ബെംഗളരൂ: അമേരിക്കയുടെ സ്പേസ് ഷട്ടില് പോലെ, വീണ്ടും ഉപയോഗിക്കാന് കഴിയുന്ന ഭാരതത്തിന്റെ ശൂന്യാകാശ വാഹനത്തിന്റെ ആദ്യ പരീക്ഷണം കാലാവസ്ഥ നല്ലതെങ്കില് തിങ്കളാഴ്ച നടക്കും. റീ യൂസബിള് ലോഞ്ച് വെഹിക്കിള് ടെക്നോളജി ഡെമോണ്സ്ട്രേറ്റര്( ആര്എല്വി ടിഡി) എന്ന പരീക്ഷണ വാഹനം തിങ്കളാഴ്ച ശ്രീഹരിക്കോട്ടയിലെ സ്പേസ് സെന്ററില് നിന്ന് തിങ്കളാഴ്ച രാവിലെ ഒന്പതരയ്ക്ക് പറന്നുയരും. ചുമതലയുള്ള ഐഎസ്ആര്ഒയിലെ ദേവി പ്രസാദ് കാര്ണിക് പറഞ്ഞു.
വലിയൊരു കാറിന്റെ വലിപ്പമുള്ള ആര്എല്വി ടിഡി നാസയുടെ സ്പേസ് ഷട്ടിലിന്റെ മാതൃകയിലുള്ളതാണ്. ആറര മീറ്റര് നീളവും 1.75 ടണ് ഭാരവുമുള്ളതാണ് ആര്എല്വി ടിഡി. കോടികള് മുടക്കി നിര്മ്മിക്കുന്ന റോക്കറ്റ് ഒരു തവണ മാത്രമേ ഉപയോഗിക്കാന് കഴിയൂ. പുതിയ വാഹനം വീണ്ടും വീണ്ടും ഉപയോഗിക്കാന് കഴിയും എന്നതിനാല് ഉപഗ്രഹവിക്ഷേപണച്ചെലവ് വന്തോതില് കുറയും.
റോക്കറ്റുപോലെ കുതിച്ചുയര്ന്ന് ബഹിരാകാശത്ത് എത്തി ഉപഗ്രഹം വിക്ഷേപിച്ചശേഷം മടങ്ങി എത്തുന്നതാണ് വാഹനം. അന്തരീക്ഷത്തില് പ്രവേശിക്കുന്ന ഇത് വിമാനം പോലെ പറന്ന് ഇറങ്ങും. ഇത് വീണ്ടും ഉപയോഗിക്കാം. കുത്തിച്ചുയര്ന്ന് അഞ്ചു മിനിറ്റിനുള്ളില് 70 കിലോമീറ്റര് ഉയരത്തിലെത്തുന്ന ആര്എല്ഡി പിന്നെ ചിറകിന്റെ സഹായത്താല് ബംഗാള് ഉള്ക്കടലില് പറന്നിറങ്ങും. ബഹിരാകാശത്ത് എത്തിയശേഷം മടങ്ങി ഭൂമിയുടെ അന്തരീക്ഷത്തില് എത്തുന്നതാണ് സങ്കീര്ണ്ണമായ ഘട്ടം. ഈ സമയം അന്തരീക്ഷവുമായി ഉണ്ടാകുന്ന ഘര്ഷണത്തില്( ഉരസല്) വന്തോതിലാണ് ചൂട് ഉണ്ടാകുന്നത്. ഇത് ചട്ടക്കൂടിന് താങ്ങാന് കഴിഞ്ഞില്ലെങ്കില് വാഹനം കത്തിനശിക്കും. ഇതിനുള്ള മുന്കരുതലുമുണ്ട്. മുന്ഭാഗം കൂര്ത്തതല്ല. വിമാനങ്ങളുടേതു പോലെയാണ്.
പരീക്ഷണ പരമ്പരയാണ് ആസൂത്രണം ചെയ്തിരിക്കുന്നത്. ക്രമണേ കടലില് ഇറങ്ങുന്നതിനു പകരം കരയില് ലാന്ഡ് ചെയ്യുന്ന സംവിധാനത്തിലേക്ക് എത്തും.
ഇത് പൂര്ത്തിയാകുന്നതോടെ നമ്മുടെ പിഎസ്എല്വി, ജിഎസ്എല്വി റോക്കറ്റുകള് ചരിത്രത്തിന്റെ അവശേഷിപ്പുകളായി മാറും.
ഐഎസ്ആര്ഒയുടെ പുതിയ കുതിപ്പിനുള്ള സ്പേസ് ഷട്ടില് ഒരുങ്ങുന്നത് കേരളത്തിലാണ്. തിരുവനന്തപുരം തുമ്പയിലെ വിഎസ്എസ്സിയില്. 600 ശാസ്ത്രജ്ഞരാണ് ഇതിന്റെ നിര്മ്മാണത്തില് പങ്കെടുത്തത്. അഞ്ചു വര്ഷം എടുത്ത് 95 കോടി രൂപ ചെലവഴിച്ചാണ് ഇത് നിര്മ്മിച്ചത്. 53 കാരനായ ശ്യാം മോഹനനാണ് പ്രോജക്ട് ഡയറക്ടര്.മൂന്നു പതിറ്റാണ്ടായി ഐഎസ്ആര്ഒ ശാസ്ത്രജ്ഞനാണ്. ഒരു സ്വപ്നമാണ് പൂവണിയുന്നത്. ആര്എല്വിയുടെ രൂപകല്പനയ്ക്ക് നീണ്ട പതിനഞ്ചു വര്ഷം ചെലവഴിച്ച ശ്യാം മോഹനന് പറഞ്ഞു.
പ്രതികരിക്കാൻ ഇവിടെ എഴുതുക: