ആലപ്പുഴ: സംസ്ഥാന നിയമസഭയിലെ പ്രഥമ ബിജെപി പ്രതിനിധിയായ മുന് കേന്ദ്രമന്ത്രി ഒ. രാജഗോപാലിന് ബിജെപി ജില്ലാ കമ്മറ്റിയുടെ നേതൃത്വത്തില് ആലപ്പുഴയിലും ചെങ്ങന്നൂരിലും ഉജ്വല വരവേല്പ് നല്കി. ആലപ്പുഴയിലെ സ്വീകരണ സമ്മേളനം ബിജെപി സംസ്ഥാന അദ്ധ്യക്ഷന് കുമ്മനം രാജശേഖരന് ഉദ്ഘാടനം ചെയ്തു. ഈ തെരഞ്ഞെടുപ്പോടെ കേരളത്തില് വന് രാഷ്ട്രീയ മാറ്റത്തിനു തുടക്കമായെന്നും മുഖ്യപ്രതിപക്ഷത്തിന്റെ റോള് ഏറ്റെടുത്ത് എന്ഡിഎ ശക്തമായ മുന്നേറ്റം നടത്തുമെന്നും അദ്ദേഹം പറഞ്ഞു.
കേരളത്തില് സമാധാനപരമായ വിപ്ലവമാണ് നടക്കുന്നതെന്ന് മറുപടി പ്രസംഗത്തില് ഒ. രാജഗോപാല് പറഞ്ഞു. തെരഞ്ഞെടുപ്പില് നല്ല മുന്നേറ്റമാണ് എന്ഡിഎയ്ക്കും ബിജെപിക്കുമുണ്ടായത്. കേരള ജനത കുപ്രചാരണങ്ങള് തള്ളി എന്ഡിഎയെ സ്വീകരിച്ചുകഴിഞ്ഞു. ഇതിനു തെളിവാണ് എന്ഡിഎയ്ക്ക് ഇത്തവണയുണ്ടായ വന് മുന്നേറ്റം. തനിക്ക് കേരളമാകെ ലഭിക്കുന്ന സ്വീകരണം ബിജെപിക്കും എന്ഡിഎയ്ക്കും ലഭിക്കുന്ന സ്വീകരണം തന്നെയാണെന്നും പ്രവര്ത്തകരുടെയും പ്രസ്ഥാനത്തിന്റെയും പ്രതീക്ഷകള് പാലിക്കുമെന്നും അദ്ദേഹം പറഞ്ഞു.
ബിജെപി ജില്ലാ കമ്മറ്റിക്കുവേണ്ടി ജില്ലാ പ്രസിഡന്റ് കെ. സോമനും മേഖലാ പ്രസിഡന്റ് വെള്ളിയാകുളം പരമേശ്വരനും ചേര്ന്ന് അദ്ദേഹത്തെ ഹാരമണിയിച്ച് സ്വീകരിച്ചു. ബിജെപിയുടെ വിവിധ തലങ്ങളിലെ പ്രവര്ത്തകരും നേതാക്കളും എന്ഡിഎ നേതാക്കളും ഒ. രാജഗോപാലിനെ സ്വീകരിച്ചു.
ചടങ്ങില് ജില്ലാ പ്രസിഡന്റ് കെ. സോമന് അദ്ധ്യക്ഷത വഹിച്ചു. സംസ്ഥാന ജനറല് സെക്രട്ടറിമാരായ എന്.ടി. രമേശ്, എ.എന്. രാധാകൃഷ്ണന്, ദേശീയ നിര്വ്വാഹക സമിതിയംഗം പി.കെ. കൃഷ്ണദാസ്, സംസ്ഥാന സെക്രട്ടറി വി.വി. രാജേഷ്, ദക്ഷിണമേഖലാ പ്രസിഡന്റ് വെള്ളിയാകുളം പരമേശ്വരന്, സംഘടനാ സെക്രട്ടറി എല്. പത്മകുമാര്, ജില്ലാ ജനറല് സെക്രട്ടറിമാരായ കെ. ജയകുമാര്, ഡി. അശ്വനീദേവി, ജില്ലാ വൈസ് പ്രസിഡന്റുമാരായ പി.കെ. വാസുദേവന്, കൊട്ടാരം ഉണ്ണികൃഷ്ണന്, ബിഡിജെഎസ് ജില്ലാ പ്രസിഡന്റ് ബി. സുരേഷ്ബാബു, ജെഎസ്എസ് സംസ്ഥാന പ്രസിഡന്റ് ആര്. പൊന്നപ്പന്, വിജയകുമാരന് നായര്, സുമംഗലീ മോഹന്, സാനു സുധീന്ദ്രന്, പാലമുറ്റത്ത് വിജയകുമാര്, സുഗന്ധീരാജ്, അമ്പിളി മധു തുടങ്ങിയവര് സംസാരിച്ചു.
പ്രതികരിക്കാൻ ഇവിടെ എഴുതുക: