ഈശ്വര ഭക്തികൊണ്ട് വിഷം അമൃതാക്കി മാറ്റിയ രാജകുമാരിയായിരുന്നു ഭക്തമീര. പിന്നീടവര് ലോകത്ത് അനശ്വര കഥാപാത്രമായി മാറുകയാണുണ്ടായത്.
ആകാശത്തുനിന്ന് വീഴുന്ന മഴവെള്ളം ഭൂമിയുടെ ഏത് ഭാഗത്ത് വീണാലും അത് ഒഴുകി സമുദ്രത്തിലെത്തും. അതുപോലെ ഈശ്വരനെ ആര് എവിടെവച്ച് പ്രാര്ത്ഥിച്ചാലും ഈശ്വരന് അവരുടെ രക്ഷയ്ക്കായ് എത്തും.
പ്രത്യാശ കൈവിടാതെ ജീവിക്കാന്, ഉറച്ച ഭക്തി നമ്മെ ശക്തരാക്കുന്നു. പുരാണത്തില് പല കഥാപാത്രങ്ങളും മറ്റുള്ളവരുടെ നന്മയ്ക്ക് വേണ്ടി ത്യാഗം സഹിച്ചവരാണ്.
നമ്മുടെ പ്രാര്ത്ഥന നമുക്ക് വേണ്ടി മാത്രമല്ല; മറ്റുള്ളവര്ക്കുകൂടി വേണ്ടിയായാല് ഈശ്വരാനുഗ്രഹം വേണ്ടുവോളം ലഭിക്കും. മറ്റുള്ളവരുടെ നന്മയ്ക്കുവേണ്ടി പ്രാര്ത്ഥിക്കുന്നതില്പ്പരം പുണ്യം വേറൊന്നുമില്ല.
ശ്രീപരമശിവന് പാലാഴിമഥന സമയത്ത് കാളകൂടവിഷം കഴിച്ച് ദേവന്മാരടക്കം സമസ്ത ജീവജാലങ്ങളേയും രക്ഷിക്കുകയായിരുന്നു. വിഷം ഉള്ളിലേക്കിറങ്ങി മരിക്കാതിരിക്കാന് ശ്രീപാര്വ്വതി ശിവന്റെ കണ്ഠത്തില് പിടിച്ച് തടഞ്ഞതിനാല് ശിവന് നീലകണ്ഠനായി.
ഈശ്വര ഭക്തികൊണ്ട് വിഷം അമൃതാക്കി മാറ്റിയ രാജകുമാരിയായിരുന്നു ഭക്തമീര. പിന്നീടവര് ലോകത്ത് അനശ്വര കഥാപാത്രമായി മാറുകയാണുണ്ടായത്.
രജപുത്രരാജാവിന്റെ മകളായ മീരയെ ഭോജാരാജകുമാരന് വിവാഹം ചെയ്യുകയും ദാമ്പത്യത്തിന്റെ പുതുമ മാറുന്നതിന് മുമ്പ് രാജകുമാരന് അകാല ചരമമടയുകയും ചെയ്തു.
അതോടെ തീവ്രമായ ശ്രീകൃഷ്ണഭക്തിയുള്ള മീരാരാജകുമാരി ഈശ്വരനില് അഭയം തേടി. ദിവസത്തിന്റെ വലിയൊരു ഭാഗം പൂജയും ഭജനയും ആയി കഴിച്ചുകൂട്ടി. കൃഷ്ണകീര്ത്തനങ്ങള് സ്വയം രചിച്ച് ഭക്തി ലഹരിയില് മതിമറന്ന് അവര് ആനന്ദനൃത്തം ആടുമായിരുന്നു.
രാജകുടുംബാംഗങ്ങള്ക്ക് മീരാ രാജകുമാരിയുടെ ഭക്തിഭ്രാന്ത് ഒട്ടും ഇഷ്ടമായിരുന്നില്ല. രാജകുമാരിയെ ഇതില്നിന്നും പിന്തിരിപ്പിക്കാന് കഴിവിന്റെ പരമാവധി ശ്രമിച്ചുവെങ്കിലും സാധിച്ചില്ല. മീര തന്റെ കൃഷ്ണഭക്തിയില് ഉറച്ചുനിന്നു.
അവസാനം സഹികെട്ട് രാജാവ് മീരാരാജകുമാരിയെ വിഷം കൊടുത്ത് കൊല്ലുവാന് ഉത്തരവിട്ടു. രാജാവ് നല്കിയ വിഷം രാജഭടന്മാര് മീരയ്ക്ക് നല്കി. സന്തോഷത്തോടെ വിഷം ഭഗവാന്റെ പ്രസാദമായി മനസ്സില് കരുതി പാനം ചെയ്തു.
ഈശ്വരാനുഗ്രഹത്താല് കൊടുംവിഷം അമൃതായി മാറി. രാജകുമാരി മരണത്തില്നിന്ന് രക്ഷപ്പെടുകയും ചെയ്തു. ഈശ്വരാര്പ്പിതമായ ഒരു മനസ്സ് ഉണ്ടെങ്കില് ഏത് കൊടും വിഷത്തേയും അമൃതാക്കി മാറ്റാമെന്ന് മീര നമ്മളെ പഠിപ്പിച്ചു.
ഭക്ത മീര കൃഷ്ണഭക്തിയില്നിന്ന് വിശ്വാസത്തിന്റെ ശക്തി സ്വന്തമാക്കി. അഗാധമായ ഈശ്വരവിശ്വാസം ദിവ്യാമൃതം പോലെയാണ്. അത് ഏത് കൊടുംവിഷത്തേയും അമൃതാക്കി മാറ്റും.
പ്രതികരിക്കാൻ ഇവിടെ എഴുതുക: