വോട്ടെടുപ്പ് ശാന്തം, സമാധാനപരം; ജില്ലയില്‍ 78.01 ശതമാനം പോളിങ്

Monday 16 May 2016 8:52 pm IST

കല്‍പ്പറ്റ : ജില്ലയില്‍ കനത്ത സുരക്ഷാ സന്നാഹങ്ങളോടെ നടന്ന നിയമസഭാ തെരഞ്ഞെടുപ്പില്‍ വയനാട് ജില്ലയില്‍ 78.01 ശതമാനം പേര്‍ വോട്ട് രേഖപ്പെടുത്തി. ജില്ലയില്‍ ഏറ്റവും ഉയര്‍ന്ന പോളിംഗ് കല്‍പ്പറ്റ മണ്ഡലത്തിലാണ്-78.48 ശതമാനം. ബത്തേരിയില്‍ 78.32, മാനന്തവാടി-77.67 എന്നിങ്ങനെയാണ് മറ്റു മണ്ഡലങ്ങളിലെ പോളിംഗ് നില. വൈകീട്ട് ആറ് മണിക്കുള്ള കണക്ക് വെച്ചാണ് ഈ നില. അവസാന കണക്കെടുപ്പില്‍ പോളിംഗ് ഇനിയും ഉയര്‍ന്നേക്കും. 2011ലെ നിയമസഭാ തെരഞ്ഞെടുപ്പില്‍ ജില്ലയിലെ പോളിംഗ് ശതമാനം 73.8 ആയിരുന്നു. മാനന്തവാടി-74.15, സുല്‍ത്താന്‍ ബത്തേരി-73.18, കല്‍പ്പറ്റ-74.19 എന്നിങ്ങനെയായിരുന്നു 2011ല്‍ വിവിധ മണ്ഡലങ്ങളിലെ പോളിംഗ് ശതമാനം. കഴിഞ്ഞ ലോക്‌സഭാ തെരഞ്ഞെടുപ്പില്‍ പോളിംഗ് കുറഞ്ഞ ബൂത്തുകള്‍ കേന്ദ്രീകരിച്ച് ജില്ലയിലാകെ നടപ്പിലാക്കിയ 'ഓര്‍മമരം' പദ്ധതി പോളിംഗ് ശതമാനം ഉയര്‍ത്താന്‍ സഹായകമായി. ജില്ലയില്‍ ബത്തേരി, മാനന്തവാടി, കല്‍പ്പറ്റ എന്നീ മൂന്ന് നിയമസഭാ മണ്ഡലങ്ങളിലായി 5,96,939 വോട്ടര്‍മാരാണുള്ളത്. 3,04,621 പുരുഷ വോട്ടര്‍മാരും 2,92,318 സ്ത്രീ വോട്ടര്‍മാരും. ജില്ലയില്‍ വോട്ടെടുപ്പ് സമാധാനപരമായിരുന്നു. പൊതുവെ മഴമാറി നിന്ന അന്തരീക്ഷത്തില്‍ നടന്ന തെരഞ്ഞെടുപ്പില്‍ ഒരു മണിയോടെ തന്നെ ജില്ലയില്‍ 50.71 ശതമാനം പേര്‍ വോട്ട് രേഖപ്പെടുത്തി. രാവിലെ എട്ടുമണിക്ക് 9.2, ഒമ്പത് മണി 15.9, 10 മണി 25.6, 11 മണി 32.8, 12 മണി 37.13, ഒരു മണി 50.71, രണ്ടു മണി 53.14 എന്നിങ്ങനെയാണ് പോളിംഗ് ശതമാനം ഉയര്‍ന്നത്. വൈകീട്ട് അഞ്ച് മണിക്ക് ജില്ലയിലെ ശതമാനം 70.32 ആയി. ബത്തേരി എട്ട്, മാനന്തവാടി 11, കല്‍പ്പറ്റ 10 എന്നിങ്ങനെ മൂന്ന് മണ്ഡലങ്ങളിലായി 29 സ്ഥാര്‍ഥികളാണ് ജനവിധി തേടിയത്. ഒരു ഓക്‌സിലിയറി പോളിംഗ് സ്‌റ്റേഷന്‍ ഉള്‍പ്പെടെ 470 പോളിംഗ് സ്‌റ്റേഷനുകളാണ് ജില്ലയില്‍. ബത്തേരി മണ്ഡലത്തില്‍ 184 പോളിംഗ് ബൂത്തുകളും കല്‍പ്പറ്റ മണ്ഡലത്തില്‍ 145 ബൂത്തുകളും മാനന്തവാടി മണ്ഡലത്തില്‍ 141 ബൂത്തുകളുമാണ്. ഇതില്‍ 47 ബൂത്തുകള്‍ മാതൃകാ പോളിംഗ് ബൂത്തുകള്‍, വനിതകള്‍ മാത്രം പോളിംഗ് ഓഫീസര്‍മാരായ എട്ട് ബൂത്തുകള്‍ എന്നിങ്ങനെയാണുണ്ടായിരുന്നത്. സുരക്ഷയുടെ ഭാഗമായി 42 ബൂത്തുകളില്‍ വെബ്കാസ്റ്റിംഗ് സംവിധാനം ഏര്‍പ്പെടുത്തിയിരുന്നു. 21 ബൂത്തുകളില്‍ വീഡിയോഗ്രാഫിയും 31 ബൂത്തുകളില്‍ മൈക്രോ ഒബ്‌സര്‍വര്‍മാരെയും ഏര്‍പ്പെടുത്തിയിരുന്നു. 25 ബൂത്തുകളില്‍ സി.ആര്‍.പി.എഫും 32 ബൂത്തുകളില്‍ കര്‍ണാടക പൊലീസിനെയും നിയോഗിച്ചിരുന്നു. സി.ആര്‍.പി.എഫിന്റെ മൂന്ന് കമ്പനിയും കര്‍ണാടക പൊലീസിന്റെ രണ്ട് കമ്പനിയുമാണ് തെരഞ്ഞെടുപ്പ് സുരക്ഷയ്ക്കായി സംസ്ഥാന പൊലീസിന് പുറമെ ജില്ലയില്‍ കര്‍മനിരതരായത്. ഇതിന് പുറമെ ഡി.ജി.പി സ്‌ക്വാഡിന്റെ രണ്ട് കമ്പനിയും ജില്ലാ പൊലീസ് മേധാവിയുടെ ഒരു സ്‌ട്രൈക് ഫോഴ്‌സും ഉണ്ടായിരുന്നു.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.