ന്യൂയോര്ക്ക് സിറ്റി: കരസേന മേധാവി ജനറല് ദല്ബീര് സിങ് സുഹാഗ് ഐക്യരാഷ്ട്രസഭ സെക്രട്ടറി ജനറല് ബാന് കി മൂണുമായി കൂടിക്കാഴ്ച നടത്തി. ഭാരത സമാധാനസംരക്ഷകരോടുള്ള ആദരവ് മൂണ് കൂടിക്കാഴ്ചയില് പ്രകടിപ്പിച്ചു. ഐക്യരാഷ്ട്രസഭയുടെ സമാധാന ദൗത്യങ്ങളില് ഭാരത സമാധാന സേനയുടെ പ്രതിജ്ഞാബദ്ധതയും സിങ് ഉറപ്പ് നല്കി. യുഎന്നിന്റെ ഉയര്ന്ന നിലവാരത്തിലുള്ള പരിശീലനം തുടരുമെന്നും കരസേനാ മേധാവി വ്യക്തമാക്കി. ഭാരത സമാധാനാസേന മികച്ച സംഭാവനകളാണ് യുഎന്നിന് നല്കിയിട്ടുള്ളത്.
ലൈംഗിക അതിക്രമങ്ങളില് ഒന്നും ഉള്പ്പെടാതെ ഉയര്ന്ന നിലവാരമാണ് സൈന്യം പുലര്ത്തിയതെന്നും യുഎന് വ്യക്തമാക്കി. യുഎന്നിന്റെ സമാധാനദൗത്യങ്ങളില് ഭാരതം സ്ഥിരമായി നല്കുന്ന പിന്തുണയില് കരസേനാ മേധാവിയെയും യുഎന്നിലെ ഭാരത പ്രതിനിധി സയ്യിദ് അക്ബറുദീനെയും മൂണ് അഭിനന്ദിച്ചു. ഇപ്പോള് 7,695 ഭാരത സേനാംഗങ്ങള് യുഎന് ദൗത്യത്തില് പങ്കെടുക്കുന്നുണ്ട്.
ഇതുവരെ 1,80,000 സൈനികര് 48 ദൗത്യങ്ങളിലായി പങ്കെടുത്തിട്ടുണ്ട്. കഴിഞ്ഞ സപ്തംബറില് യുഎന് ദൗത്യങ്ങള്ക്കായി 850 സേനാംഗങ്ങളെയും വനിതകള് ഉള്പ്പടെയുള്ള മൂന്ന് പോലീസ് യൂണിറ്റുകളെയും നല്കാമെന്ന് പ്രധാനമന്ത്രി നരേന്ദ്ര മോദി വാഗ്ദാനം നല്കിയിരുന്നു.
പ്രതികരിക്കാൻ ഇവിടെ എഴുതുക: