല വിജയികളായി കണ്ടെത്തുകയും ചെയ്തു. ഈ 11 സിഡിഎസ്സുകളെ പങ്കെടുപ്പിച്ച് കണ്ണൂര് കൃഷ്ണമേനോന് സ്മാരക വനിതാ കോളേജില് വെച്ച് നടത്തിയ രണ്ടാംഘട്ട മത്സരത്തിലൂടെ 5 ടീമുകള് ഫൈനല് റൗണ്ടില് പ്രവേശിക്കുകയും ചെയ്തു.
ഓരോ ടീമും തങ്ങളുടെ സിഡിഎസ്സുകള്ക്ക് കീഴില് കഴിഞ്ഞ 3 വര്ഷത്തെ പ്രവര്ത്തന നേട്ടങ്ങളാണ് കാര്ഷികം, ബാങ്കിംഗ്, സ്ത്രീ ശാക്തീകരണം, സംരംഭകത്വ മേഖലകളില് വിദഗ്ധരായ ജൂറികളുടെ മുമ്പാകെ അവതിപ്പിച്ചത്. ജൂറി ടീം സിഡിഎസ്സുകളുടെ അവതരണത്തിന്റെയും മുഖാമുഖം ചേദ്യോത്തരത്തിലൂടെയും സിഡിഎസ്സിന്റെ പ്രവര്ത്തനങ്ങള് വിലയിരുത്തി മികച്ച 5 സിഡിഎസ്സുകളെ കണ്ടെത്തുകയുണ്ടായി. ചെമ്പിലോട്, മൊകേരി, ചപ്പാരപ്പടവ്, പേരാവൂര് മട്ടന്നൂര് എന്നീ സിഡിഎസ്സുകളാണ് ജില്ലാതലത്തില് മത്സരിക്കാന് അര്ഹത നേടിയിട്ടുള്ളത്.
ജില്ലാതല മത്സരത്തിന് മുന്നോടിയായി ഓരോ സിഡിഎസ്സുകളിലും വീഡിയോ ചിത്രീകരണം നടന്നു വരികയാണ്. കൂടാതെ പ്രവര്ത്തനങ്ങള് നേരിട്ട് വിലയിരുത്തുന്നതിന് 3 അംഗ വിദഗ്ധ സംഘം സി ഡി എസ്സുകള് സന്ദര്ശിക്കുന്നുണ്ട്. ഈ സംഘം പഞ്ചായത്ത്/നഗരസഭ സ്ഥാപന അദ്ധ്യക്ഷന്, കുടുംബശ്രീ ഭരണ സമിതി അംഗങ്ങള് എന്നിവരുമായി നടത്തുന്ന അഭിമുഖത്തിലൂടെയും സി ഡി എസ്സിലെ സംരംഭങ്ങളും മറ്റ് പദ്ധതികളും സന്ദര്ശിച്ച് സി ഡി എസ്സ് പ്രവര്ത്തനങ്ങള് വിലയിരുത്തുന്നതാ1ണ്.
ജില്ലാ ടൂറിസം പ്രൊമോഷന് കൗണ്സില്, ഫോക്ക്ലോര് അക്കാദമി, എന്നിവയും കുടുംബശ്രീ ജില്ലാമിഷനും കണ്ണൂര് ആകാശവാണിയും സംഘടിപ്പിക്കുന്ന ഈ വിജ്ഞാനോത്സവത്തില് പങ്കാളികളാകുന്നുണ്ട്. ഫൈനല് മത്സരം ജനുവരി 29 വെള്ളിയാഴ്ച വൈകീട്ട് 5 മണി മുതല് കണ്ണൂര് ടൗണ് സ്ക്വയറില് വെച്ച് നടക്കും.
പ്രതികരിക്കാൻ ഇവിടെ എഴുതുക: