കാഞ്ഞിരപ്പള്ളി: ക്ഷീരകര്ഷകരെ സഹായിക്കാന് പശുവളര്ത്തല് തൊഴില് ഉറപ്പ് പദ്ധതിയില് ഉള്പ്പെടുത്തുന്നതിന് കേന്ദ്രഗവണ്മെന്റില് സമ്മര്ദ്ദം ചെലുത്തുമെന്ന് കാഞ്ഞിരപ്പള്ളി മണ്ഡലം എന്ഡിഎ സ്ഥാനാര്ത്ഥി വി.എന്. മനോജ്. കാഞ്ഞിരപ്പള്ളി പ്രസ് സെന്റര് സംഘടിപ്പിച്ച ജനവിധി 2016ല് പങ്കെടുത്ത് സംസാരിക്കുകയായിരുന്നു അദ്ദേഹം.
ഉത്പന്നങ്ങള് വില്ക്കുമ്പോള് ഉല്പാദന ചിലവിനനുസരിച്ച് കര്ഷകന് ന്യായവില ലഭിക്കുന്നതിന് ചെറുകിട സംഭരണ കേന്ദ്രങ്ങള് ആരംഭിച്ച് കയറ്റുമതി ചെയ്യുന്നതിനുള്ള പദ്ധതി മണ്ഡലത്തില് നടപ്പിലാക്കും. റബ്ബറിന്റെ വിലയിടിവ് തടയാന് ഈ രംഗത്തെ പ്രതിസന്ധികളെക്കുറിച്ച് പഠിക്കാന് ബിജെപി ദേശീയ നേതൃത്വം അല്ഫോണ്സ് കണ്ണന്താനത്തെ ചുമതലപ്പെടുത്തിയിട്ടുണ്ട്. 4000 കോടി രൂപയുടെ പ്രോജക്ട് തയ്യാറാക്കി ഉടന് ഗവണ്മെന്റിന് സമര്പ്പിക്കും. ഇതുവഴി കര്ഷകര്ക്ക് കഴിയുന്നത്ര പ്രയോജനം ലഭിക്കുന്നതിന് ദേശീയ നേതൃത്വം ശ്രമം ആരംഭിച്ചതായും വി.എന്.മനോജ് പറഞ്ഞു.
കുടുംബശ്രീയുമായി ബന്ധപ്പെടുത്തി ചെറുകിട സ്വയം തൊഴില് പദ്ധതികള് ആരംഭിക്കും. മണ്ഡലത്തിലെ പ്രധാന പ്രശ്നമായ കുടിവെള്ള ക്ഷാമം പരിഹരിക്കുന്നതിന് മുന്ഗണന നല്കും. ജലനിധി പദ്ധതിയില് ഉള്പ്പെടുത്തി മണ്ഡലത്തിലെ എല്ലാ വീടുകളിലും കുടിവെള്ളമെത്തിക്കുന്നതിനുള്ള നടപടികള് സ്വീകരിക്കുമെന്നും എന്ഡിഎ സ്ഥാനാര്ത്ഥി പറഞ്ഞു.
പ്രതികരിക്കാൻ ഇവിടെ എഴുതുക: