കോഴിക്കോട്: കേന്ദ്ര ടെക്സ്റ്റൈല് മന്ത്രാലയത്തിന്റെയും സംസ്ഥാന കൈത്തറി വസ്ത്ര ഡയറക്ട്രേറ്റിന്റെയും സംയുക്താഭിമുഖ്യത്തില് നടത്തുന്ന ദേശീയ കൈത്തറി മേള 13ന് അരയിടത്തുപാലം തെക്കാട്ട് ഗ്രൗണ്ടില് ആരംഭിക്കും. നൂറ് സ്റ്റാളുകളാണ് മേളയില് ഒരുക്കുക. സംസ്ഥാനത്തെ കൈത്തറി യൂണിറ്റുകള് കൂടാതെ 12 സംസ്ഥാനങ്ങളിലെ കൈത്തറി സംഘങ്ങളും മേളക്കെത്തും.
കൈത്തറി ഉല്പാദനത്തെക്കുറിച്ച് പൊതുജനങ്ങളില് അവബോധം സൃഷ്ടിക്കുന്നതിനായി തീം പവലിയനും ഒരുക്കുന്നുണ്ട്. മേളയുടെ ഭാഗമായി സെമിനാര്, ബയര് സെല്ലര് മീറ്റ്, കലാസംസ്കാരിക പരിപാടികള് തുടങ്ങിയവ സംഘടിപ്പിക്കും. കേരള സര്ക്കാര് 20 ശതമാനം റിബേറ്റ് പ്രത്യേകമായി നല്കുന്നുണ്ട്. മേളയുടെ ആകര്ഷണത്തിനായി ഉപഭോക്താക്കള്ക്കായി നറുക്കെടുപ്പുകളും ഏര്പ്പെടുത്തിയിട്ടുണ്ട്.
13ന് രാവിലെ 11.30ന് മന്ത്രി പി.കെ. കുഞ്ഞാലിക്കുട്ടി മേള ഉദ്ഘാടനം ചെയ്യുമെന്ന് ഹാന്വീവ് ചെയര്മാന് യു.സി. രാമന് വാര്ത്താസമ്മേളനത്തില് അറിയിച്ചു. ഹാന്വീവ് മാനേജിംഗ് ഡയറക്ടര് എ.എസ്. മുഹമ്മദ് ഷെരീഫ്, വ്യവസായ കേന്ദ്രം ജനറല് മാനേജര് സൈമണ് സക്കറിയ, പ്രൊഡക്ഷന് മാനേജര് ബാബുരാജ്, സുധീപ്, അബൂട്ടി എന്നിവരും വാര്ത്താസമ്മേളനത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: