സംഗീത സംവിധാന രംഗത്ത് പരീക്ഷണങ്ങളുമായി ജയന്‍ പിഷാരടി

Saturday 30 April 2016 5:50 pm IST

കൊമ്പുള്ള മാനെ ചെമ്പുള്ളിമാനെകുഞ്ചാക്കോ ബോബന്‍ നായകനായ സാന്‍വിച്ച്’എന്ന ചിത്രത്തിലെ ഈ ഹിറ്റ് ഗാനം കേള്‍ക്കാത്തവരായി ആരും കാണില്ല. സംഗീത സംവിധായകന്‍, ഗായകന്‍, വാദ്യോപകരണ കലാകാരന്‍, അഭിനേതാവ് തുടങ്ങി കലയുടെ വിവിധ മേഖലകളില്‍ വ്യക്തിമുദ്ര പതിപ്പിച്ച ജയന്‍ വി. പിഷാരടിയാണ് ഈ ഗാനം ചിട്ടപ്പെടുത്തിയത്. ഈ ഗാനത്തിലൂടെ പിഷാരടി മലയാളത്തിലെ അറിയപ്പെടുന്ന സംഗീത സംവിധായകനായി മാറുകയായിരുന്നു. രണ്ടായിരത്തില്‍ പുറത്തിറങ്ങിയ ‘മിമിക്‌സ്’എന്ന ചിത്രത്തിന്റെ ഗാനങ്ങളുടെ സംഗീതവും പശ്ചാത്തല സംഗീതവും നിര്‍വ്വഹിച്ചുകൊണ്ടാണ് പിഷാരടി സിനിമാരംഗത്ത് കാലുകുത്തുന്നത്. പിന്നീട്, ഫോര്‍ട്ട് കൊച്ചി, കണ്ണേ മടങ്ങുക, കളിയില്‍ അല്‍പം കാര്യം, പതിനൊന്നില്‍ വ്യാഴം, സാന്‍വിച്ച്, വണ്‍ഡേ ജോക്‌സ്, 8വേ മാര്‍ച്ച്, വണ്‍ഡേ, തുടങ്ങിയ ചിത്രങ്ങളുടെ സംഗീത സംവിധാനവും, പശ്ചാത്തല സംഗീതവും നിര്‍വ്വഹിച്ചു. ഈ ചിത്രങ്ങളിലെ ഗാനങ്ങളും ശ്രദ്ധേയമായിരുന്നു. സംഭാഷണമില്ലാത്ത ‘വണ്‍ഡേ ജോക്‌സ്’എന്ന ചിത്രത്തിന് പശ്ചാത്തല സംഗീതമൊരുക്കിയത് വലിയ പരീക്ഷണമായിരുന്നു. പശ്ചാത്തല സംഗീതം കൊണ്ടായിരുന്നു കഥാപാത്രങ്ങളുടെ മാനസിക വ്യാപാരം അറിഞ്ഞിരുന്നത്. ചിത്രത്തിന്റെ കഥ വ്യക്തമാവുകയും വേണമായിരുന്നു. ഈ പരീക്ഷണത്തില്‍ വിജയിക്കാന്‍ കഴിഞ്ഞത് വലിയ ആത്മവിശ്വാസമുണ്ടാക്കി, പിഷാരടി പറയുന്നു. 2010-ല്‍ കളിയില്‍ അല്‍പം കാര്യം’ എന്ന ചിത്രത്തിലൂടെ മികച്ച സംഗീത സംവിധായകനുള്ള അടൂര്‍ ഭാസി അവാര്‍ഡ് പിഷാരടിക്ക് ലഭിച്ചിരുന്നു. 2012-ല്‍ ഫ്രോഗ്’എന്ന ഹൃസ്വ ചിത്രത്തിലൂടെ മികച്ച പശ്ചാത്തല സംഗീത സംവിധായകനുള്ള കേരള സംസ്ഥാന ടെലിവിഷന്‍ അവാര്‍ഡും ജയന്‍ വി. പിഷാരടിയെ തേടിവന്നു. ഇപ്പോള്‍ ദേശീയ അവാര്‍ഡിന് പരിഗണിച്ച ‘ക്രെയോണ്‍സ്’എന്ന ചിത്രത്തിന്റെ പശ്ചാത്തല സംഗീത സംവിധാനം പൂര്‍ത്തിയാക്കിയ, ജയന്‍ പുതിയ ചില ചിത്രങ്ങള്‍ക്കുവേണ്ടിയും സംഗീത സംവിധാനം നിര്‍വ്വഹിക്കുന്നു. സംഗീതത്തെ സ്‌നേഹിച്ച തിരുവനന്തപുരംകാരനായ, ഡോ. ആര്‍. വി. പിഷാരടിയുടെയും, സൂര്യകുമാരിയുടെയും ഇളയമകനായ ജയന്‍, ഗായികയും, ഗാനരചയിതാവും, മ്യൂസിക് തെറാപ്പിസ്റ്റുമായ സ്മിത പിഷാരടിയെയാണ് വിവാഹം ചെയ്തത്. മകള്‍ ഹര്‍ഷിതയ്ക്ക്, സൈലന്റ് റൈന്‍ എന്ന ഹൃസ്വ ചിത്രത്തിലൂടെ രണ്ട് തവണ മികച്ച ബാലതാരത്തിനുള്ള പുരസ്‌കാരം ലഭിച്ചിട്ടുണ്ട്.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.