കോട്ടയം: കുമരകത്ത് രാത്രികാലങ്ങളില് വാഹനങ്ങള് തകര്ക്കുന്നത് പതിവാകുന്നു. കഴിഞ്ഞ ദിവസം അര്ദ്ധരാത്രിയില് കുമരകം മുണ്ടയില് വീട്ടില് കലേഷിന്റെ മാരുതി വാനിന്റെ ടയറുകള് സാമൂഹിക വിരുദ്ധര് കുത്തിക്കീറി. പള്ളിച്ചിറ മുപ്പത്തിയെട്ടാം നമ്പര് എസ്എന്ഡിപി ശാഖയ്ക്ക് സമീപം പാര്ക്ക് ചെയ്തിരുന്ന വാഹനത്തിന്റെ ടയറുകളുമാണ് സാമൂഹിക വിരുദ്ധര് കുത്തിക്കീറിയത്. വാഹനത്തിന്റെ പുതിയ ടയറുകള് കത്തി ഉപയോഗിച്ചാണ് കുത്തിക്കീറിയത്. രണ്ട് മാസം മുമ്പ് കലേഷിന്റെ ഉടമസ്ഥതയിലുള്ള ഈ വാഹനത്തിന്റെ ചില്ലുകള് അക്രമി സംഘം അടിച്ചു തകര്ത്തിരുന്നു. കലേഷ് കുമരകം പോലീസ് സ്റ്റേഷനില് പരാതി നല്കി.
രണ്ട് മാസം മുമ്പ് ഇതേ സ്ഥലത്ത് പാര്ക്ക് ചെയ്തിരുന്ന ശാസ്താംപറമ്പില് ബിജുവിന്റെ വാഹനത്തിനു നേരെയും അക്രമം നടന്നിരുന്നു. കുടിവെള്ള വിതരണത്തിനായി ഉപയോഗിച്ചിരുന്ന മിനി ലോറിയുടെ മുന്വശത്തെ ചില്ലുകളാണ് ഇവര് തല്ലിത്തകര്ത്തത്. നിരവധി തവണ ഇത്തരത്തില് തന്റെ വാഹനത്തിനു നേരെ അക്രമം നടത്തിയിട്ടുള്ളതായി ബിജു പറയുന്നു. ഈ പ്രദേശത്ത് രാത്രി കാലങ്ങളില് സാമൂഹിക വിരുദ്ധരുടെ ശല്യം രൂക്ഷമാണ്. സംഘം ചേര്ന്ന് മദ്യപിക്കുന്ന ഇക്കൂട്ടര് നിരവധി പൊതുമുതലുകള് നശിപ്പിക്കുന്നതായും പരാതി ഉയരുന്നുണ്ട്. കുമരകം ഭാഗങ്ങളില് കഞ്ചാവും മയക്കുമരുന്നും വില്പ്പന നടക്കുന്നതായും പരാതി ഉണ്ട്. അക്രമം നടന്ന സ്ഥലങ്ങളിലെല്ലാം ഒഴിഞ്ഞ മദ്യക്കുപ്പികളും ലഹരിപദാര്ത്ഥങ്ങളും കണ്ടെത്തിയിരുന്നതായും നാട്ടുകാര് പറയുന്നു.
പ്രതികരിക്കാൻ ഇവിടെ എഴുതുക: