കണ്ണൂര്: വാഗ്ഭടാചാര്യ പാരമ്പര്യ വൈദ്യവേദി കണ്ണൂര് കൗസര് കോംപ്ലക്സില് വൈദ്യപഠന ക്ലാസ് ആരംഭിച്ചു. ചരക സംഹിത, നാട്ടുവൈദ്യം, മര്മ്മ ചികിത്സ, കളരി ചികിത്സ, വൃക്ഷായുര്വ്വേദം, ബാലചികിത്സ, വിഷചികിത്സ, മാനുസിക ചികിത്സ, മുതലായ വിജ്ഞാന മേഖലകളില് പ്രവീണരായ ഡോ.പി.മനോഹരന്, സി.എം.രാമചന്ദ്രന്, കെ.കെ.വടകര മുതലായവര് വിവിധ വിഷയങ്ങളില് ക്ലാസുകള് നയിച്ചു. പാരമ്പര്യ വേദ്യന്മാരെ തിരസ്കരിക്കുകയും വ്യാജന്മാര് എന്നു മുദ്രകുത്തുകയും ചെയ്യുന്ന സര്ക്കാരിന്റെ നയവൈകല്യം തിരുത്തിക്കാന് ഏറ്റവും നല്ല മാര്ഗ്ഗം വൈദ്യശാസ്ത്ര ഗ്രന്ഥങ്ങളിലും ചികിത്സാ രീതികളിലും അഗാധമായ പാണ്ഡിത്യം നേടുകയും അത് അധികാരികളെ ബോധ്യപ്പെടുത്തുകയുമാണെന്ന് മുഖ്യ രക്ഷാധികാരി എന്.കെ.കൃഷ്ണന് വെളിപ്പെടുത്തി.
ആയുര്വ്വേദ വൈദ്യന്മാരുടെയും നാട്ടുവൈദ്യരുടെയും ഒറ്റമൂലി ചികിത്സകരുടെയും മര്മ്മ ചികിത്സകരുടെയും ബാലചികിത്സ, വിഷചികിത്സ, മാനസിക ചികിത്സ എന്നിവയില് പ്രഗത്ഭരായവരുടെയും ഡയറക്ടറി പ്രസിദ്ധീകരിക്കുക, യുവാക്കളെ ഭാരതീയ ചികിത്സാ രീതി പഠിപ്പിക്കുക, സംസ്കൃതം, ഇംഗ്ലീഷ് തുടങ്ങിയ ഭാഷകള് കൈകാര്യം ചെയ്യാന് പരിശീലിപ്പിക്കുക, ശരീര ശാസ്ത്രം വിശദമായി പഠിപ്പിക്കുക, ഔഷധ സസ്യ കൃഷി പ്രചരിപ്പിക്കുക ഇതൊക്കെയാണ് പാരമ്പര്യ വൈദ്യവേദിയുടെ അടിയന്തിര ലക്ഷ്യങ്ങളെന്ന് ഭാരവാഹികളായ പുഷ്പജന് വൈദ്യര്, കെ.കെ.നാണു, പങ്കജാ മനോജ് എന്നിവര് അഭിപ്രായപ്പെട്ടു.
പ്രതികരിക്കാൻ ഇവിടെ എഴുതുക: