കണ്ണൂര്: ജില്ലാ ഭരണകൂടത്തിന്റെ സഹകരണത്തോടെ ജില്ലാ ടൂറിസം പ്രൊമോഷന് കൗണ്സില് ഒരുക്കുന്ന കൃഷ്ണാജ്വല്സ് കണ്ണൂര് മഹോത്സവത്തിന് ഇന്ന് തുടക്കമാവും. അമ്യൂസ്മെന്റ് ഉള്പ്പെടെയുള്ള എക്സിബിഷന്റെ ഉദ്ഘാടനം ഇന്ന് കണ്ണൂര് എംപി പി.കെ.ശ്രീമതി നിര്വ്വഹിക്കും. മഹോത്സവത്തിന്റെ ഔദ്യോഗിക ഉദ്ഘാടനം നാളെ വൈകിട്ട് മന്ത്രി കെ.സി.ജോസഫ് നിര്വ്വഹിക്കും. എ.പി.അബ്ദുള്ളക്കുട്ടി എംഎല്എ അധ്യക്ഷത വഹിക്കും.
വിവിധ ദിവസങ്ങളിലായി നടക്കുന്ന സാംസ്കാരിക പരിപാടികളില് മേയര് ഇ.പി.ലത, ഡെപ്യൂട്ടി മേയര് സി. സമീര്, ജില്ലാ പഞ്ചായത്ത് പ്രസിഡന്റ് കാരായി രാജന്, മുന് മന്ത്രി കെ.സുധാകരന്, എം.വി.ജയരാജന്, മലബാര് ദേവസ്വം ബോര്ഡ് പ്രസിഡന്റ് സജീവ് മാറോളി, ട്രാവന്കൂര് കൊച്ചിന് കെമിക്കല്സ് ലിമിറ്റഡ് ചെയര്മാന് മാര്ട്ടിന് ജോര്ജ്, ജില്ലയിലെ എംഎല്എമാര്, എംപിമാര് തുടങ്ങിയവര് പങ്കാളികളാവും.
റിച്ച ശ്രീവാസ്തവയുടെ കഥക് നൃത്തത്തോടെയാണ് മഹോത്സവ പരിപാടികളുടെ തുടക്കം. ഭാവധാരാ പരിപാടിയില് തുടര്ന്ന് കലാസദന് സ്കൂള് ഓഫ് മ്യൂസിക് അവതരിപ്പിക്കുന്ന മ്യൂസിക് ഫ്യൂഷനും അരങ്ങേറും.
രണ്ടാം ദിവസമായ നാളെ മലയാള ചലച്ചിത്രഗാനരംഗത്തെ താരങ്ങളായ പി.സുശീലയും അമ്പിളിയും ചേര്ന്നവതരിപ്പിക്കുന്ന രാഗാദ്രരാവ് മ്യൂസിക് നൈറ്റ്, 7ന് നാട്യധാരാ പരിപാടിയില് പിലാത്തറ ലാസ്യ അവതരിപ്പിക്കുന്ന കുരുക്ഷേത്രം നൃത്തശില്പം, 8ന് നാട്ടുപൊലിമയില് നന്മ നാടന്കലാ നാട്ടറിവ് പഠനകേന്ദ്രം കാപ്പാട് അവതരിപ്പിക്കുന്ന ഗോത്രപൊലിമ, 9ന് മാസ്മരം പരിപാടിയില് ബാലന് നീലേശ്വരം അവതരിപ്പിക്കുന്ന ഫെന്റാസിയ മാജിക്ഷോ തുടര്ന്ന് സംവൃത് ഷജിന് അവതരിപ്പിക്കുന്ന നാടോടി നൃത്തം, 10ന് ലാസ്യസന്ധ്യയില് സിനിമാതാരം വിഷ്ണുപ്രിയയും സംഘവും അവതരിപ്പിക്കുന്ന ഡാന്സ്നൈറ്റ്. തുടര്ന്ന് കരോക്കെ ഗാനമേള, ഏഴാം ദിവസമായ 11ന് പല്പല് ദില്കെ പാസ് പരിപാടിയില് മുഹമ്മദ് അസ്ലം മുംബൈ ഒരുക്കുന്ന മുഹമ്മദ്റാഫി നൈറ്റ്, 12ന് എരഞ്ഞോളി മൂസയും പട്ടുറുമാല് ഫെയിം ബെന്സീറയും നയിക്കുന്ന ഇശല്നിലാവ്, 13ന് വെസ്റ്റേണ് മ്യൂസിക് ബാന്ഡ് ഡ്രാഗണ്സ് തുടര്ന്ന് വിനീഷ് കൂത്തുപറമ്പും സംഘവും അവതരിപ്പിക്കുന്ന കോമഡി ഷോ, സമാപനദിവസമായ നൂപുരത്തില് സിനിമാതാരം പാര്വ്വതി നമ്പ്യാര് അവതരിപ്പിക്കുന്ന ഡാന്സ്നൈറ്റ് എന്നിവ നടക്കും.
ഏഷ്യാനെറ്റ് കുക്കറി ഷോ ഫെയിം തെസ്നിം അസീസ് നയിക്കുന്ന ഫുഡ് ഫെസ്റ്റ്, അമ്യൂസ്മെന്റ്, റൈഡുകള്, എക്സിബിഷന് തുടങ്ങിയവയ്ക്ക് പുറമെ എല്ലാ ദിവസവും രാഷ്ട്രീയ, സാംസ്കാരിക, സാമൂഹ്യരംഗത്തെ പ്രമുഖരുടെ പരിപാടികളും മഹോത്സവത്തിന്റെ ഭാഗമായി ഒരുക്കിയിട്ടുണ്ട്.
പ്രതികരിക്കാൻ ഇവിടെ എഴുതുക: