കുറ്റിയാടി: വൈവിധ്യമാണ് മനുഷ്യരാശിയുടെ പ്രത്യേകതയെന്നും വൈവിധ്യത്തെ ഇല്ലായ്മ ചെയ്യാന് ആര്ക്കും സാധിക്കുകയില്ലെന്നും വൈവിധ്യത്തെ പ്രദാനംചെയ്യുന്നതാണ് ഭാരതീയസനാതനധര്മ്മമെന്നും ഹിന്ദുഐക്യവേദി അധ്യക്ഷ കെ.പി. ശശികലടീച്ചര് പറഞ്ഞു. കുറ്റിയാടി ശ്രീകുഞ്ഞുമഠം മഹാദേവി മഹാവിഷ്ണുക്ഷേത്ര പ്രതിഷ്ഠാമഹോത്സവത്തിന്റെ ഭാഗമായി നടന്ന വിഗ്രഹഘോഷയാത്രയുടെ സമാപന ഭക്തജനസദസ്സില് സംസാരിക്കുകയായിരുന്നു അവര്. ആചാര വൈവിധ്യമാണ് സനാതനധര്മ്മത്തിന്റെ അടിസ്ഥാനം ഭാരതത്തിന്റെ സംസ്കാരം ലോകത്തിന് വഴികാട്ടിയായി ഇന്നും നശിക്കാതെ നിലനില്ക്കുന്നത് അതിന്റെ വൈവിധ്യംകൊണ്ടാണ് അവര് പറഞ്ഞു. ആചാരങ്ങളെയും സങ്കല്പങ്ങളെയും കുടുംബബന്ധങ്ങളെയും തകര്ത്തെറിയുന്ന പ്രവണത ഏറിവരികയാണെന്നും മക്കള് വഴിതെറ്റാതിരിക്കാന് അമ്മമാര് സനാതനധര്മ്മം അനുഷ്ഠിക്കണമെന്നും അവര് പറഞ്ഞു.
ഭാരതത്തില് ആചാരാനുഷ്ഠാനങ്ങളിലെ അവസാന വാക്ക് കോടതിയുടേതാവുന്നത് എങ്ങനെയാണ്.. കേരളത്തിലുടനീളം ഹിന്ദുഉണര്വ് ഇന്ന് ദൃശ്യമായിട്ടുണ്ട്. ഈ മാറ്റത്തെ ചൂഷണം ചെയ്യാന് ചിലര് ശ്രമിക്കുന്നുണ്ടെന്നും ഇതിനെ സനാതനധര്മ്മത്തിന്റെ പുനഃപ്രതിഷ്ഠയിലൂടെ ഹിന്ദുസമാജം നേരിടണമെന്നും അവര് പറഞ്ഞു. ക്ഷേത്രം പ്രസിഡന്റ് പി. പത്മനാഭന് അധ്യക്ഷത വഹിച്ചു. പി.സുകുമാരന് സ്വാഗതവും ടി.പ്രദീപന് നന്ദിയും പറഞ്ഞു.
പ്രതികരിക്കാൻ ഇവിടെ എഴുതുക: