അരൂര്: ആരോഗ്യ വകുപ്പിന്റെ അനാസ്ഥ കാരണം തുറവൂര് താലൂക്ക് ആശുപത്രിയില് ഡയാലിസിസ് യൂണിറ്റിന്റെ പ്രവര്ത്തനം താളംതെറ്റി. ആഭ്യന്തര മന്ത്രിയായിരുന്ന രമേശ് ചെന്നിത്തലയാണ് മാസങ്ങള്ക്കു മുന്പ് ഡയാലിസിസ് സെന്റര് ഉദ്ഘാടനം ചെയ്തത്.
അത്യാധുനിക സംവിധാനങ്ങളോടെ അഞ്ചു യൂണിറ്റുകള് സജ്ജീകരിച്ചിട്ടുണ്ടെങ്കിലും ഒരെണ്ണം മാത്രമാണ് നിലവില് പ്രവര്ത്തിക്കുന്നത്.മറ്റ് നാല് യൂണിറ്റുകള് പ്രവര്ത്തന സജ്ജമാക്കുവാനോ പദ്ധതിയുടെ പ്രയോജനം പൂര്ണമായി ജനങ്ങളിലെത്തിക്കുവാനോ ആരോഗ്യ വകുപ്പിന് കഴിഞ്ഞിട്ടില്ല.
ആവശ്യത്തിന് ജീവനക്കാര് ഇല്ലാത്തതും യൂണിറ്റുകള് പ്രവര്ത്തിപ്പിക്കുന്നതിന് പരിജ്ഞാനമുള്ള ജീവനക്കാരുടെ ലഭ്യത കുറവുമാണ് ഇതിന് പ്രധാന കാരണമെന്നാണ് അധികൃതര് പറയുന്നത്.
ചികിത്സ തേടിയെത്തുന്നവര്ക്ക് യൂണിറ്റിന്റെ പ്രവര്ത്തനത്തെ കുറിച്ചറിയാന് യാതൊരു സംവിധാനങ്ങളും ഇവിടെയില്ലെന്നും രോഗികള് പറയുന്നു. രക്തം ശുദ്ധീകരിക്കുന്നതിനുള്ള സംവിധാനം ഇവിടെ ഏര്പ്പെടുത്തിയിട്ടുണ്ടെങ്കിലും പ്രയോജനം ലഭിക്കുന്നില്ലെന്ന പരാതി ആദ്യം മുതലേ ഉയര്ന്നിരുന്നു.
ഇതുമൂലം എറണാകുളം ജില്ലയിലെ സ്വകാര്യ ഡയാലിസിസ് സെന്ററുകളെ ആശ്രയിക്കേണ്ട ഗതികേടിലാണ് രോഗികള്.
പ്രതികരിക്കാൻ ഇവിടെ എഴുതുക: