കൊയ്‌തൊഴിഞ്ഞ പാടത്ത് ദേശാടനപക്ഷികള്‍ വിരുന്നെത്തി

Sunday 17 April 2016 9:01 pm IST

എടത്വാ: കുട്ടനാട്ടിലെ കൊയ്‌തൊഴിഞ്ഞ പാടത്ത് ദേശാടനപക്ഷികള്‍ വിരുന്നെത്തി. കൊയ്ത് കഴിഞ്ഞ പാടത്ത് വിവിധ ഇനത്തില്‍പെട്ട പക്ഷികളാണ് തീറ്റ തേടിയെത്തുന്നത്. വംശനാശ ഭീഷണിനേരിടുന്ന പക്ഷികള്‍ മുതല്‍ പാടത്തെ സ്ഥിരം വിരുന്നുകാരായ കൊക്ക്മുണ്ടികള്‍ വരെ ഇക്കൂട്ടത്തില്‍പെടുന്നു. കൊയ്ത് കഴിഞ്ഞ് വെള്ളം കയറ്റിയ പാടത്താണ് കൂടുതല്‍ കണ്ടുവരുന്നത്. വേഴാമ്പല്‍, മഞ്ഞകൊക്ക്, താമരകോഴി, കുളക്കോഴി, ചാരക്കോഴി, എരണ്ട എന്നിവര്‍ പാടത്തെ സ്ഥിരം സന്ദര്‍ശകരായി മാറി. കുട്ടനാട്ടില്‍ കൃഷിയുടെ ആരംഭത്തിലും വിളവെടുപ്പ് കഴിയുമ്പോഴുമാണ് വിദേശയിനം പക്ഷികളുള്‍പെടെ ആയിരക്കണക്കിന് പക്ഷികള്‍ എത്തുന്നത്. നദിയിലെ ചെറുമീനുകള്‍ ഇഷ്ടഭക്ഷണമായ ഇവര്‍ കൂട്ടംകൂടിയാണ് ഇരതേടാന്‍ വരുന്നത്. പൊന്തക്കാടുകളില്‍ രാത്രി ചേക്കേറാനെത്തുന്ന പക്ഷികള്‍ രാവിലെ ഇരതേടുന്നത് കൊയ്ത് കഴിഞ്ഞ പാടത്താണ്. കൂട്ടമായെത്തുന്ന പക്ഷികളെ വീക്ഷിക്കാനും ചിത്രമെടുക്കാനും വിവിധ സ്ഥലങ്ങളില്‍ നിന്ന് ആളുകള്‍ കുട്ടനാട്ടില്‍ എത്താറുണ്ട്. വര്‍ഷങ്ങളായി കാടുപിടിച്ച് കിടക്കുന്ന പ്രദേശങ്ങള്‍ ഇവര്‍ സങ്കേതമാക്കുന്നു. മുട്ടയിട്ട് അടയിരിക്കുന്നു വിരിയിക്കുന്ന പക്ഷികള്‍ പൊന്തകാടുകളില്‍ നിത്യകാഴ്ചയാണ്. വംശനാശ ഭീഷണി നേരിടുന്ന മഞ്ഞകൊക്ക്, നീലക്കോഴി ഇനത്തില്‍പെട്ട പക്ഷികള്‍ വരെ ഇക്കൂട്ടത്തില്‍ കാണാം. കുട്ടനാട്ടിലെ പാണ്ടി, ചെറുതന, ആയാപറമ്പ്, ചെക്കിടിക്കാട്, കേളമംഗലം എന്നീപ്രദേശങ്ങള്‍ പക്ഷിസങ്കേതമായി സര്‍ക്കാര്‍ പ്രഖ്യാപിച്ചിട്ടുണ്ട്. ഈ പ്രദേശങ്ങളില്‍ പക്ഷികളുടെ വംശഭീഷണി നേരിടുന്ന തരത്തില്‍ പക്ഷിവേട്ടയും പറവകളെ ഓടിക്കാനുള്ള കരിമരുന്ന് പ്രയോഗവും നടത്തരുതെന്ന് നിര്‍ദേശമുണ്ടങ്കിലും ഇതൊന്നും പാലിക്കപെടാറില്ല. കുട്ടനാട്ടിലെ ഗ്രാമീണ ഷാപ്പുകളില്‍ പറവയിറച്ചി സുലഭമായി ലഭിക്കാറുണ്ട്. ദേശാടന പക്ഷികള്‍ക്കാണ് ആവശ്യക്കാര്‍ ഏറെയുള്ളത്. പക്ഷി സങ്കേതമായി പതിറ്റാണ്ടു മുമ്പ് പ്രഖ്യാപിച്ച സ്ഥലങ്ങളില്‍ സര്‍ക്കാര്‍ ബോര്‍ഡ് സ്ഥാപിച്ചതല്ലാതെ പിന്നീടെ തിരിഞ്ഞുനോക്കിയിട്ടില്ല. പരിസ്ഥിതി പ്രവര്‍ത്തകര്‍ പോലും കുട്ടനാട്ടിലെ പക്ഷിസങ്കേതം മറന്നമട്ടാണ്. പക്ഷിസങ്കേതമായി പ്രഖ്യാപിക്കുന്ന സ്ഥലങ്ങള്‍ വനം വകുപ്പ് ഏറ്റെടുത്ത് വനസംരക്ഷണം ഉറപ്പുവരുത്താനും, മരങ്ങള്‍ നട്ടുപിടിപ്പിക്കാനും ശ്രദ്ധിക്കേണ്ടതാണ്. എന്നാല്‍ ഇതെല്ലാം സര്‍ക്കാര്‍ സ്ഥാപിച്ച ഇരുമ്പ് ബോര്‍ഡില്‍ ഒതുങ്ങുകമാത്രമാണ് ചെയ്തതെന്ന് നാട്ടുകാര്‍ പറയുന്നു.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.