കൊച്ചി: ഒരു മിനിറ്റില് ഏറ്റവുമധികം പുഷ് അപ് എന്ന റെക്കോഡ് പ്രകടനം നടത്തി മൂന്നാര് സ്വദേശി ഡോ. കെ.ജെ. ജോസഫ്. നിലവിലെ ലോക റെക്കോഡായ 79 പുഷ് അപ് എന്ന അമേരിക്കക്കാരന് റോണ് ഹൂപ്പറുടെ പേരിലുള്ള പ്രകടനമാണ് 82 ആക്കി ജോസഫ് പുതുക്കിയത്. മൂന്ന് മാസത്തോളം നീളുന്ന നടപടി ക്രമങ്ങള്ക്ക് ശേഷം ഗിന്നസ് അധികൃതര് ഔദ്യോഗിക അറിയിപ്പ് പുറത്തിറക്കും.
എരുമേലി ചാത്തന്തറ സ്വദേശിയും മൂന്നാറില് ആയുര്വേദ സെന്റര് മാനേജറുമായ ജോസഫ്, പാലും മുട്ടയും മാംസവും ജിംനേഷ്യവുമില്ലാതെ കായികക്ഷമത നിലനിര്ത്താമെന്നു തെളിയിക്കുകയാണ് ചെയ്തത്. എറണാകുളം ടൗണ്ഹാളില് സംഘടിപ്പിച്ച ചടങ്ങില് ജില്ലാ കലക്ടര് എം.ജി. രാജമാണിക്യം ഉള്പ്പെടെയുള്ളവരുടെ സാന്നിധ്യത്തിലാണ് ജോസഫ് പ്രകടനം കാഴ്ചവച്ചത്.
ജില്ലാ കളക്ടര് എം.ജി രാജമാണിക്യം, യു ആര് എഫ് ഏഷ്യ റെക്കോഡ്സ് ഇന്ത്യന് ജൂറി മേധാവി ഡോ. സുനില് ജോസഫ്, ഗിന്നസ് റെക്കോഡ് ജേതാവ് ഡോ. മാടസ്വാമി, എ.എം.എ മേധാവി ഷിഹാന് ജോര്ജ് റോജി ആന്റണി, നോട്ടറി അഡ്വ. ബേബി, യു ആര് എഫ് പ്രതിനിധികളായ അബെഴ്സ് പി ഡോമിനിക്, ലിജോ ജോര്ജ്, വി.ടി. ജോളി, കോ ഓര്ഡിനേറ്റര് എം.സെന്തില്കുമാര് എന്നിവരുടെ സാന്നിധ്യത്തിലാണ് ഡോ. ജോസഫ് റെക്കോഡിലേക്ക് പുഷ് അപ് എടുത്തത്.
മണിക്കൂറില് 2092 പുഷ് അപ് എടുത്തു യൂണിവേഴ്സല് റെക്കോര്ഡ് ഫോറത്തിലും അഞ്ചു സെക്കന്റില് മൂന്ന് ഇരുമ്പു കമ്പി ഒടിച്ച് റെക്കോര്ഡ്സ് സെന്റര് അമേരിക്കയിലും പേരെഴുതിച്ചേര്ത്ത ജോസഫ് ഇന്ത്യ ബുക്ക് ഓഫ് റെക്കോര്ഡ്സിലും ഇടം കണ്ടിട്ടുണ്ട്. ഗിന്നസ്സ് ബുക്ക് ഓഫ് റെക്കാഡ്സ്, യു.ആര് ,എഫ്, ഏഷ്യന് റെക്കാര് ഡ്സ് എന്നിവയില് ഇടം നേടാനാണ് സാഹസിക പ്രകടനം നടത്തിയത്.
ഡോ. ജോസഫിന്റെ ജീവിതചര്യയേയും പ്രായോഗിക വീക്ഷണങ്ങളേയും ആസ്പദമാക്കി ജീവനാരോഗ്യപ്രസ്ഥാനം ഇടുക്കി ജില്ല കണ്വീനര് ജോര്ജ് തോമസ് രചിച്ച പുസ്തകം ‘ഇന്ത്യന് ബ്രൂസ്ലി’യുടെ പ്രകാശനവും വേദിയില് നടന്നു.
പ്രതികരിക്കാൻ ഇവിടെ എഴുതുക: