സഞ്ചരിക്കുന്ന ആര്‍ടി ഓഫീസ് ആരംഭിക്കുമെന്ന്

Friday 4 March 2016 9:07 pm IST

ആലപ്പുഴ: ഇ-സേവന സൗകര്യങ്ങളുമായി വാഹനത്തില്‍ നിശ്ചിത ദിവസം നിശ്ചയിക്കപ്പെട്ട സ്ഥലങ്ങളില്‍ എത്തി മോട്ടോര്‍ വാഹന വകുപ്പിന്റെ സേവനം നല്‍കുന്ന സംവിധാനം ആരംഭിക്കുന്നത് വകുപ്പിന്റെ സജീവ പരിഗണനയിലാണെന്ന് ട്രാന്‍സ്‌പോര്‍ട്ട് കമ്മിഷണര്‍ ടോമിന്‍ ജെ. തച്ചങ്കരി പറഞ്ഞു. മോട്ടോര്‍ വാഹന വകുപ്പിന്റെ ആഭിമുഖ്യത്തില്‍ കുടുംബശ്രീയുടെ സഹകരണത്തോടെ ആലപ്പുഴ ആര്‍.ടി. ഓഫീസിനോട് ചേര്‍ന്ന് ആരംഭിക്കുന്ന ഇ-സേവാകേന്ദ്രത്തിന്റെ ഉദ്ഘാടനം നിര്‍വഹിച്ച് പ്രസംഗിക്കുകയായിരുന്നു അദ്ദേഹം. മോട്ടോര്‍ വാഹന വകുപ്പില്‍ ഇടനിലക്കാരെ ഒഴിവാക്കുകയാണ് സര്‍ക്കാര്‍ നയം. വകുപ്പിന്റെ കൂടുതല്‍ സേവനങ്ങള്‍ ഓണ്‍ലൈനാക്കി കൊണ്ടിരിക്കുകയാണ്. സംസ്ഥാനത്തെ എല്ലാ ആര്‍ടിഒ, സബ് ആര്‍ടിഒകളിലും ഇ-സേവാകേന്ദ്രങ്ങള്‍ തുറക്കാന്‍ നടപടിയെടുത്തുവരുന്നതായി തച്ചങ്കരി പറഞ്ഞു. ജില്ലയില്‍ ആലപ്പുഴ റീജണല്‍ ട്രാന്‍സ്‌പോര്‍ട്ട് ഓഫീസിലും കായംകുളം, മാവേലിക്കര, ചെങ്ങന്നൂര്‍, ചേര്‍ത്തല ജോയിന്റ് റീജണല്‍ ട്രാന്‍സ്‌പോര്‍ട്ട് ഓഫീസുകളിലുമാണ് കുടുംബശ്രീ ഇ-സേവാകേന്ദ്രങ്ങള്‍ ആരംഭിക്കുന്നത്. മോട്ടോര്‍ വാഹന വകുപ്പുമായി ബന്ധപ്പെട്ട എല്ലാ സേവനങ്ങളും ഇനി മുതല്‍ ഇ-സേവാകേന്ദ്രങ്ങള്‍ വഴി ലഭിക്കും. ജില്ലാ കളക്ടര്‍ ആര്‍. ഗിരിജ, ജില്ലാ പൊലീസ് മേധാവി പി. അശോക് കുമാര്‍, റീജണല്‍ ട്രാന്‍സ്‌പോര്‍ട്ട് ഓഫീസര്‍ എബി ജോണ്‍, ജില്ലാ മിഷന്‍ കോ-ഓര്‍ഡിനേറ്റര്‍ ഡോ. ഐ.എം. മുഹ്‌സിന്‍കോയ എന്നിവര്‍ പങ്കെടുത്തു. കുടുംബശ്രീ ഇ-സേവാകേന്ദ്രം ഹെല്‍പ്പ്‌ലൈന്‍ നമ്പര്‍: ആലപ്പുഴ-9744111460, കായംകുളം-9497338703, മാവേലിക്കര-8301823245, ചേര്‍ത്തല-9846459526, ചെങ്ങന്നൂര്‍-9446347662. അപേക്ഷ തയാറാക്കി നല്‍കുന്നതിന് നിലവിലുള്ള സേവനത്തിന് നിശ്ചയിച്ച ഫീസിനു പുറമേ 20 രൂപ കൂടി നല്‍കണം. അപേക്ഷയുടെ പ്രിന്റ് വേണമെങ്കില്‍ രണ്ടുരൂപ നല്‍കണം.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.