മാരുതി വന്നു പറഞ്ഞകാര്യങ്ങള് കേട്ട് ശ്രീരാമചന്ദ്രന് സന്തുഷ്ടനായി എന്നിട്ടു പറഞ്ഞു. ”ദേവന്മാര്ക്കുപോലും ചെയ്യാന് കഴിയാത്ത കാര്യമാണ് വായുപുത്രന് ചെയ്തത്. ഭൂമിയിലുള്ള ഒരു വ്യക്തിക്ക് ചിന്തിക്കാന്പോലും കഴിയാത്ത ഒരുകാര്യമാണ് ഹനുമാന് നമുക്കുവേണ്ടി ചെയ്തിരിക്കുന്നത്. നൂറുയോജന വിസ്താരമുള്ള സമുദ്രം ചാടിക്കടക്കാനും രാക്ഷസവീരയെയൊക്കെ വധിച്ച് ലങ്കയെ ചുട്ടുകരിക്കാനും ആര്ക്കു സാധിക്കും.? ഹനുമാന് സുഗ്രീവന്റെ യഥാര്ത്ഥ സേവകനാണെന്നു തെളിയിച്ചിരിക്കുന്നു. ലോകത്തില് ഇങ്ങനെയൊരാള് ഇതുവരെയുണ്ടായിട്ടില്ല. ഇനി ഉണ്ടാകാനും പോകുന്നില്ല.
ഹനുമാന് ജാനകിയെ കണ്ടുവന്നതിനാല് ഇന്ന് എന്നെയും രഘുവംശത്തെയും ലക്ഷ്മണനേയും സുഗ്രീവനേയും രക്ഷിച്ചിരിക്കുന്നു.
ചെയ്യാന് പ്രയാസമുള്ള ഒരു പ്രവൃത്തി യജമാനന് ഏല്പിച്ചാല് അതു സന്തോഷകരമായി ചെയ്തുതീര്ക്കുന്ന ഭൃത്യനെ പുരുഷോത്തമന് എന്നുപറയുന്നു. രാജാവ് ഉത്തമമായ ഒരു പ്രവൃത്തിയേല്പിച്ചാല് അത് രാജാവിനു സന്തോഷകരമായി ചെയ്യാത്ത ഭൃത്യനെ അയാള് യോഗ്യനാണെങ്കില്പോലും മദ്ധ്യമന് എന്നാണുപറയുക. രാജാവ് ഏല്പ്പിക്കുന്ന കാര്യം ശ്രദ്ധയോടുകൂടി ചെയ്യാത്ത ഭൃത്യനെ യോഗ്യനും സമര്ത്ഥനുമാണെങ്കില്പോലും പുരുഷാധമന് എന്നാണു പറയുക. ഇവിടെ മാരുതി പുരുഷോത്തമനായിത്തീര്ന്നിരിക്കുന്നു.
അതൊക്കെയിരിക്കട്ടെ ജാനകിയെ കൊണ്ടുവരണമെങ്കില് സമുദ്രം തരണം ചെയ്യണം. മുതലകളും ഭീകരജീവികളും നിറഞ്ഞ നൂറുയോജന വിസ്താരമുള്ള സമുദ്രത്തിനക്കരെയെത്തി ഞാന് ശത്രുവിനെ കൊല്ലുന്നതെങ്ങനെ? ദേവിയെ ഞാനിനിയെന്നുകാണും?”
ഇതുകേട്ട് സുഗ്രീവന് പറഞ്ഞു: ”ആവലിയ സമുദ്രം ഞങ്ങളെല്ലാവരും ചാടിക്കടന്ന് അക്കരെയെത്തി ലങ്ക തകര്ത്ത് രാവണനെ കുലത്തോടെ കൊല്ലും. ഹേ ലഘുനന്ദന, അങ്ങു ചിന്ത വെടിയുക, ചിന്ത കാര്യത്തിനു വിഘ്നമുണ്ടാക്കും.
നോക്കൂ, മഹാപരാക്രമികളായ ഈ വാനരവീരരെ ജയിക്കാന് ആര്ക്കും സാധ്യമല്ല. അങ്ങേക്കുവേണ്ടി ഇവര് തീയില് ചാടാനും തയ്യാറാണ്. നമുക്കാദ്യം സമുദ്രം കടക്കുന്ന കാര്യം ആലോചിക്കുക. ലങ്ക കണ്മുന്നിലായാല് രാവണന് മരിച്ചതായി കണക്കാക്കാം. ഹേ രാഘവ, അങ്ങു ധനുസ്സു കൈയിലെടുത്താല് യുദ്ധത്തില് അങ്ങയെ വെല്ലാന് ഈ ത്രിലോകത്തില് ആരും തന്നെയില്ല. സകലയിടത്തും ശുഭശകുനങ്ങള് കാണുന്നു. അങ്ങ് അസ്ത്രം പ്രയോഗിച്ച് സമുദ്രം വറ്റിക്കുക. അല്ലെങ്കില് അസ്ത്രംകാണ്ട് അണകെട്ടാം. സുഗ്രീവന്റെ ഭക്തിയും ആത്മാര്ത്ഥതയും കണ്ട് ശ്രീരാമന് സന്തോഷിച്ചു. ലങ്കയെപ്പറ്റി ഒരു വിവരണം നല്കാന് ഹനുമാനോട് പറഞ്ഞു. യുദ്ധത്തിനു പുറപ്പെടുംമുമ്പ് ശത്രുവിന്റെ ശക്തി ശരിക്കും അറിഞ്ഞിരിക്കണമില്ലേ?
പ്രതികരിക്കാൻ ഇവിടെ എഴുതുക: