ഗ്ലാമര് പറഞ്ഞാല് വോട്ടു കിട്ടുമോ? കിട്ടുമെന്നാണ് ജില്ലയുടെ തെക്കന് മണ്ഡലത്തിലെ ഇടതു സഖാക്കളുടെ മതം. ഗതികേട് നോക്കണേ….. മണ്ഡലത്തിലെ സ്ഥാനാര്ത്ഥിക്ക് വോട്ട് അഭ്യര്ത്ഥിച്ചെത്തുന്ന കുട്ടിസഖാക്കള് മുതല് തലനരച്ച സഖാക്കള്വരെ വോട്ടു പിടിക്കുന്നത് ഇപ്പോള് ഇങ്ങനെയാ…..
കാണാന് കൊള്ളാവുന്നൊരു കൊച്ചല്ലേ… വിദ്യാഭ്യാസമില്ലേ… ഇടത്തരം കുടുംബത്തില് ജനിച്ചതല്ലേ,,,അല്പസ്വല്പം കലാ കായിക രംഗങ്ങളില് ശോഭിക്കുന്നില്ലേ, സ്വന്തം കഴിവുകൊണ്ട് ജില്ലാ പഞ്ചായത്ത് നിയന്ത്രിച്ചതല്ലേ… ഇത്രയും കേട്ടപ്പോള് ഈ ഉള്ളവന് ഒരു സംശയം.. ഇത് തെരഞ്ഞെടുപ്പോ… അതോ… കല്യാണാലോചനയോ?
മലയാളത്തില് ഒരു സിനിമ ഇറങ്ങിയിരുന്നു. ബന്ധുക്കള് ശത്രുക്കള്. എന്നാലിപ്പോള് ഇക്കാര്യം ഇവിടെ പറയാന് കാരണമെന്തെന്നല്ലേ? ഉണ്ട്. കാര്യമുണ്ട്. ഇതില് ഒരു ഗാനമുണ്ട്. ആലപ്പുഴ പട്ടണത്തില് അതിമധുരം വിതറിയോളെ, കണ്ണും കണ്ണും കഥപറഞ്ഞു കടംകഥയില് മനം നിറഞ്ഞു, കൊതിപ്പിച്ചു കടന്നതെന്തേ കുട്ടനാട്ടുകാരി….
ഇപ്പോള് ഓര്മ്മ വരുന്നുണ്ടല്ലേ…. വീണ്ടും ചോദ്യം ഈ മണ്ഡലത്തില് ഇതിന്റെ പ്രസക്തി? അതാണ് പറഞ്ഞുവരുന്നത്. പാര്ട്ടിയിലെ തലമുതിര്ന്ന കാരണവരുടെ കളരിയിലെ പ്രമുഖരും തുണക്കാരുമായിരുന്നല്ലോ ഓണാട്ടുകരയിലെ കവിസഖാവും കുട്ടനാട്ടിലെ വള്ളംകളി സഖാവും. രണ്ടുപേരും തോളോടു തോള് ഉരുമ്മി കാരണവരുടെ കൂടെ നിന്നു.
നാളുകള് പലതു കടന്നു. അങ്കങ്ങള് പലതു കഴിഞ്ഞു. ഇതിനിടയില് ഓണാട്ടുകര സഖാവ് പഴയ കളരി ആശാനെ ചതിച്ച് അരിങ്ങോടരുടെ കൂട്ടത്തില് ചേക്കേറി കാരണവരെ കൊല്ലാക്കൊല ചെയ്തുകൊണ്ടേയിരിക്കുന്നു. ഇടയ്ക്ക് കാര്ന്നോരോട് സ്നേഹം കൂടും. അത് സ്വന്തം തട്ടകം ഉറപ്പിക്കുന്നതിനുള്ള ഒരടവ് മാത്രം.
ഓണാട്ടുകര സഖാവിന്റെ പ്രിയ ശിഷ്യ കുട്ടനാട്ടിലെ പുത്തനാര്ച്ചയ്ക്ക് പുത്തരി അങ്കം കുറിക്കാന് പഴയ സതീര്ത്ഥ്യന്റെ തട്ടകം വെട്ടിനിരത്തി ശിഷ്യക്ക് അങ്കം കുറിക്കാനുള്ള തറ ഉറപ്പിച്ചു. സതീര്ത്ഥ്യന് വഴിയാധാരമായി പണ്ട് ഒരുമിച്ച നടന്നതല്ലേയെന്ന് കരുതി കുട്ടനാട് ചേകവരെ പുത്തനാര്ച്ചയ്ക്ക് തുണപോകാന് നിയോഗിച്ചു. ഒരുതരം തരംതാഴ്ത്തല് അടവ്. കാരണവരെ പിന്നില് നിന്ന് കുത്തി അരിങ്ങോടര്ക്കൊപ്പം പോയതില് കാരണവര്ക്കും സതീര്ത്ഥ്യനും അമര്ഷമുണ്ടുതാനും. എങ്കിലും പഴയ ചങ്ങാതിയുടെ ഇപ്പോഴത്തെ നിലയില് ഒന്നും ചെയ്യാനും കഴിയില്ല.
എന്നാല് കാര്യങ്ങളുടെ കിടപ്പ് അത്ര പന്തിയല്ലെന്ന് ഓണാട്ടുകര സഖാവിന് തോന്നിത്തുടങ്ങി. അതിന് ഒതു തടയിടാനാണ് ഓണാട്ടുകര ചേകവരുടെ നിര്ദ്ദേശപ്രകാരമാണ് കായംകുളത്തെ അങ്കത്തട്ടിലെ ഗ്ലാമര് അടവെന്നാണ് പാണരും കൂട്ടരും പാടി നടക്കുന്നതെന്നാണ് നാട്ടാര് പറയുന്നത്. എന്തൊരോ മഹാനുഭാവലൂ…….
പ്രതികരിക്കാൻ ഇവിടെ എഴുതുക: