പാനൂര്: രാഷ്ട്രീയ സ്വാതന്ത്ര്യ പോരാട്ടത്തില് വീരമൃത്യൂവരിച്ച പൗരുഷ്യത്തിനു മുന്നില് ഇന്ന് ആയിരങ്ങള് പ്രണാമമര്പ്പിക്കും. 1996 മെയ് 25ന് സിപിഎം ഭീകരതക്കു മുന്നില് തലകുനിക്കാതെ പോരാടിയ പോരാളികളുടെ പോരാളിയായി നാടുവാഴ്ത്തുന്ന പന്ന്യന്നൂര് ചന്ദ്രന്റെ വീരബലിദാനത്തിന് ഇന്ന് രണ്ട് പതിറ്റാണ്ട് ദൈര്ഘ്യം. ബിജെപി ജില്ലാസെക്രട്ടറിയായിരുന്ന പന്ന്യന്നൂര് ചന്ദ്രനെ ഭാര്യയോടൊത്ത് ബൈക്കില് സഞ്ചരിക്കവേ പന്ന്യന്നൂരിലെ തന്റെ വീടിനു സമീപത്ത് വെച്ച് പത്മവ്യൂഹം ചമച്ച് ചതിക്കുഴിയൊരുക്കി സിപിഎം അക്രമികള് വെട്ടിക്കൊല്ലുകയായിരുന്നു. ജില്ലയിലെ സിപിഎം അസഹിഷ്ണുതയ്ക്കെതിരെ എന്നും നെഞ്ചുവിരിച്ച് പോരാടിയ തങ്ങളുടെ പ്രിയപ്പെട്ട ചന്ദ്രേട്ടന്റെ ഓര്മ്മകള് സംഘപ്രവര്ത്തകര്ക്ക് നൊമ്പരങ്ങള്ക്കിടയിലും ഇന്നും ആവേശമാണ്. രാഷ്ട്രീയ പ്രവര്ത്തനത്തിന് സ്വാതന്ത്ര്യം അനുവദിക്കാത്ത മേഖലകളില് സിപിഎമ്മിനെ വെല്ലുവിളിച്ച് ഭഗവപതാക പാറിച്ച പന്ന്യന്നൂര് ചന്ദ്രനെ മനസാ ആരാധിക്കുന്ന നവസ്വയംസേവകരും ഏറെ. കേട്ടറിഞ്ഞ വീരഗാഥകളില് ആവേശം പൂണ്ട് ചന്ദ്രേട്ടന്റെ വാക്കും നോക്കും അനുകരിക്കുന്ന യുവതലമുറയാണ് ഇവിടുളളത്. അതിനാല് തന്നെ ധീരസ്വയംസേവകരിലൂടെ പന്ന്യന്നൂര് ചന്ദ്രന് ഇന്നും ജീവിക്കുകയാണ്. തുടങ്ങിവെച്ച ലക്ഷ്യപൂര്ത്തീകരണത്തിന് ആയിരങ്ങള് സജ്ജരാണെന്ന് തെളിയിക്കപ്പെട്ട വര്ത്തമാന രാഷ്ട്രീയ സാഹചര്യത്തില് ബലിദാനദിനത്തിന് ഏറെ പ്രസക്തിയുമുണ്ട്. അധികാര രാഷ്ട്രീയത്തിന്റെ അഹന്തയില് നടത്തിയ കൊലപാതകമായിരുന്നു പന്ന്യന്നൂര് ചന്ദ്രന്റെത്. വീണ്ടും അശാന്തിയുടെ കാര്മേഘങ്ങള് ജില്ലയെ ശോകമൂകമാക്കുന്നു. എങ്ങും അരക്ഷിതാവസ്ഥ. ഇവിടെ ഒരായിരം ധീരന്മാരായ പന്ന്യന്നൂര് ചന്ദ്രന്മാര് പുനര്ജനിക്കണം. രാഷ്ട്രീയ സ്വാതന്ത്ര്യം അനുവദിക്കാത്ത മാര്ക്സിസ്റ്റ് മാടമ്പിത്തരത്തിനു മുന്നില് വിരല്ചൂണ്ടാന് എന്നും നമുക്ക് മുന്നിലുണ്ടായിരുന്ന ആ ധീരയോദ്ധാവിന്റെ ഓര്മ്മകള് ഓരോ സ്വയംസേവകനിലും അഭിമാനമുയര്ത്തുന്നതാണ്. കര്മ്മമണ്ഡലത്തില് ഊര്ജ്ജവും ശക്തിയും പ്രേരണയുമായി ഇന്നും ജ്വലിച്ചു നില്ക്കുന്ന ആ സൂര്യതേജസിനു മുന്നില് ആയിരങ്ങള് ഇന്ന് പ്രണാമമര്പ്പിക്കും. രാവിലെ എട്ടിന് പന്ന്യന്നൂരിലെ സ്മൃതിമണ്ഡപത്തില് പുഷ്പാര്ച്ചന നടക്കും. തുടര്ന്ന് നടക്കുന്ന അനുസ്മരണസാംഘിക്കില് ആര്എസ്എസ് ജില്ലാപ്രചാര് പ്രമുഖ് അഡ്വ:ജയപ്രകാശ് പ്രഭാഷണം നടത്തും. വൈകുന്നേരം 5ന് പാനൂര് ടൗണില് നടക്കുന്ന അനുസ്മരണ പൊതുസമ്മേളനം ബിജെപി സംസ്ഥാന പ്രസിഡണ്ട് കുമ്മനം രാജശേഖരന് ഉദ്ഘാടനം ചെയ്യും. പികെ.കൃഷ്ണദാസ് അനുസ്മരണ പ്രഭാഷണം നടത്തും. സി.സദാനന്ദന്മാസ്റ്റര്, കെ.രഞ്ജിത്ത്, പി.സത്യപ്രകാശ് തുടങ്ങിയ നേതാക്കള് പ്രസംഗിക്കും.
രാഘവന്
പ്രതികരിക്കാൻ ഇവിടെ എഴുതുക: